BIG BREAKING / અમિત ચાવડા બન્યા ગુજરાત વિધાનસભાના વિપક્ષ નેતા, ઉપનેતા તરીકે કોના નામ પર વાગી મહોર

• ગુજરાત કોંગ્રેસ દ્વારા કરાઈ સૌથી મોટી જાહેરાત 
• કોંગ્રેસના અમિત ચાવડાના શિરે વિપક્ષ નેતાનો તાજ
• ધારાસભ્ય શૈલેષ પરમારને ઉપનેતા બનાવાયા

તાજેતરમાં યોજાયેલી ગુજરાત વિધાનસભાની ચૂંટણીમાં ભાજપે અત્યાર સુધીના તમામ રેકોર્ડ તોડીને ઐતિહાસિક જીત મેળવી હતી. તો બીજુ 2017માં 77 સીટો જીતેલી કોંગ્રેસને આ વખતે એટલે કે 2022માં 17 સીટો જ મળી છે. જ્યારે આમ આદમી પાર્ટીને 5 સીટ તેમજ અન્યને ફાળે 4 સીટ(3 અપક્ષ અને 1 સમાજવાદી પાર્ટી) આવી છે. ભૂપેન્દ્ર પટેલ ફરી મુખ્યમંત્રીની ખુરશી પર બિરાજમાન થયા છે, તેમની સરકારના મંત્રીઓએ પણ કાર્યભાર સંભાળી લીધો છે. ત્યારે ગુજરાત વિધાનસભામાં વિપક્ષના પદ સંદર્ભે મોટા સમાચાર સામે આવ્યા છે. 

કોંગ્રેસે જાહેર કર્યું વિપક્ષ નેતાનું નામ
છેલ્લા ઘણા સમયથી જેની રાહ જોવાઈ રહી હતી, તેની આજે જાહેરાત કરી દેવામાં આવી છે. કોંગ્રેસ દ્વારા વિપક્ષ નેતાનું નામ જાહેર કરી દેવામાં આવ્યું છે. ગુજરાત વિધાનસભામાં વિપક્ષ નેતા તરીકે અમિત ચાવડાની પસંદગી કરવામાં આવી છે. જ્યારે ધારાસભ્ય શૈલેષ પરમારને ઉપનેતા બનાવાયા છે. શૈલેષ પરમાર દાણીલીમડાના કોંગ્રેસના ધારાસભ્ય છે. જ્યારે અમિત ચાવડા આંકલાવના ધારાસભ્ય છે. 

આંકલાવ બેઠક પરથી બાજી મારી ગયા હતા અમિત ચાવડા
તાજેતરમાં યોજાયેલી ગુજરાત વિધાનસભાની ચૂંટણીમાં કોંગ્રેસનો ગઢ માનવામાં આવતી આણંદ જિલ્લાની આંકલાવ બેઠક પર અમિત ચાવડાની ફરી જીત થઈ હતી. આ બેઠક પર કોંગ્રેસે ફરી અમિત ચાવડાને રિપીટ કર્યા હતા અને લોકોએ ફરી ફરી કોંગ્રેસના આ ઉમેદવારને જ પસંદ કર્યા.

કોંગ્રેસનો ગઢ કહેવાય છે આંકલાવ બેઠક
ગુજરાત કોંગ્રેસ કમિટીના પૂર્વ પ્રમુખ અમિત ચાવડા આ બેઠક પરથી ચૂંટણી લડી રહ્યા હોવાથી આ બેઠક પર દરેકની નજર હતી. વાસ્તવમાં આંકલાવ વિધાનસભા બેઠકની રચના વર્ષ 2012માં નવા સીમાંકન બાદ કરવામાં આવી હતી.  આ બેઠક પર વર્ષ 2012થી જ કોંગ્રેસનો દબદબો જોવા મળ્યો છે એટલે આ બેઠકને કોંગ્રેસનો ગઢ કહી શકાય છે. 

2012, 2027 અને 2022માં જીત્યા અમિત ચાવડા
આંકલાવ બેઠકના અસ્તિત્વ બાદથી કોંગ્રેસના અમિત ચાવડા ચૂંટાતા આવ્યા છે. 2017માં તેઓ 34 હજાર મતોની સરસાઈથી જીત્યા હતા. તો વર્ષ 2012માં કોંગ્રેસના અમિત ચાવડાએ ભાજપના ઉમેદવાર અમરસિંહ સોલંકીને 20 હજારથી વધુ મતોના તફાવતથી હરાવ્યા હતા. જ્યારે આ વખતે 2022માં તેમણે ભાજપના ગુલાબસિંહ પઢીયાર અને આમ આદમી પાર્ટીના ગજેન્દ્રસિંહને હરાવ્યા હતા. 

કોણ છે અમિત ચાવડા?
- અમિત ચાવડા પ્રદેશ કોંગ્રેસના પૂર્વ પ્રમુખ રહી ચૂક્યા છે   
- આંકલાવના વર્તમાન ધારાસભ્ય છે
- તેઓ બોરસદ બેઠક પર પણ ધારાસભ્ય રહ્યા છે
- શ્રેષ્ઠ યુવા ધારાસભ્યનો એવોર્ડ પ્રાપ્ત થયો છે 
- આણંદ યુથ કોંગ્રેસના પૂર્વ પ્રમુખ
- વિધાનસભામાં અનેક કમિટિઓના સભ્ય રહ્યા
- આંકલાવ APMCના પૂર્વ ચેરમેન
- ગુજરાત સ્ટેટ કો.ઓપરેટિવ બેન્ક અમદવાદના પૂર્વ ડાયરેક્ટ
- KDCC બેન્ક નડિયાદમાં પૂર્વ ડાયરેક્ટર
- આણંદ ડિસ્ટ્રીક્ટ કો.ઓપરેટિવ સંઘના પૂર્વ ડાયરેક્ટર