બેદરકારી / હવે ડ્રાઇવરોને પણ ચડ્યો Reelsનો નશો! સુરતમાં ચાલુ બસે વીડિયો કૉલ કરતા મુસાફરોના જીવ તાળવે ચોંટ્યા, જુઓ Video

• ખાનગી બસના ડ્રાઈવરની બેદરકારી
• ચાલુ બસે કરી વીડિયો કૉલમાં વાત 
• મુસાફરોના જીવ મૂક્યા જોખમમાં 

સુરતમાં ખાનગી બસના ડ્રાઈવરની બેદરકારીનો વીડિયો વાયરલ થયો છે. જેમાં બસનો ડ્રાઈવર ચાલુ બસે મોબાઈલ પર વીડિયો કોલમાં વાત કરતો કેમેરામાં કેદ થયો છે. શ્રીગણેશ ટ્રાવેલ્સના ડ્રાઈવરનો વીડિયો વાયરલ થતાં લોકોમાં રોષ ફેલાયો છે. 

રિલ્સ બનાવવાની ઘેલછામાં મુસાફરોના જીવ મૂક્યા જોખમમાં 
સોશિયલ મીડિયામાં વાયરલ થયેલા વીડિયોમાં જોવા મળી રહ્યું છે કે બસનો ડ્રાઇવર ડ્રાઇવિંગ કરતી વખતે વીડિયો કોલમાં વાત કરી રહ્યો છે. શ્રી ગણેશ ટ્રાવેલ્સના ડ્રાઇવર રાણા સોલંકીનો વીડિયો વાયરલ થયો છે. ફક્ત એટલું જ નહીં આ બસ ડ્રાઈવરના સોશિયલ મીડિયા એકાઉન્ટ પર પણ આવા ઘણા જોખમી ડ્રાઈવિંગના વીડિયો અપલોડ થયેલા છે. અત્યાર સુધી ટુ-વ્હીલર અને કારચાલકોના રિલ્સ વીડિયો સામે આવતા હતા. હવે તો મોટા વાહનોના ડ્રાઈવરોને પણ રિલ્સ બનાવવાનો નશો ચડ્યો છે. તેવું આ ડ્રાઈવરના સોશિયલ મીડિયા એકાઉન્ટને જોઈને લાગી રહ્યું છે. 

વીડિયો વાયરલ થયા બાદ લોકોમાં રોષ
ડ્રાઈવિંગ કરતી વખતે મોબાઈલ ફોન પર વાત કરવી ગુન્હો છે. અનેક લોકોએ આ વાતને લઈ દંડ પણ ભર્યો હશે. તે ઉપરાંત અકસ્માતોની સંખ્યામાં પણ વધારો જોવા મળી રહ્યો છે.  ત્યારે હાલ એક હાથમાં મોબાઈલ રાખી વીડિયો કોલમાં વાત કરતા ખાનગી બસના ડ્રાઈવરનો વીડિયો વાયરલ થયા બાદ સવાલ ઉભો થયો છે કે જો અકસ્માત સર્જાય અને કોઈ દુર્ઘટના ઘટે તો તેની જવાબદારી કોની? ચાલુ બસે વીડિયો કોલ પર વાત કરી ડ્રાઈવરે બસમાં મુસાફરી કરી રહેલા પેસેન્જરોના જીવને જોખમમાં મૂક્યા છે. ત્યારે જોવું એ રહ્યું કે ડ્રાઈવર વિરુદ્ધ કોઈ કાર્યવાહી કરાશે કે નહીં.