ફરિયાદ / મહેસાણાની યુવતી પર એમેઝોનના ડિલિવરી બોયનો હુમલો, ઝપાઝપીમાં પિતા પણ ઇજાગ્રસ્ત, કારણ ચોંકાવનારું

• એમેઝોન ડિલિવરી બોય સામે ફરિયાદ
• રસીદ માંગતા યુવતીનું ગળુ દબાવ્યું
• બચાવમાં વચ્ચે પડેલા પિતાને પણ માર્યો માર

મહેસાણામાં એમેઝોનના ડિલિવરી બોયની દાદાગીરી સામે આવી છે. ડિલિવરી બોયે યુવતી અને તેના પિતા પર હુમલો કરતા શહેરના એ ડિવિઝન પોલીસ મથકે ફરિયાદ નોંધાઈ છે. હાલ પોલીસે ડિલિવરી બોયને ઝડપી પાડવાની તજવીજ હાથ ધરી છે. 

40 રૂપિયાની રસીદ માંગતા જ ડિલિવરી બોય ઉશ્કેરાઈ
મહેસાણાના એ ડિવિઝન પોલીસ સ્ટેશનમાં નોંધાવવામાં આવેલી ફરિયાદ અનુસાર, મહેસાણા શહેરમાં આવેલી કૃષ્ણ પાર્ક સોસાયટીમાં રહેતી એક યુવતીએ એમેઝોનમાંથી કેટલીક વસ્તુઓ ઓર્ડર કરી હતી. જેની ડિલિવરી કરવા માટે વિજય પરમાર નામનો ડિલિવરી બોય કૃષ્ણ પાર્ક સોસાયટી ખાતે પહોંચ્યો હતા. જે દરમિયાન યુવતીએ ડિલિવરી બોય પાસે 40 રૂપિયાની રસીદ માંગતા જ ડિલિવરી બોય ઉશ્કેરાઈ ગયો હતો અને યુવતી પર હુમલો કર્યો હતો. 

યુવતીના પિતાના હાથમાં ઈજા
આ ડિલિવરી બોયે યુવતીનું ગળુ દબાવ્યું હતું, તો યુવતીને બચાવવા વચ્ચે પડેલા તેના પિતાને પણ માર માર્યો હતો. ઝપાઝપીમાં યુવતીના પિતાના હાથમાં ઈજા થઈ હતી. જે બાદ આસપાસના લોકો એકઠા થઈ જતા ડિલિવરી બોય ત્યાંથી નાસી છુટ્યો હતો. આ ઘટના બાદ યુવતી અને તેના પિતા સીધા પોલીસ સ્ટેશન ખાતે પહોંચ્યા હતા. મહેસાણા એ ડિવિઝન પોલીસ સ્ટેશન ખાતે યુવતીએ ડિલિવરી બોય વિજય પરમાર સામે હત્યાના પ્રયાસની ફરિયાદ નોંધાવી હતી.