સાબરકાંઠા / ભ્રષ્ટાચારની પોલ ખુલી..!, કરોડોના ખર્ચે બનેલો બ્રિજ ઉદ્ઘાટન પહેલાં જ ધોવાયો, તંત્ર કોર્ડન કરી સંતોષ માન્યો

• સાબરકાંઠામાં કરોડોના ખર્ચે બનેલો બ્રિજ ધોવાયો
• બ્રિજ ધોવાઈ જતા સ્થાનિકોમાં રોષ 
• વડાલીના હાથરવામાં દિવાલ ધરાશાયી

બિપરજોય વાવાઝોડાની આડમાં એક ભ્રષ્ટાચાર સામે આવ્યો છે. તંત્ર અને બ્રિજ કોન્ટ્રાક્ટરની મિલીભગતને કારણે સાબરકાંઠા જિલ્લામાં ઉદ્ઘાટન પહેલાં એક બ્રિજ ધોવાયો છે. નેશનલ હાઇવે પર બનેલો આ બ્રિજ ધોવાતા અનેક સવાલો ઉઠી રહ્યા છે. કરોડો રૂપિયાના ખર્ચે બનેલો બ્રિજ ધોવાઈ જતા સ્થાનિકોમાં રોષ છે. સાબરડેરી નજીક આવેલા આ બ્રિજનો એકભાગ સામાન્ય વરસાદમાં તૂટી પડતા તંત્ર દ્વારા કોર્ડન કરવામાં આવ્યું છે. 

ઠેર ઠેર પાણી ભરાયા
સાબરકાંઠાના હિંમતનગરના ગ્રામ્ય વિસ્તારોમાં મેઘ તાંડવના દ્રશ્યો જોવા મળ્યા હતા. ધનપુરા, ખેડ, બોલોન્દ્ર, હિંમતપુર સહિતના ગામોમાં ધોધમાર વરસાદ પડ્યો હતો. જ્યારે હિંમતનગર, ઇડર, વડાલી, વિજયનગર, પોશીના તાલુકામાં પણ ભારે વરસાદ પડતા ઠેર ઠેર પાણી ભરાયાના દ્રશ્યો સામે આવ્યા હતા.

ભારે પવન સાથે વરસાદ
સાબરકાંઠાના વડાલીના હાથરવા ગામમાં જૂના મકાનની એક દિવાલ ધરાશાયી થઈ છે. ભારે પવન સાથે વરસાદ વરસતા જૂનું મકાન ધરાશાયી થયું છે. સદનસીબે કોઈ જાનહાનિ થઈ નથી. તો બીજી તરફ સાબરકાંઠાના વિજયનગર ગ્રામ્ય વિસ્તારમાં છેલ્લા 12 કલાકથી ભારે પવન સાથે વરસાદ યથાવત્ છે. બાલેટા, આંતરસૂબા, દઢવાવ, પાલ સહિતના પંથકમાં વરસાદ છે.