મહામારી / સુપ્રીમ કોર્ટના પાંચ જજ કોરોના પોઝિટીવ, સજાતિય લગ્ન કેસની સુનાવણી કરનાર જજ પણ સામેલ

• સુપ્રીમ કોર્ટે કોરોનાથી બચવા ભર્યાં બધા પગલાં
• તોય ઘુસી ગયો કોરોના
• પાંચ જજ નીકળ્યાં કોરોના પોઝિટીવ
• સુપ્રીમે થોડા સમય પહેલા પરિસરમાં માસ્ક બનાવ્યું હતું ફરજિયાત  

સુપ્રીમ કોર્ટે થોડા સમય પહેલા તેના પરિસરમાં માસ્ક ફરજિયાત બનાવ્યું હતું. જરુરી પગલાં લેવા છતાં પણ સુપ્રીમ તેના પરિસરમાં કોરોનાની એન્ટ્રી રોકી શકી નહોતી. 

હવે સોમવારે સજાતિય લગ્નની સુનાવણી નહીં થાય 
હવે સુપ્રીમ કોર્ટના પાંચ જજ પણ કોવિડથી સંક્રમિત હોવાના અહેવાલ છે. સૂત્રોના જણાવ્યા અનુસાર, કોવિડથી સંક્રમિત થયેલા જજોમાંથી એક ગે મેરેજ કેસની સુનાવણી માટે બનાવવામાં આવેલી બંધારણીય પીઠનો ભાગ છે. હાલમાં સુપ્રીમની પાંચ સભ્યોવાળી બંધારણીય પીઠ સજાતિય લગ્નને લઈને સુનાવણી કરી રહી છે પરંતુ હવે સોમવારે સુનાવણી નહીં થાય. 

કયા કયા જજ થયા કોરોના સંક્રમિત 
સૂત્રોના જણાવ્યા અનુસાર જસ્ટિસ સંજીવ ખન્ના, જસ્ટિસ અનિરુદ્ધ બોઝ, જસ્ટિસ એસ રવિન્દ્ર ભટ, જસ્ટિસ જેબી પારડીવાલા અને જસ્ટિસ મનોજ મિશ્રા હાલ કોવિડ-19થી પીડિત છે, જ્યારે જસ્ટિસ સૂર્યકાંત એક સપ્તાહ પહેલા કોરોનાથી સાજા થયા હતા. જસ્ટિસ એસ રવિન્દ્ર ભટ સમલૈંગિક લગ્ન કેસમાં સંવિધાન પીઠનો ભાગ છે. 

ચીફ જસ્ટીસની સીધી નજર 
સુપ્રીમ કોર્ટના વરિષ્ઠ સૂત્રોએ કહ્યું કે સીજેઆઈ ડી વાય ચંદ્રચૂડ પોતે પરિસ્થિતિ પર નજર રાખી રહ્યા છે અને તમામ જસ્ટીસના સંપર્કમાં છે. હાલની પરિસ્થિતિને જોતા તેમણે એવો પણ નિર્ણય કર્યો છે કે, સુપ્રીમ કોર્ટની કામગીરીને કોઇ પણ સંજોગોમાં અસર ન થવી જોઇએ. આ માટે રજિસ્ટ્રીને સૂચના પણ આપવામાં આવી છે. વળી, કેટલીક બેન્ચો પણ બદલવામાં આવી છે.