બરતરફ / બનાસકાંઠાના સહકારી માળખામાં ખળભળાટ, બનાસ બેંકના જનરલ મેનેજરની હકાલપટ્ટીનો ઓર્ડર ફાટ્યો, જુઓ શું હતો આરોપ

• બનાસકાંઠાના સહકારી માળખામાં હડકંપ
• બનાસ બેંકના જનરલ મેનેજરની હકાલપટ્ટી
• ભરતી કૌભાંડમાં જનરલ મેનેજર અશોક ચૌધરીને બરતરફ કરાયા

બનાસકાંઠાના સહકારી માળખામાં ખળભળાટ મચ્યો છે. બનાસ બેકમાં ભરતી કૌભાંડમાં જનરલ મેનેજર અશોક ચૌધરીની હકાલપટ્ટી કરી દેવામાં આવી છે. 40 અધિકારી અને કર્મચારીઓની ખોટી રીતે ભરતી કરવાનો આરોપ હતો જે સાબિત થતાં બનાસ બેન્કના ચેરમેન અણદાભાઇ પટેલના કડક વલણથી અશોક ચૌધરીને ડિસમીસ કરવાનો ઓર્ડર ફાટ્યો છે. 

અશોક ચૌધરી બુંદેલખંડ યુનિવર્સિટીની ડિગ્રી ખોટી હોવાનું સામે આવ્યું હતુ. જે બાદ ભરતી મુદ્દે પૂર્વ ચેરમેન એમ.એલ.ચૌધરીએ તપાસ કમિટી રચી હતી જે બાદ આજે બેંકની વહીવટી સમિતિમાં લેવાયો નિર્ણય હતો.  જનરલ મેનેજર અશોક ચૌધરી પૂર્વ મંત્રીના ભાણેજ છે.

બનાવટી ડિગ્રી લઈ ઊંચી પોસ્ટ પર નોકરી મેળવવાનો કારસો રચ્યો
અશોકભાઈ દજાભાઈ ચૌધરી હાલે જનરલ મેનેજર તરીકે બેંકમાં ફરજ બજાવે છે. અને બેંકના તા. ૨૭/૧૨/૨૦૨૧ ના સંચાલક મંડળની મીટીંગના ઠરાવ નં.૯૩૪૧૦૩ થી થયેલ તપાસ સમિતિ ધ્વારા બેંકમાં ખોટી ભરતી તથા બઢતી બાબતે થયેલ આક્ષેપોના અનુસંધાને તપાસ કરવામાં આવેલી અને જે બેંકના ઉચ્ચ અધિકારીની ભરતી બાબતેની પણ તપાસ કરેલી અને જેમાં અશોક ચૌધરી એ બેંકમાં તા. ૧/૩,૨૦૦ ના નોકરી મેળવવા અરજી કરેલી, અને સદર અરજી સાથે એસ.એમ.સી., એચ.એચ.સી., તથા બુંદેલખંડ યુનિવર્સિટીની બી.એ. પાસની ત્રણ માર્કશીટ તથા માઈગ્રેશન સર્ટીફીકેટ રજૂ કરી જુનીયર ઓફીસર સેલ્ફ હેલ્થ ગ્રુપ નામની પોસ્ટ ઉપર નિમણુંક મેળવેલી પરંતુ સદર પોસ્ટ બેંકમાં નથી, તથા બુંદેલખંડ યુનિવર્સિટીની જે બી.એ. ની જે માર્કશીટ રજુ કરેલ છે, તે પ્રથમ દર્શનીય બનાવટી હોવાનું જણાઈ આવેલ, અને તે બાબતે તપાસ કરતા બુંદેલખંડ યુનિવર્સિટી ધ્વારા તા. ૨/૩/૨૦૨૨ ના માહીતી પત્ર થી બુંદેલખંડ યુનિવર્સિટીની ડીગ્રી બનાવટી હોવાનુ જણાવેલ છે, અને જે ખુબ જ ગંભીર બાબત છે. 

બેન્કની પ્રતિષ્ઠા ખરડાતાં કરાયા બરતરફ
તથા ખુબ જ ટુંકા સમયગાળામાં બનાવટી ડીગ્રી ધારણ કરી લાયકાત ધરાવતા ન હોવા છતાં હયુમન રીસોર્સ પોલીસીમાં બઢતી બાબતેના જે ધોરણો નકકી કરેલ છે, તેને અવગણીનો ખુબજ ટૂંકા સમય ગાળામાં પ્રમોશન મેળવીને જનરલ મેનેજર જેવા મહત્વના હોદા ઉપર નિમણૂંક મેળવેલ છે, અને બનાવટી ડીગ્રીના આધારે બેંકમાં નિમણુંક મેળવીને અશોકભાઈ દજાભાઈ ચૌધરીએ બેંક સાથે છેતરપીંડી કરેલ છે. તથા બેંકની પ્રતિષ્ઠાને બટ્રો લાગે તેવી પ્રવૃત્તિ કરેલ હોય અને ફોજદારી ગુનો કરેલ હોય બેંકની નોકરીમાં ચાલુ રાખવા હિતાવહ ન હોય અને તમોએ બેંકનો વિશ્વાસ ગુમાવી દીધેલ હોય અને ઉપરોકત અહેવાલ બેંકની વહીવટી સમિતિની તાર ૧૪/૩/૨૦૨૨ ની મીટીંગના ઠરાવ નં. ૦૩/૯૭ થી તમોને ડીસમીસ કરવાનું ઠરાવેલ હોય આથી તેમણે નોકરીમાંથી બરતરફ કરવામાં આવે છે.