હુકમ / GPSCની વધુ એક ભરતી પહોંચી હાઈકોર્ટના દ્વાર સુધી: અરજદાર પરીક્ષાર્થીઓને લઇ આપ્યો મહત્વનો આદેશ

• GPSCની વધુ એક ભરતી હાઈકોર્ટના દ્વારે પહોંચી
• આન્સર કી ની વિસંગતતાને લઈ હાઈકોર્ટમાં અરજી
• 7 જૂનના રોજ હાઈકોર્ટમાં વધુ સુનાવણી હાથ ધરાશે

GPSCની વધુ એક ભરતીનો મામલો ગુજરાત હોઈકોર્ટમાં પહોંચ્યો છે. GPSC વર્ગ-1 અને 2ની ભરતીને લઈ ગુજરાત હાઈકોર્ટમાં સુનાવણી યોજાઈ હતી. જેમાં હાઇકોર્ટે અરજદાર પરીક્ષાર્થીઓને મેઇન પરીક્ષામાં બેસવા દેવાનો આદેશ કર્યો છે. સાથે જ કોર્ટે અરજદારના પરિણામ સીલ કવરમાં રાખવાનો આદેશ કર્યો છે. આ મામલે 7 જૂનના રોજ વધુ સુનાવણી હાથ ધરાશે. 

GPSCની પરીક્ષાને લઈ કરાઈ HCમાં અરજી
ગુજરાત ગૌણ સેવા મંડળની વર્ગ 1 અને 2 તેમજ મ્યુનિસિપલ ચીફ ઓફિસરની ભરતી માટેની પરીક્ષાને લઈને ગત 11 જાન્યુઆરીના રોજ પ્રોવિઝનલ અને 10 એપ્રિલના રોજ ફાઈનલ આન્સર કી બહાર પાડવામાં આવી હતી. 11 જાન્યુઆરી અને 10 એપ્રિલના રોજ બહાર પાડવામાં આવેલી આન્સર કીમાં વિસંગતા જોવા મળી હતી. જે બાદ આ મામલો ગુજરાત હાઈકોર્ટમાં પહોંચ્યો હતો. આ મામલે ગુજરાત હાઈકોર્ટમાં અરજી કરવામાં આવી હતી.

હાઈકોર્ટમાં યોજાઈ હતી સુનાવણી
હાઈકોર્ટમાં રજૂઆત કરવામાં આવી હતી કે નેગેટિવ માર્કિંગના કારણે વિદ્યાર્થીઓના ખોટી રીતે માર્ક કપાયા છે. એટલું જ નહીં ફાઈનલ આન્સર કીના જવાબોમાં પણ વિસંગતતા હોવાનો પણ દાવો કરાયો હતો. જે બાદ આ મામલે આજે હાઈકોર્ટમાં સુનાવણી યોજાઈ હતી. જેમાં કોર્ટે અરજદારોની પ્રાથમિક રજૂઆતોને સાંભળી હતી. 

કોર્ટે અરજદારના તરફેણમાં હુકમ કર્યો
રજૂઆતો સાંભળ્યા બાદ કોર્ટે અરજદાર પરીક્ષાર્થીઓને મેઈન પરીક્ષામાં બેસવા દેવાનો આદેશ આપ્યો છે. સાથે જ કોર્ટે GPSCને અરજદાર પરીક્ષાર્થીઓના પરિણાને સીલ કવરમાં રાખવાનો પણ આદેશ આપ્યો છે.