Bhavnagar News: ભાવનગર જિલ્લામાં સ્વિમિંગ પુલમાં ડૂબી જવાથી કિશોરનું કરુણ મૃત્યુ નીપજ્યું છે. 17 વર્ષના દીકરાની અણધારી વિદાયથી પરિવારમાં માતમ છવાયો છે.
Share
સ્વિમિંગ પુલમાં ડૂબી જતા કિશોરનું મોત
સ્વિમિંગ પુલમાં ન્હાવા ગયો હતો કિશોર
17 વર્ષીય કિશોરનું નિપજ્યું મોત
ભાવનગર શહેરમાં એક દુ:ખદ બનાવ સામે આવ્યો છે. રજાઓમાં મોજ-મસ્તી કરવા અને સ્વિમિંગ પુલમાં ન્હાવાની મજા લેવા ગયેલા કિશોરનું સ્વિમિંગ પુલમાં ગરકાવ થઈ જતા કરૂણ મોત નિપજ્યું છે. તમને જણાવી દઈએ કે, ભાવનગરના સિહોરના રમધરી ગામ પાસે આવેલા સ્વિમિંગ પુલમાં ડૂબી જવાથી 17 વર્ષીય કિશોરનું મોત નિપજ્યું હોવાનું સામે આવ્યું છે. બનાવની જાણ થતા પોલીસ દ્વારા પણ કાર્યવાહી હાથ ધરવામાં આવી છે.
File Photo
પાણીમાં ડૂબી જતાં કિશોરનું મોત નીપજ્યું
મળતી માહિતી અનુસાર, ભાવનગરના સિહોર ખાતે રહેતો 17 વર્ષીય મીત ઝલાભાઈ આલ ગઈકાલે રમધરી ગામ પાસે આવેલા સ્વિમિંગ પુલમાં મિત્રો સાથે ન્હાવા માટે ગયો હતો. આ સમયે કિશોર સ્વિમિંગ પુલમાં ડૂબી ગયો હતો. પાણીમાં ડૂબી જતાં કિશોરનું મોત નીપજ્યું હતું. આ અંગેની જાણ થતાં સિહોર પોલીસની ટીમ તાત્કાલિક સ્વિમિંગ પુલ ખાતે દોડી આવી હતી અને કિશોરના મૃતદેહને પોસ્ટમોર્ટમ અર્થે હોસ્પિટલમાં ખસેડ્યો હતો. 17 વર્ષીય દીકરાના દુઃખદ અવસાનના સમાચાર સાંભળીને પરિવારની માથે પણ શોકનું મોજુ ફરી વળ્યું છે.
વડોદરાની મહિ નદીમાં ડૂબ્યો હતો યુવક
આપને જણાવી દઈએ કે, ત્રણ દિવસ અગાઉ વડોદરામાં મહિ નદીમાં ન્હાવા ગયેલા યુવકનું ડૂબી જવાથી મોત નીપજ્યું હતું. સાવલી તાલુકાના ચારણપુરા ગામે રહેતો પ્રજ્ઞેશ સોલંકી અને તેના મિત્રો સાથે લાંછનપુરા ખાતે આવેલ મહી નદીમાં ન્હાવા ગયો હતો. આ દરમિયાન નદીના વહેતા પાણીમાં પ્રજ્ઞેશ તણાયો હતો. જે બાદ સ્થાનિક તરવૈયાઓની મદદથી યુવકના મૃતદેહને નદીમાંથી બહાર કાઢવામાં આવ્યો હતો. આ બનાવના પગલે મૃતકના પરિવારજનોમાં ભારે ગમગીની છવાઈ ગઈ હતી અને હોસ્પિટલ ખાતે સમગ્ર પરિવારે આક્રંદ કરી મૂક્યું હતું.
