આગ / વલસાડમાં મધદરિયે બોટમાં ભભૂકી ભીષણ આગ, માછીમારોના જીવ તાળવે ચોટ્યા

• વલસાડ મધદરિયે માછીમારી કરી રહેલ બોટમાં આગ
• દેવગઢ પોર્ટથી દરિયામાં 15 માઇલ દૂર બની ઘટના
• બોટમાં સવાર માછીમારોના જીવ જોખમમાં મુકાયા હતા

વલસાડમાં મધદરિયે માછીમારી કરી રહેલ બોટમાં આગ ભભૂકી ઉઠતા માછીમારોના જીવ પડીકે બંધાયા હતા. દેવગઢ પોર્ટથી દરિયામાં 15 માઇલ દૂર આગની ઘટના બનતા ભાગદોડ મચી જવા પામી હતી. જેને લઈને બોટમાં સવાર માછીમારોના જીવ જોખમમાં મુકાયા હતા. એટલું જ નહી 2 માછીમારો આગની ઝપેટમાં આવ્યા હોવાનું પણ સામે આવ્યું છે.

ઈજાગ્રસ્ત માછીમારોને દેવગઢ ખાતે સારવાર અર્થે ખસેડાયા

આગની ઘટના અંગે જાણ થતાં આસપાસમાં  માછીમારો તાત્કાલિક મદદે દોડી આવ્યા હતા. જ્યા પાણીનો મારો ચલાવી માછીમારોએ બોટમાં લાગેલી આગ પર મહામહેનતે કાબુ મેળવ્યો હતો. ત્યારબાદ દાઝી ગયેલા માછીમારોને તાત્કાલિક સારવાર માટે દેવગઢ ખાતે ખસેડવામાં આવ્યા હતા.

ગઈકાલે દ્વારકામાં ફસાઈ હતી બોટ

ઉલ્લેખનીય છે કે તાજેતરમાં બેટ દ્વારકામાં બોટ દરિયામાં ફસાઈ હોવાની ઘટના સામે આવી હતી. જેમાં સાંજના સમયે બોટ બેટથી યાત્રિકો લઈને દ્વારકા તરફ ફરી રહી હતી. ત્યારે દરિયામાં ઓટના કારણે ખૂબ જ ઓછા પાણી થઈ જવાથી બોટ રેતીમાં ફસાઈ ગઈ હતી. જેને લઈને મુસાફરો ગભરાયા હતા એ દરમિયાન પોલીસ પેટ્રોલ બોટને જોઈને લોકોએ મદદ માંગતા પેટ્રોલિંગ બોટમાં હાજર અધિકારીઓએ મદદ કરી બોટને હેમખેમ કાંઠે પહોંચાડી હતી.