- કારમાં સીટ બેલ્ટ નહીં પહેરો તો ભરવો પડશે દંડ
- અમદાવાદમાં ચાલશે 3 દિવસની સીટ બેલ્ટ ડ્રાઈવ
- ઝુંબેશમાં સીટ બેલ્ટ પહેરવા સમજાવવામાં આવશે
મંગળવારના રોજ કેન્દ્ર સરકારે કારમાં બેઠેલ દરેક વ્યક્તિ માટે સીટ બેલ્ટ બાંધવો ફરજિયાત કરી દીધો છે. જો કોઇ સીટ બેલ્ટ વિના પકડાશે તો તુરંત તેનું ચલણ કપાશે. એટલે કે તેને દંડ ભરવો પડશે. ત્યારે હવે અમદાવાદમાં પણ 3 દિવસ સુધી ટ્રાફિક પોલીસ દ્વારા સીટ બેલ્ટ ડ્રાઇવ ચલાવવામાં આવશે. જેમાં 3 દિવસની આ ઝુંબેશમાં લોકોને સીટ બેલ્ટ પહેરવા સમજાવવામાં આવશે.
સલામતી માટેનો આ નિર્ણય સારો છે: સ્થાનિક
મહત્વનું છે કે, અમદાવાદીઓએ પણ કેન્દ્ર સરકારના કારમાં પાછળની સીટ ઉપર સીટ બેલ્ટ ફરજિયાત પહેરવાના નિર્ણયને આવકાર્યો છે. સ્થાનિક લોકોનું કહેવું છે કે, 'સલામતી માટે આ નિર્ણય સારો છે.'
સાયરસ મિસ્ત્રીના મોતના કારણે અમે આ નિર્ણય લીધો: ગડકરી
ઉલ્લેખનીય છે કે, કેન્દ્રીય માર્ગ અને પરિવહન મંત્રી નીતિન ગડકરીએ મંગળવારના રોજ મીડિયા ઇવેન્ટને સંબોધિત કરતા જણાવ્યું હતું કે, 'હવેથી કારમાં બેઠેલા તમામ લોકોએ સીટ બેલ્ટ ફરજિયાત પહેરવો રહેશે. સાયરસ મિસ્ત્રીના મોત બાદ ગઇકાલે કેન્દ્ર સરકારે બેકસીટ યાત્રીઓની સુરક્ષા માટે મોટો નિર્ણય લીધો હતો. એટલે કે હવેથી કારમાં પાછળની સીટ માટે પણ સીટ બેલ્ટ જરૂરી છે. મીડિયા કાર્યક્રમને સંબોધિત કરતા તેઓએ કહ્યું હતું કે, "એક કાર અકસ્માતમાં સાયરસ મિસ્ત્રીના મોતના કારણે અમે આ નિર્ણય લીધો છે કે વાહનોમાં પાછળની સીટ માટે પણ સીટ બેલ્ટ બીપ સિસ્ટમ હશે.'
વધુમાં નીતિન ગડકરીએ જણાવ્યું કે, 'સરકાર વ્હિકલ નિર્માતાઓ માટે પાછળની સીટો માટે પણ સીટ બેલ્ટ એલાર્મ સિસ્ટમ મૂકવી ફરજિયાત બનાવવાની યોજના બનાવી રહી છે. હાલમાં તમામ વાહન ઉત્પાદકો માટે માત્ર આગળની સીટના મુસાફરો માટે જ સીટ બેલ્ટ રિમાઇન્ડર આપવાનું ફરજિયાત છે.'
3 દિવસની અંદર ઓર્ડર બહાર પાડવામાં આવશે
આ મુદ્દે નીતિન ગડકરીએ ભારપૂર્વક જણાવ્યું હતું કે, આ નિયમનો ભંગ કરનારાઓ અને આ નિયમનો ભંગ કરનારાઓને દંડની સજા કરવામાં આવશે. સીટ બેલ્ટ ન હોવા બદલ ચલણ (શિક્ષાત્મક દંડ) ને મંજૂરી આપવામાં આવશે. આ આદેશનો અમલ 3 દિવસની અંદર કરાવવામાં આવશે.
સાયરસ મિસ્ત્રીનું પણ સીટ બેલ્ટ ન બાંધવાના કારણે મૃત્યુ થયાનું અનુમાન
ઉલ્લેખનીય છે કે, મુંબઈ-અમદાવાદ હાઈવે પર ટાટા સન્સના પૂર્વ ચેરમેન સાયરસ મિસ્ત્રીનું કાર અકસ્માતમાં મૃત્યુ થયું હતું. તેઓની કાર મુંબઈ નજીક ડિવાઈડર સાથે અથડાતા ગંભીર અકસ્માત સર્જાયો હતો. ત્યારે પ્રાથમિક તપાસમાં પોલીસ અકસ્માતનું કારણ ઓવરસ્પીડ અને રોંગ સાઇડથી ઓવરટેક હોવાનું માની રહી છે. એવું પણ કહેવામાં આવી રહ્યું છે કે, પાછળ બેસેલા સાયરસ મિસ્ત્રીએ સીટ બેલ્ટ ન હોતો બાંધ્યો.
જાણો શું છે હાલનો નિયમ?
કેન્દ્રીય મોટર વાહન નિયમ (1989)ની કલમ 138(3) અનુસાર કારમાં સીટ બેલ્ટ આપવામાં આવી છે. અને તે દરેક કાર ચાલકે ખાસ કરીને આગળની સીટ પર બેઠેલી વ્યક્તિએ સીટ બેલ્ટ લગાડવો જરૂરી છે. સાથે જ 5 સીટર કારમાં પાછળ બેસતા લોકોને સીટ બેલ્ટ પહેરવો જરૂરી છે. તો 7 સીટર કારમાં પાછળ બેઠલા યાત્રિકોના ફેસ સામે બાજુ છે, તેમાં કાર ચાલતી હોય ત્યારે બેલ્ટ લગાડવો જરૂરી છે.
