નિર્ણય / અગ્નિવીરો માટે ચારેયકોરથી નોકરીની લ્હાણીઓ, બનાસડેરીના ચેરમેન શંકર ચૌધરીએ કરી મોટી જાહેરાત

• બનાસડેરીનો અગ્નિવીર યુવાનોની પડખે
• "અગ્નિવીર યુવાનોને આપશે તાલીમ અને માર્ગદર્શન"
• "નોકરીના 4 વર્ષ બાદ મળશે નોકરીની તક"

એક તરફ દેશના ઘણા રાજ્યોમાં અગ્નિવીર યોજનાનો વિરોધ થઈ રહ્યો છે. યુવાનો નોકરીના 25 વર્ષ બાદ શું કરશે તેના પર વિપક્ષ સવાલ ઉઠાવી રહ્યું છે. તેને લઈને સરકાર દ્વારા પણ ફેરફાર કરી સ્પષ્ટતા કરવામાં આવી છે. બીજી તરફ નાના મોટા ઉદ્યોગો પણ અગ્નિવીરો માટે નોકરી જાહેરાત કરી રહ્યા છે ત્યારે અગ્નિવીરને લઈને બનાસડેરીના ચેરમેન શંકર ચૌધરીએ મહત્વની જાહેરાત કરતાં કહ્યું છે કે બનાસડેરી અગ્નિવીર યુવાનો માટે તાલીમ કેમ્પનું આયોજન કરશે. આ કેમ્પમાં અગ્નિવીર યુવાનોને તાલીમ અને માર્ગદર્શન પુરૂ પાડવામાં આવશે તેમજ આર્મીની નોકરીના 4 વર્ષ બાદ બનાસડેરી યુવાનોને નોકરીની તકમાં પહેલી પ્રાથમિકતા આપશે તેવો નિર્ણય પણ આજે મળેલી બેઠકમાં લેવામાં આવ્યો છે.

આર્મીની અંદર જે ગ્રેડ પર હોય તેનાથી એક સ્ટેપ વધારાનું આપી નોકરી પર રાખીશું: શંકર ચૌધરી
વધુમાં શંકર ચૌધરીએ કહ્યું કે ડેરીની અંદર અમારે 21થી 22 વર્ષની ઉંમરના લોકોની ભરતી કરી જ રહ્યા છીએ. પણ અગ્નિવીર યોજનાના સ્કિલ યુવાનો 4 વર્ષ પછી બનાસડેરીમાં કામ કરવાનું પસંદ કરશે તો અમે આવકારીએ છીએ. અમે આર્મીની અંદર જે ગ્રેડ પર હોય તેનાથી એક ગ્રેડ વધુ આપી તેમની આવડતનો ઉપયોગ બનાસડેરીમાં કરી નોકરી આપીશું. 

CREDAI રિયલ એસ્ટેટમાં દર વર્ષે 3000 અગ્નિવીરોને આપશે નોકરી
એક તરફ દેશભરમાં અગ્નિપથ યોજનાનો વિરોધ કરવામાં આવી રહ્યો છે તો બીજી તરફ ક્રેડાઇ ગુજરાત દ્વારા મહત્વનો નિર્ણય લેવામાં આવ્યો છે. ગુજરાત સ્થિત ડેવલપર્સે કેન્દ્ર સરકારની અગ્નિપથ યોજનાને આવકારી છે. CREDAI (Confederation of Real Estate Developers’ Associations of India), ગુજરાત ચેપ્ટર, દર વર્ષે રિયલ એસ્ટેટ ક્ષેત્રમાં અગ્નિવીરોને  3,000 નોકરીઓ પ્રદાન કરવાનું વચન આપ્યું છે. 

CREDAIના હોદ્દેદારોની રાજ્ય સરકાર સાથે મળી હતી બેઠક 
CREDAIના હોદ્દેદારોએ ગુજરાતના સીએમ ભૂપેન્દ્ર પટેલ, પ્રદેશ ભાજપ પ્રમુખ સી આર પાટીલ અને રાજ્યના ગૃહમંત્રી હર્ષ સંઘવી સાથે બેઠક યોજી હતી અને અગ્નિપથ યોજના વિશે વિગતો મેળવી હતી. CREDAI ગુજરાતના પ્રમુખ અજય પટેલે જણાવ્યું હતું કે, “અમે કેન્દ્ર સરકાર દ્વારા શરૂ કરાયેલી અગ્નિપથ યોજનાને આવકારીએ છીએ. અમારી સેના શિસ્ત અને સમર્પણ માટે જાણીતી છે અને તે દર વર્ષે 50,000 યુવાનોને શારીરિક અને કૌશલ્યની તાલીમ આપશે. ઉપરાંત, સરકાર આ યુવાનોને ચાર વર્ષની તાલીમ દરમિયાન આકર્ષક પેકેજ આપશે અને તેઓને અગ્નવીર ગ્રેજ્યુએટ ડિગ્રી મળશે.

3000 અગ્નિવીરોને રોજગાર, 50,000 યુવાનોને ટ્રેનિંગ 
તેમણે કહ્યું કે CREDAI ગુજરાત ગુજરાતના રિયલ એસ્ટેટ ક્ષેત્રમાં દર વર્ષે 3,000 અગ્નિવીરોને રોજગાર આપશે. “CREDAIના સમગ્ર ભારતમાં 26 રાજ્ય પ્રકરણો છે અને CREDAI ગુજરાતની ટીમ આ તમામ પ્રકરણોને આ યોજના સમજાવશે અને અમે પ્રયાસ કરીશું કે ભારતનું રિયલ એસ્ટેટ ક્ષેત્ર દર વર્ષે 30,000 અગ્નિવીરોને કાયમી રોજગારી આપે. સરકારે આ યોજના રજૂ કર્યા પછી, સંખ્યાબંધ સરકારી વિભાગો અને ખાનગી ક્ષેત્રની કંપનીઓએ અગ્નિવીર માટે નોકરીઓની જાહેરાત કરી છે.