- મધ્યપ્રદેશના કલમોડામાં મળ્યું 1000 વર્ષ જૂનું શિવ મંદિર
- ખોદકામ દરમિયાન શિવલિંગ,ભગવાન વિષ્ણુની પ્રતિમા મળ્યા
- મળી આવેલું શિવ મંદિર ઉત્તરમુખી મંદિર,હજુ ખોદકામ થશે
ઉજ્જૈનનાં મહાકાલેશ્વર મંદિર બાદ હવે ઉજ્જૈન-બડનગર રોડ પર આવેલા ગામ કલમોડામાં ખોદકામ દરમિયાન 1000 વર્ષ જૂનું શિવ મંદિર મળી આવ્યું છે. પુરાતત્વ વિભાગ દ્વારા ઝીણવટપૂર્વક તપાસ હાથ ધરાઈ છે. અને મંદિરના અવશેષોની પણ દરકાર રાખવામાં આવી છે. જણાવી દઈએ કે મહાકાલેશ્વર મંદિરનાં વિસ્તૃતીકરણ દરમિયાન ખોદકામ કેટલાય મહિનાઓથી ચાલે છે.આ દરમિયાન પ્રાચીન મૂર્તિઓ અને શિવલિંગની સાથોસાથ મંદિર પણ મળ્યા છે. આવા જ એક ખોદકામ દરમિયાન 1000 વર્ષ જુનું શિવમંદિર મળી આવ્યું છે.
મંદિરનું ક્ષેત્રફળ એકદમ વિશાળ
બડનગર રોડ પર આવેલા ગામ કલમોડામાં ખોદકામ દરમિયાન એક મોટું શિવમંદિર મળ્યું છે.અહીં પુરાતત્વ વિભાગે સતત ખોદકામ શરુ કરાવ્યું છે.વિભાગના અધિકારી ડૉ.ધ્રુવેન્દ્ર જોધાએ જણાવ્યું કે, શિવ મંદિરનું ક્ષેત્રફળ એકદમ વિશાળ છે.અહીં દરરોજ 20 મજૂરો દ્વારા ખોદકામ ચાલે છે.હજુ પણ ખોદકામમાં સમય લાગી શકે છે.અગાઉ પણ આશંકા દર્શાવવામાં આવી હતી કે અહીં શિવ મંદિર અને ગર્ભ નીકળી શકે છે.
શું શું મળ્યું ?
આ રીતે સાવધાની પૂર્વક ખોદકામ કરાઈ રહ્યું છે.ખોદકામ દરમિયાન શિવલિંગ,ભગવાન વિષ્ણુની પ્રતિમા,જળકુંભ, સહીત ભગવાનના મંદિરના અવશેષ મળ્યા છે.પુરાતત્વ વિભાગનાં અધિકારીઓનાં માનવા પ્રમાણે આ મંદિર ઓછામાં ઓછું 1000 વર્ષ જૂનું છે.મંદિરના અવશેષોના પરીક્ષણ માટે કેટલાક તજ્જ્ઞને પણ બોલાવાયા છે.
ઉત્તરમુખી શિવ મંદિર મળ્યું
ઉજ્જૈનનાં પ્રસિદ્ધ જયોતિર્લિંગ મહાકાલેશ્વર મંદિર દક્ષિણમુખી જયોતિર્લિંગ છે.જો કે ઉત્તરની દિશા દેવતાઓની દિશા માનવામાં આવે છે.પુરાતત્વ વિભાગનાં માનવા મુજબ કલમોડામાં મળેલા શિવ મંદિર ઉત્તરમુખી મંદિર છે. અહીં ખોદકામ દરમિયાન વધુ મહત્વપૂર્ણ અવશેષો મળવાની સંભાવનાઓ છે. પથ્થરોના આકાર અને અવશેષ જોઈને એવો પણ દાવો થઇ રહ્યો છે કે આ મંદિર અનુભવી કારીગરો દ્વારા તૈયાર કરાયું હશે.
