સાવધાન! / કલોલમાં કોલેરાના વધુ 15 કેસની એન્ટ્રી, કુલ આંકડો 100ને પાર કરતા નગરજનોમાં ફફડાટ

 

• ગાંધીનગરના કલોલમાં કોલેરાનો હાહાકાર
• વધુ 15 કેસ નોંધાતા ચિંતાનો વિષય
• કેન્દ્રીય ગૃહમંત્રીની સૂચના બાદ આરોગ્ય વિભાગ એલર્ટ

ગાંધીનગરના કલોલમાં કોલેરાએ ફરી એકવાર હાહાકાર મચાવ્યો છે. કોલેરાનો રોગચાળો ફાટી નીકળતા ગાંધીનગર કલેક્ટર દ્વારા કલોલ નગરપાલિકાનો 2 કિલોમીટરનો વિસ્તાર કોલેરાગ્રસ્ત જાહેર કરવામાં આવ્યો છે. ગાંધીનગરમાં કલોલમાં સતત પાંચમા દિવસે પણ કોલેરા બેકાબૂ બન્યો છે. કલોલમાં કોલેરાના વધુ 15 કેસ નોંધાતા ખળભળાટ મચી ગયો છે. જે બાદ કલોલમાં કોલેરાના કુલ કેસની સંખ્યા વધીને 131 થઈ ગઈ છે. હજુ પણ કલોલમાં ક્લોરિન ટેસ્ટ ચાલુ રખાયા છે. 

અમિત શાહ રાખી રહ્યા છે નજર
કલોલમાં કેલેરાની સ્થિતિ પર કેન્દ્રીય ગૃહમંત્રી અમિત શાહ પણ નજર રાખી રહ્યા છે. બે દિવસ અગાઉ અમિત શાહે આરોગ્ય મંત્રી ઋષિકેશ પટેલ સાથે ફોન પર વાતચીત કરી હતી. ગાંધીનગર લોકસભા ક્ષેત્રના સાંસદ અને કેન્દ્રીય ગૃહ તેમજ સહકાર મંત્રી અમિત શાહે ગાંધીનગર જિલ્લાના કલોલ ખાતે ઉદ્ભવેલા કોલેરાના રોગચાળાને શરૂઆતમાં જ નાથવા ત્વરિત પગલાંઓ લેવા તાકીદ કરી હતી. આ ઉપરાંત અમિત શાહે જિલ્લા કલેક્ટર સહિત સમગ્ર તંત્રને આ રોગચાળાને ત્વરિત નિયંત્રણમાં લેવા સૂચના આપી હતી.

ગાંધીનગરના કલોલમાં કોલેરાનો હાહાકાર
આપને જણાવી દઈએ કે, ગાંધીનગર જિલ્લાના કલોલમાં વરસાદી માહોલમાં કોલેરાએ માથું ઊંચક્યું છે. વિગતો મુજબ કલોલમાં કોલેરાના કુલ કેસની સંખ્યા વધીને 131 થઈ ગઈ છે. આ તરફ હવે ગાંધીનગર કલેક્ટરે નોટિફિકેશન જાહેર કરી કોલેરાગ્રસ્ત વિસ્તાર અંગે માહિતી આપી છે. જેમાં કલોલ નગરપાલિકાનો 2 કિમીનો વિસ્તાર કોલેરાગ્રસ્ત જાહેર કરાયો છે. 

કયા કયા વિસ્તારોને કોલેરાગ્રસ્ત જાહેર કરાયા 
મહત્વનું છે કે, કલેક્ટર દ્વારા જાહેર કરવામાં આવેલ નોટિફિકેશનમાં કલોલ નગરપાલિકાનો 2 કિમીનો વિસ્તાર કોલેરાગ્રસ્ત જાહેર કરાયો છે.  કલોલ શહેરના મટવાકુવા, ઝુમા મસ્જીદ, બાંગલાદેશ છાપરા, ગુલીસ્તાન પાર્ક તથા અંજુમન વાડી વિસ્તારમાં પાણીજન્ય રોગચાળો ફેલાયો છે.  જિલ્લા કલેક્ટર દ્વારા સાવચેતીના ભાગરૂપે કલોલના આ અસરગ્રસ્ત વિસ્તારના બે કિલોમીટર વિસ્તારને કોલેરાગ્રસ્ત જાહેર કરી દેવામાં આવ્યો છે. અગાઉ પણ રેલવે ફાટક વિસ્તારમાં કોલેરાના સૌથી વધુ કેસ નોંધાયા હતા. આ અગાઉ પણ કલોલના રેલવે ફાટક વિસ્તારમાં કોલેરા ફાટી નીકળ્યો હતો.