આણંદ / પેટલાદની સિવિલમાં મોટો લોચો, એક સ્ત્રીનું શિશું બીજી પાસે પહોંચ્યું, કેમ કરતા થઈ અદલાબદલી?

• પેટલાદ સિવિલ હોસ્પિટલમાં નવજાત શિશું બદલાયાનો બનાવ બન્યો
• ભળતા નામવાળી સ્ત્રીનું નવજાત શિશુ બદલાઈ ગયું
• પરિવારજનોએ આ બાબતે પોલીસને જાણ કરી હતી

આણંદ જીલ્લાનાં પેટલાદ સિવિલ હોસ્પિટલમાં નવજાત શિશું  બદલાયા બાદ હોબાળો મચી જવા પામ્યો હતો. હોસ્પિટલમાં ભળતા નામવાળી સ્ત્રીનું નવજાત શિશું બદલાઈ ગયું હતું. પેટલાદ સિવિલ હોસ્પિટલમાં ગાયનેક વિભાગમાં આ બનાવ બન્યો હતો. ત્યારે આ બાબતે પરિવારજનોએ પોલીસને જાણ કરી હતી. જે બાદ પોલીસે હોસ્પિટલમાં જઈ તપાસ હાથ ધરી હતી. એમ્બ્યુલન્સ વાન અને પોલીસ સ્ટાફનાં માધ્યમથી નવજાત શિશુને પરત લવાયા હતા. 

એક જ નામની બે મહિલાઓ હોવાનાં કારણે સમસ્યા સર્જાઈ
આ બાબતે અધિકારીએ જણાવ્યું હતું કે બંને દર્દીઓ એક જ વોર્ડમાં છે. હોસ્પિટલ તરફથી જોન્ડીસનાં બાળકને અમુક કલાકનાં અંતરે થેરાપી આપવામાં આવતી હોય છે. થેરાપી પૂર્ણ થયા બાદ બાળકને માતાને સોંપવામાં આવે છે. જેથી માતા બાળકને ફીડીગ કરાવી શકે. હોસ્પિટલ દ્વારા ફીડીંગ માટે જ બાળક આપ્યું હતું.  પરંતું એક જ નામની બે મહિલાઓ હોસ્પિટલમાં દાખલ હોવાનાં કારણે આ સમસ્યા સર્જાઈ છે.