અમેરિકા જવા નીકળેલા 9 ગુજરાતીઓ છેલ્લા 2 મહિનાથી ગાયબ થઈ ગયા છે. જેના કારણે પરિવારજનો ચિંતામાં મુકાયા છે. હાલ પ્રાંતિજ પોલીસે 2 લેભાગુ એજન્ટોની ધરપકડ કરી છે.
Share
અમેરિકાની લાલચે વધુ 9 ગુજરાતીઓ ગાયબ
અમેરિકા જવા નીકળેલા 9 ગુજરાતીઓ 2 મહિનાથી ગુમ
2 એજન્ટોના પાપે 7 યુવકો અને 2 યુવતીઓ લાપતા
પ્રાંતિજ પોલીસે 2 લેભાગુ એજન્ટોની કરી ધરપકડ
વિદેશમાં જવાની ઘેલછા ધરાવનારા યુવકો વિદેશમાં નોકરી, ડૉલરમાં પગાર, રહેવા-જમવાની અદ્યતન સુવિધા અને મોજ-જલસા મળે એવો કંઈક મત ધરાવતા હોય છે, જો કે દર વખતે હકીકત આવી જ હોય, તે જરૂરી નથી. કેટલાક એજન્ટોએ આપેલી પૈસા કમાવવાની લાલચમાં અનેક યુવાનો ફસાય છે અને અત્યાચારનો ભોગ બને છે. તાજેતરમાં અમદાવાદના નરોડાના દંપતી સાથે ખરાબ અનુભવ થયા બાદ આજે ફરી આવો જ બનાવ સામે આવ્યો છે. એજન્ટ દ્વારા અમેરિકા જવા નીકળેલા 9 ગુજરાતીઓ 2 મહિનાથી ગાયબ થઈ ગયા છે. પોલીસે દ્વારા યુવકોના પરિવારજનોની ફરિયાદના આધારે મહેસાણા અને ગાંધીનગરના બે એજન્ટોની સામે ફરિયાદ નોંધી તેઓની ધરપકડ કરી છે.
2 એજન્ટોના પાપે 9 લોકો લાપતા
અમેરિકાની લાલચે ગુજરાતના વધુ 9 લોકો ગાયબ થઈ ગયા છે. અમેરિકા જવાના મોહમાં પ્રાંતિજના વાઘપુર સહિત ગુજરાતના કુલ 7 યુવકો અને 2 યુવતીઓ લાપતા થઈ ગઈ છે. છેલ્લા 2 મહિનાથી આ તમામનો કોઈ પત્તો નથી. જેના કારણે પરિવારજનો ભારે અસમંજસમાં મુકાયા છે.
પ્રાંતિજ પોલીસે 2 લેભાગુ એજન્ટોની કરી ધરપકડ
જે બાદ આ તમામના પરિવારજનોએ પોલીસ સ્ટેશનમાં ગાંધીનગરના મહેન્દ્રભાઇ પટેલ ઉર્ફે એમ.ડી. પટેલ અને મહેસાણાના મુગનાના રહેવાસી દિવ્યેશ પટેલ નામના એજન્ટો સામે ફરિયાદ નોંધાવતા પ્રાંતિજ પોલીસે બંનેને ઝડપી પાડ્યા છે. જ્યારે અન્ય એજન્ટો ભૂગર્ભમાં ઉતરી ગયા છે. પોલીસની પ્રાથમિક તપાસમાં આ એજન્ટોએ યુવકો સાથે 70 લાખમાં ડીલ કરી પહેલા 20 લાખ લઈ લેવાયા હોવાનું સામે આવ્યું છે. યુવકો-યુવતીઓનો છેલ્લા 2 મહિનાથી કોઈ સંપર્ક ન થતાં પરિવારજનો ચિંતામાં મુકાઈ ગયા છે. હાલ પોલીસ દ્વારા આ મામલે વધુ તપાસ કરવામાં આવી છે.
