ચોંકાવનારો ઘટસ્ફોટ / લો બોલો! ટોલટેક્સથી બચવા આરોપી બની ગયો નાયબ મામલતદાર, વલસાડ અને અમદાવાદમાં હતો વોન્ટેડ

• અનેક ગુનામાં નાસતાફરતા આરોપીની ધરપકડ
• ટોલ ટોક્સના પૈસા બચાવવા બન્યા નકલી નાયબ મામલતદાર
• અંગજડતી કરતા ખીસ્સામાંથી મળી આવ્યા બે આઈકાર્ડ

Ahmedabad News: PMO, CMO, NIA, CBI, ક્રાઈમ બ્રાન્ચ, ED તેમજ વિવિધ સરકારી એજન્સીઓના બોગસ અધિકારી બનીને તોડપાણી કરતા ગઠિયાઓનો આતંક દિવસેને દિવસે વધી રહ્યો છે. ગઈકાલે સ્પેશિયલ ઓપરેશન ગ્રુપની ટીમે વોન્ટેડ આરોપીને પકડ્યો ત્યારે એક ચોંકાવનારો ઘટસ્ફોટ થયો હતો. આરોપી પાસેથી ગવર્નમેન્ટ ઓફ ગુજરાત રેવન્યુ ડિપાર્ટમેન્ટના નાયબ મામલતદારનું આઈડી કાર્ડ મળી આવ્યું હતું. ટોલનાકા પર રૂપિયા ન ભરવા પડે તે માટે આરોપીએ નાયબ મામલતદારનું કાર્ડ બનાવી લીધું હતું. આરોપી વલસાડ તેમજ અમદાવાદ ગ્રામ્યના પોલીસ સ્ટેશનના અનેક ગુનામાં વોન્ટેડ હતો. SOGના હાથમાં બગાસું ખાતા પતાસું આવી ગયું હોય તેવો ઘાટ ઘડાયો છે.

એસઓજીની ટીમને મળી હતી બાતમી
SOGની ટીમને બાતમી મળી હતી કે ઘોડાસર વિસ્તારમાં આવેલા એમ્પાયર હાઈટ્સમાં રહેતા અને મૂળ અરવલ્લી જિલ્લાના કિરીટ અમીન વિરુદ્ધ વલસાડના ધરમપુર પોલીસ સ્ટેશનમાં તેમજ અમદાવાદ ગ્રામ્યના પોલીસ સ્ટેશનમાં સંખ્યાબંધ ગુના દાખલ થયા છે, તે ઓઢવ રિંગરોડ પર ઊભો છે. તમામ ગુનામાં કિરીટ વોન્ટેડ હોવાથી એસઓજીની ટીમ તેને પકડવા માટે ઓઢવ પહોંચી હતી, જ્યાં તેને કોર્ડન કરી લીધો હતો. કિરીટની અંગજડતી કરતા તેની પાસેથી ગવર્નમેન્ટ ઓફ ગુજરાત રેવન્યુ  ડિપાર્ટમેન્ટના નાયબ મામલતદારનું આઈડીકાર્ડ મળી આવ્યું હતું. 

અનેક ગુનામાં વોન્ટેડ હતો કિરીટ
કિરીટ પોતે નાયબ મામલતદાર હોવાનો રોફ મારતો હતો અને જ્યારે ટોલટેક્સ આવે ત્યારે તે કાર્ડનો દુરુપયોગ કરતો હતો. કિરીટ મોડાસામાં આવેલી મામલતદાર કચેરીમાં જ્યારે ક્લાર્ક તરીકે નોકરી કરતો હતો, ત્યારે તેણે નાયબ મામલતદારનું કાર્ડ બનાવ્યું હતું. SOG ટીમ દ્વારા કિરીટ અમીનની ધરપકડ કરી તેને વડી કચેરીએ લાવવામાં આવ્યો હતો. જ્યાં તેની આગવી પૂછપરછ પણ થઈ હતી. કિરીટ અમીન ઘણા ગુનાઓમાં વોન્ટેડ હતો. કિરીટ અમીન વિરુદ્ધ છેતરપિંડી સહિત ધાકધમકીના અનેક ગુના દાખલ છે. 

અંગજડતી કરતા ફૂટ્યો ભાંડો
SOGની ટીમને પણ ખ્યાલ હતો નહીં કે કિરીટ અમીન નાયબ મામલતદાર બનીને ફરી રહ્યો છે. જ્યારે જેની અંગજડતી કરી ત્યારે તેનો ભાંડો ફૂટ્યો હતો. કિરીટ અમીન પાસે એક નહીં, બે નાયબ મામલતદારના કાર્ડ મળી આવ્યા હતા. જેના આધારે તે કેટલાક ગેરકાયદેસર કામ કરતો હોવાનું પણ પ્રાથમિક તપાસમાં સામે આવ્યું છે. કિરીટ અમીને નાયબ મામલતદાર બનીને લોકો પાસેથી પૈસા પડાવ્યા છે કે નહીં તે દિશામાં હાલ એસઓજીએ તપાસ શરૂ કરી છે.