- ચિરિપાલ ગ્રુપ પર પાડવામાં આવેલા દરોડા યથાવત
- દરોડામાં વધુ 5 કરોડની જ્વેલરી મળી આવી
- કુલ જ્વેલરીનો આંક વધીને રૂ. 50 કરોડને પાર
અમદાવાદમાં આવકવેરા વિભાગે મોટું સર્ચ-ઓપરેશન હાથ ધરીને ચિરિપાલ ગ્રુપ પર દરોડા પાડ્યા હતા. જેમાં કુલ 35થી 40 જગ્યા પર દરોડા પાડીને IT વિભાગે તપાસ હાથ ધરી હતી. આ મેઘા સર્ચ-ઓપરેશનમાં કુલ 150 અધિકારીઓ કામગીરીમાં જોડાયા હતા. ત્યારે હવે આ તપાસમાં વધુ 5 કરોડની જ્વેલરી મળી આવી છે. જેથી કુલ જ્વેલરીનો આંક વધીને રૂપિયા 50 કરોડને પાર થઇ ગયો છે.
રૂ. 800 કરોડના બેનામી વ્યવહારો પણ મળી આવ્યા
આ સાથે રૂ. 800 કરોડના બેનામી વ્યવહારો પણ મળી આવ્યા છે. રેડ દરમિયાન ઈન્કમટેક્સ વિભાગે કુલ 39 લોકર જપ્ત કર્યા હતા. જેમાંથી 38 લોકરની તપાસ પૂર્ણ કરવામાં આવી છે, જ્યારે એક લોકરની તપાસ હજુ પણ બાકી છે.
અગાઉ પણ ચિરિપાલ ગ્રુપ અનેકવાર ચર્ચામાં આવ્યું છે
ઉલ્લેખનીય છે કે, આ અગાઉ પણ ચિરિપાલ ગ્રુપ અનેકવાર ચર્ચામાં આવ્યું છે. થોડા મહિના પહેલાં જ અમદાવાદના દાણીલીમડા વિસ્તારમાં આવેલા યોગીરાજ એસ્ટેટમાંથી ખેતીવાડી માટે વાપરવામાં આવતો સબસિડીયુક્ત યુરિયા ખાતરનો જથ્થો દાણીલીમડા પોલીસે ઝડપી પાડ્યો હતો. આ કેસમાં આરોપી અન્ય આરોપીઓ સાથે મળીને અમદાવાદની ફેક્ટરીઓ અને ચિરિપાલ ગ્રુપની વિશાલ ફેબ્રિક્સ નામની કંપનીમાં પોતાના નામની કંપનીની થેલીમાં યુરિયા ખાતરનો જથ્થો સપ્લાય કરતા હતા.
ચિરિપાલ ગ્રુપ ટેક્સટાઈલ અને કેમિકલ સેક્ટરમાં છે સક્રિય
વધુમાં અગાઉ IT વિભાગના દરોડામાં ચિરીપાલ ગ્રુપના કુલ 1 હજાર કરોડના બિનહિસાબી વહેવારો ઝડપાયા હતા. આ દરોડામાં 24 કરોડની બિનહિસાબી રોકડ મળી આવી હતી અને દરોડામાં કુલ 20 કરોડના દાગીના મળી આવ્યા હતા. અત્રે જણાવી દઇએ કે, ચિરિપાલ ગ્રુપ એ ટેક્સટાઈલ અને કેમિકલ સેક્ટરમાં સક્રિય છે.
