- કાશી વિશ્વનાથ મંદિરમાં મંગળા આરતીને લઈ મોટા સમાચાર
- મંગળા આરતી માટે ભક્તોએ હવે વધુ કિંમત ચૂકવવી પડશે
- 1 માર્ચથી મંગળા આરતી સહિત તમામ આરતીઓના ભાવમાં વધારો
- મંગળા આરતી માટે ભક્તોએ 150 રૂપિયા વધુ ચૂકવવા પડશે
ઉત્તર પ્રદેશના વારાણસીમાં પ્રસિદ્ધ કાશી વિશ્વનાથ મંદિરમાં મંગળા આરતીને લઈ એક મોટા સમાચાર સામે આવ્યા છે. વાત જાણે એમ છે કે, કાશી વિશ્વનાથ મંદિરમાં મંગળા આરતી માટે ભક્તોએ હવે વધુ કિંમત ચૂકવવી પડશે. આજથી એટલે કે 1 માર્ચથી મંગળા આરતી સહિત તમામ આરતીઓના ભાવમાં વધારો થયો છે. મંગળા આરતી માટે ભક્તોએ 150 રૂપિયા વધુ ચૂકવવા પડશે. એટલે કે, હવે 350ના બદલે 500 રૂપિયા ચૂકવવા પડશે.
વારાણસીમાં પ્રસિદ્ધ કાશી વિશ્વનાથ મંદિરમાં સપ્ત ઋષિ આરતી, શ્રૃંગાર ભોગ આરતી અને મધ્યાહન ભોગ આરતીની ટિકિટના ભાવમાં 120 રૂપિયાનો વધારો કરવામાં આવ્યો છે. આ આરતીઓ માટે 180ને બદલે 300 રૂપિયા આપવા પડશે. આ પહેલા વર્ષ 2018માં એટલે કે, 5 વર્ષ પહેલા મંગળા આરતીની ટિકિટના ભાવમાં 100 રૂપિયાનો વધારો કરવામાં આવ્યો હતો. ટિકિટના વધેલા દર આજથી લાગુ થશે.
બેઠકમાં લેવાયો મોટો નિર્ણય
આ નિર્ણય તાજેતરમાં વારાણસીના મંડલયુક્ત ઓડિટોરિયમ ખાતે કાશી વિશ્વનાથ મંદિર ટ્રસ્ટ કાઉન્સિલની 104મી બોર્ડ બેઠકમાં લેવામાં આવ્યો હતો. બેઠક દરમિયાન ટિકિટના ભાવમાં વધારો કરવાની મંજૂરી આપવામાં આવી હતી. આ બેઠકમાં એ પણ નક્કી કરવામાં આવ્યું હતું કે, મંદિરનું પોતાનું ધાર્મિક અને સાંસ્કૃતિક કેલેન્ડર હશે અને પૂજારીઓ હવે એક પ્રકારના ડ્રેસ કોડમાં જોવા મળશે.
તો શું આ માટે કરાયો ભાવવધારો ?
વિગતો મુજબ મંદિરમાં ભક્તોની ભીડને જોતા બોર્ડે ટિકિટના ભાવમાં વધારો કરવાનો નિર્ણય લીધો છે. ટ્રસ્ટે એવો મુદ્દો ઉઠાવ્યો હતો કે, મૈદગીન અને ગોદૌલિયા ખાતે વાહનો રોકવાના કારણે ભક્તોને મંદિરમાં આવવામાં ઘણી મુશ્કેલીનો સામનો કરવો પડે છે. મંદિરના પ્રમુખ પ્રો. નાગેન્દ્ર પાંડેના જણાવ્યા અનુસાર, અધિકારીઓની સાથે ટ્રસ્ટના સભ્યોની પણ મંદિરની વ્યવસ્થા સુધારવાની જવાબદારી છે, તેથી પૂજારીઓ અને અર્ચકો માટે ડ્રેસ કોડ નક્કી કરવામાં આવ્યો છે. ટ્રસ્ટ વતી પૂજારીઓને ડ્રેસના બે સેટ આપવામાં આવશે. સાથે વર્ષ દરમિયાન ધાર્મિક કાર્યક્રમો માટે કેલેન્ડર તૈયાર કરવાનો નિર્ણય લેવામાં આવ્યો છે. એક કમિટી બનાવવામાં આવી છે અને માર્ચ સુધીમાં ટ્રસ્ટની ડાયરી પ્રકાશિત કરવાનો લક્ષ્યાંક નક્કી કરવામાં આવ્યો છે.
