- સુરત સાયબર ક્રાઈમમાં ચોંકાવનારી ફરિયાદ
- નકલી પોલીસની ઓળખ આપી છેતરપિંડી
- 14.77 લાખ રૂપિયાની છેતરપિંડી કરતા ચકચાર
સુરતમાં એક ચોંકાવનારો કિસ્સો આવ્યો છે. જેમાં આરોપીઓએ પોલીસ તરીકેની ખોટી ઓળખ આપી ફરિયાદીને ડોક્યુમેન્ટનો દુરુપયોગ થવાથી કેસ થયો છે તેવું કહી ધમકાવ્યો હતો. બાદમાં 14 લાખ રૂપિયા પડાવી લીધાનું બહાર આવ્યું છે. જોકે સમગ્ર કૌભાંડ ઉઘાડું પડ્યા બાદ સુરત સાયબર ક્રાઈમેં 3 આરોપીને અમદાવાદથી ઉઠાવી લીધા છે.
વીડિયો કોલ મારફતે આપી હતી ધમકી
ટેકનોલોજીના આ યુગમા લોકો પણ હવે અપગ્રેડ થઈ રહ્યા છે. બીજી બાજુ ભેજાબાજ ગઠિયાઓ પણ અલગ અલગ રીતો અપનાવી લોકોને સાયબર ક્રાઈમના શિકાર બનાવીને લોકો પાસેથી મનફાવે તેમ નાણાં ખંખેરી રહ્યા છે. પોલીસ દ્વારા લોકોને જાગૃત કરવાના અનેક પ્રયાસો પણ કરવામાં આવી રહ્યા છે. ત્યારે સુરતમાં એક વ્યક્તિએ પોલીસમાં ચકચારી ફરિયાદ નોંધાવી હતી. જેમાં જણાવાયા અનુસાર તેમને 5 એપ્રિલ 2023ના રોજ વોટ્સએપ પર ફેડેક્ષ કુરિયર કંપનીમાંથી મેસેજ આવ્યો હતો અને ત્યારબાદ અન્ય એક નંબર પરથી વીડિયો કોલ આવ્યો હતો અને વિડીયો કોલમાં એક વ્યક્તિ પોલીસ યુનિફોર્મમાં દેખાઈ રહ્યો હતો.
સાયબર ક્રાઇમ પોલીસે 3ને ઝડપ્યા
તેની પાછળ ગોરેગાંવ પોલીસ સ્ટેશનનું બોર્ડ દેખાઈ રહ્યું હતું અને ગઠિયાઓએ પોલીસ તરીકે પોતાની ઓળખ પણ આપી હતી. બાદમાં કહ્યું કે તમારા નામથી ફેડેક્ષ કુરિયર કંપનીમાંથી એક પાર્સલ કેનેડા મોકલવામાં આવ્યું છે. જેમાં તમારા નામના ડોક્યુમેન્ટનો ઉપયોગ થયો છે અને આનાજ કારણે તમારા પર સાયબર ક્રાઇમ ઇન્કમટેક્સ અને નાર્કોટિક્સની કલમ હેઠળ અલગ અલગ પ્રકારના કેસો બનશે. જો તમારે આ કેસથી બચવું હોય તો કોર્ટમાંથી તમારે આગોતરા જામીન લેવા પડશે. તેવું જણાવ્યું હતું.
અમદાવાદના ત્રણ યુવકની ધરપકડ
પોલીસ કેસની ધમકીને પગલે ફરિયાદી ડરી ગયા હતા અને આગોતરા જામીન માટે વકીલની ફી ટ્રાન્સફર કરવી પડશે. તેવું કહી ગઠીયાઓએ વકીલની ફી પેટે ટુકડે ટુકડે 14,76,700 ટ્રાન્સફર કરાવી દીધા હતા. બાદમાં ફરિયાદીને છેતરપિંડીનું ભાન થતા સાયબર ક્રાઇમ પોલીસનો સંપર્ક કર્યો હતો. બાદમાં પોલીસે ટેકનીકલ સર્વેલન્સના આધારે તપાસ હાથ ધરી ત્રણ આરોપીની અમદાવાદ ખાતેથી ધરપકડ કરી લીધી હતી. રજા અહેમદ પઠાણ, મોહમ્મદ જાવેદ શેખ અને મોહમ્મદ આલિશ નામના આ ત્રણેય આરોપીઓ અમદાવાદના રહેવાશી છે. હાલ 8,10,200 રૂપિયાની રકમ સિઝ કરાવવામાં આવી હતી.
