તપાસ / ખેડાના તબેલામાં પોલીસની સાથે અમૂલની રેડ: 20 જ પશુ છતાં દરરોજ જમા થતું હતું હજારો લિટર દૂધ, જાણો હવે શું થશે

• ખેડામાં રુદન ગામ પાસે તબેલા પર અમૂલની રેડ
• રુદન ખાત્રજ રોડ પર તબેલા પર અમૂલની રેડ
• દૂધની તપાસ FSLના રિપોર્ટ આવ્યા બાદ કરવામાં આવશે

 ખેડામાં રૂદન ગામ પાસે તબેલા પર અમૂલ ડેરીમાંથી ત્યાંના કર્મચારીઓ દ્વારા રેડ કરવામાં આવી હતી.  રૂદન-ખાત્રજ રોડ પર આવેલા તબેલા પર અમૂલના અધિકારીઓ દ્વારા રેડ કરવામાં આવી હતી.  તબેલા પર માત્ર 20 પશુઓ હતા અને રોજનું હજારો લીટ દૂધ ભરાવવામાં આવતું હતું. જેથી અમૂલ ડેરીનાં કર્મચારીઓએ પોલીસને સાથે રાખી તપાસ હાથ ધરી હતી.  એલસીબી તેમજ મહેમદાવાદ પોલીસે રેડ પાડી હતી. ત્યારે ડુપ્લીકેટ દૂધ બનાવતા હોવાની બાતમી મળી હતી.

દૂધને તપાસ અર્થે FSL માં મોકલવામાં આવ્યું
આ બાબતે અમૂલના કર્મચારીઓએ જણાવ્યું હતું કે 20 જેટલા પશુઓનું દૂધ 120 લીટર જેટલું થતું હોય છે.  ત્યારે હાલ તો દૂધ ભરેલ ટેન્કરને સીલ કરી જપ્ત કરાયું છે. દૂધને તપાસ અર્થે FSLમાં મોકલવામાં આવ્યું છે.  ત્યારે FSL રિપોર્ટ આવ્યા બાદ આગળની કાર્યવાહિ હાથ ધરવામાં આવશે. દૂધને જપ્ત કરી કાર્યવાહિ હાથ ધરવામાં આવી છે. ત્યારે આટલું બધું દૂધ ક્યાંથી આવે છે તેની પણ તપાસ કરવામાં આવશે.

દૂધનાં સેમ્પલ લઈ લેબોરેટરીમાં ચેક કરશુંઃર્ડા.યોગેશ પટેલ
અમૂલના ર્ડા. યોગેશ પટેલે જણાવ્યું હતું કે બે દિવસ પહેલા અરજી મળી હતી કે રૂદન ગામ પાસે આવેલ તબેલા પણ પશુઓ ઓછા છે અને દૂધ તેઓ વધારે ભરાવે છે. જેની આજે તપાસ હાથ ધરવામાં આવી છે. આ બાબતે અમે માલિકની પૂછપરછ કરતા તેઓએ કહ્યું હતું કે અમારે ગાંધીનગર બાજુ પણ તબેલો છે. જેથી અમે બીજું દૂધ ત્યાંથી આવે છે.  અમે દૂધનાં સેમ્પલ લઈ દૂધને લેબોરેટરીમાં ચેક કરશું.