બેની ધરપકડ / નશો કર્યો પછી ભિક્ષા મંગાવવા બાળકીનું અપહરણ, અમદાવાદમાં ચાર વર્ષની બાળકી ગુમ થવાના કેસમાં ચોંકાવનારા ખુલાસા

• સરખેજમાં ચાર વર્ષની બાળકી ગુમ થવાનો મામલો
• બાળકીના ગુમ થવાની ઘટનાના CCTV આવ્યા સામે
• પોલીસે બન્ને આરોપીને હળવદથી કરી ધરપકડ

સરખેજમાં ભીખ મંગાવવા 4 વર્ષની બાળકીનું અપહરણ કરનાર સાળા બનેવીની પોલીસે કરી ધરપકડ કરી છે. આરોપીએ પોલીસના ડરથી બાળકીને બિનવારસી મૂકી ફરાર થઈ ગયા હતા. પોલીસે CCTV અને બાતમીના આધારે સાળા બનેવીને ઝડપી લીધા છે. 

પોલીસે CCTV ફૂટેજનાં આધારે અપહરણનો ભેદ ઉકેલ્યો
પોલીસે આરોપી અરવિદ ચૌહાણ અને સરમન વાઘેલાની ધરપકડ કરી છે.  જેમણે ગરીબ પરિવારની 4 વર્ષની બાળકીનું સાણંદ બ્રિજ નજીકથી અપહરણ કર્યું હતું. પરંતુ પોલીસનો ડર લાગતા વિરમગામ નજીક બિનવારસી મૂકીને ફરાર થઇ ગયા. ઘટનાની વાત કરીએ તો 4 વર્ષની બાળકીનું સાણંદ બ્રિજ નજીકથી આરોપીઓ અપહરણ કરીને રિક્ષામાં લઈ ગયા હતા. બાળકીના પિતાએ સરખેજ પોલીસ સ્ટેશનમાં ફરિયાદ નોંધાઇ હતી. પોલીસે તપાસ કરતા બાળકી બિનવારસી હાલત માં વિરમગામ નજીકથી મળી આવી હતી. બાળકીના અપહરણની તપાસ કરતા ફૂટપાથ પર રહેતા બન્ને આરોપી અરવિંદ ચૌહાણ અને સરમન વાઘેલા ગુમ હતા. જેથી પોલીસે CCTV ફૂટેજ અને બાતમીના આધારે બંને પકડતા અપહરણનો ભેદ ઉકેલાયો હતા. બન્ને દારૂના નશામાં બાળકીનું અપહરણ કર્યું હોવાનું ખુલ્યું હતું.

બાળકીને ભીખ મંગાવવાના ઈરાદે આરોપીઓ અપહરણ કરી લઈ ગયા
પકડાયેલ આરોપી અરવિંદ ચૌહાણ અને સરમન વાઘેલા સાળા બનેવી થાય છે. આરોપી અરવિંદ કચ્છનો રહેવાસી છે. જ્યારે સરમન મોરબીનો રહેવાસી છે. તેઓ સાવણી બનાવવાના ધંધા માટે અમદાવાદ આવ્યા હતા. સરખેજ નજીક ફૂટપાથ પર રહીને તેઓ સાવણી બનાવીને વેચવાનો ધંધો કરતા હતા. આ બાળકી પણ પોતાના પરિવાર સાથે ફૂટપાથ નજીક રહેતી હતી. બાળકીને ભીખ મંગાવવાના ઇરાદે બંને આરોપી નશામાં બાળકીને લઈ ગયા હતા. પરંતુ પોલીસના ડરથી બાળકીને સલામત છોડી દીધી હતી. સરખેજ પોલીસે અપહરણ કેસમાં સાળા બનેવી વિરુદ્ધ ગુનો નોંધી ધરપકડ કરી છે. 

ઝડપાયેલા બંને આરોપીઓની પોલીસે પૂછપરછ હાથ ધરી
સરખેજ પોલીસે અપહરણ કેસમાં પકડેલા બન્ને આરોપીની પૂછપરછ શરૂ કરી છે. આ બાળકીના અપહરણ  પાછળ હ્યુમન ટ્રાફિકિંગ, ભીખ મંગાવવા કે અન્ય કોઈ અદાવતની શંકાને લઈને વધુ તપાસ શરૂ કરી છે.