- દિવાળી બાદ અમદાવાદમાં હવાનું પ્રદૂષણ વધ્યું
- અમદાવાદના મોટાભાગના વિસ્તારોની હવા અશુદ્ધ
- અમદાવાદના રખિયાલ અને ગ્યાસપુરમાં સૌથી ખરાબ હવા
પ્રદૂષણએ દેશની સૌથી મોટી સળગતી સમસ્યા છે અને તેમના ઉકેલ અંગે દૂર દૂર સુધી કોઈ ચોક્કસ ઉપાય ન દેખાય તેવી સ્થિતિ છે. તેમાં પણ દિવાળીના તહેવાર બાદ અમદાવાદના વાતાવરણમાં જાણે ઝેર ભળી ગયું હોય તેમ પ્રદૂષણમાં ચિંતાજનક વધારો નોંધાયો છે. જેનો ઉપાય શોધવા તમામ સ્તરે મથામણ થઈ રહી છે.
ગ્યાસપુર અને રખિયાલમાં AQI 148 પર પહોંચ્યો
દિવાળી બાદ અમદાવાદમાં વાયુ પોલ્યુશનનું પ્રમાણ વધી ગયું છે. અમદાવાદના મોટાભાગના વિસ્તારોમાં હવા અશુદ્ધ હોવાનું સત્તાવાર આંકડા પરથી ચિત્ર ઊભું થયું છે. એક બાજુ ફેક્ટરીઓના કેમિકલ- ધુમાડાથી હવા અશુદ્ધ બની રહી છે. તેવામાં હવે ફટાકડા કારણે વાયુ પોલ્યુશન વધતા ચિંતા બેવડાઈ છે.
શહેરના પોશ વિસ્તાર સેટેલાઇટ અને મણિનગરની હવા પણ પ્રદૂષિત
વિસ્તાર વાર વાત કરવામાં આવે તો અમદાવાદના રખિયાલ અને ગ્યાસપુરમાં સૌથી ખરાબ હવાનું બહાર આવ્યું છે. જ્યારે ગ્યાસપુરમાં 148 AQI, રખિયાલમાં 148 AQI પહોંચ્યું છે. બીજી બાજુ અમદાવાદના પોશ વિસ્તાર સેટેલાઇટ અને મણિનગરમાં પણ પોલ્યુશન વધ્યું છે. સેટેલાઇટમાં AQI 110 અને મણિનગરમાં AQI આંક 151 પર અટક્યો છે. વધુમાં સરદાર પટેલ સ્ટેડિયમ ખાતે 130 AQI નોંધાયો, જ્યારે અમદાવાદની ઓવરઓલ હવા 134 AQI છે. . આ એર ક્વોલિટી ઇન્ડેક્સ બતાવી રહ્યો છે કે શહેરોમાં પ્રદૂષણની માત્રા વધી છે. જેના કારણે બાળકોમાં, વૃદ્ધોમાં, અસ્થમાના રોગોનું પ્રમાણ વધે છે. તેમજ સ્વચ્છ હવા ન મળવાને કારણે સ્વાસ્થ્ય પણ જોખમાય છે.
દિવાળીમાં નાના બાળકોથી લઈને મોટા સૌ કોઈ ફટાકડા ફોડવાની મજા લેતા હોય છે, પરતું તેને ખ્યાલ સુદ્ધા પણ નથી આવતો કે આ ફડાકડામાં રહેલા ઝેરી તત્વો હવામા ભળે છે, ઝેરી વાયુ, ઝેરી ધૂમાડો, કાર્બન ડાયોક્સાઈનું પ્રમાણ વાતાવરણમાં વધારી દે છે તેના કારણે વાયુ પ્રદુષણનું જોખમ હાલ વધી ગયું છે. અમદાવાદમાં મોટા ભાગમાં હવાની માત્રા હાનિકારક છે. પીરાણા જેવા વિસ્તાર ડેન્ઝર ઝોનની નજીક સરકી રહ્યા છે. એ દિવસો દૂર નથી કે અમદાવાદ પણ દિલ્હીની જેમ જ પ્રદૂષણનું હબ બની જશે.
