- મયૂર સોલંકી
Zakir Khan ની એક ઈન્સ્ટાગ્રામ પોસ્ટ વાયરલ થઈ ગઈ. અનુષ્કા શર્મા સહિતની સેલિબ્રિટીઝે આ પોસ્ટને રિશેર પણ કરી. છે. એક વ્યથા છે આ પોસ્ટમાં. એક પ્રકારનો બળાપો. કે જે સેલિબ્રિટીને લાખો કરોડો લોકો ચાહતા હોય એમનું તો ડેડ બોડી પણ કેમેરામેન જેવા લોકો માટે કમાવાનું સાધન છે. લોકો એને માણસ નથી સમજતા પણ એમના માટે એ એક સ્ટોરી જ છે બસ.
પણ શું આ જ સચ્ચાઈ નથી? જિંદગીની? આપણા બધાની? ઝાકિર એક સારો કોમેડિયન હોવા ઉપરાંત એક સમજેલો માણસ પણ છે. શાહરુખની જેમ એ ઇન્ટવ્યુઝમાં જે કંઈ પણ બોલે એ સાંભળવાની મજા જ આવે. એમ એણે તો વાસ્તવિકતા દર્શાવતી આ પોસ્ટ શેર કરી દીધી અને બળાપો ઠાલવી દીધો. પણ એ પણ સાચું જ છે ને કે મૃત્યુ પામેલા એ સેલિબ્રિટીના કારણે કે એ સમાચારના કારણે હજારો લોકોના બાળકો સાંજે રોટી ખાવાના છે કે રમકડાં રમવાના છે. મિડિયા જેવા ફિલ્ડનાં લોકોના તો ઘર જ એનાં કારણે ચાલે છે. એમના માટે તમે એક સ્ટોરીથી વધારે કંઈ નથી. તમારો ફોટો પાડવા માટે એને જે રિવોર્ડ મળશે એમાંથી જ એ સાંજે એના બચ્ચાઓને ડિનર પર લઈ જશે ને! અને એવું નથી કે તમે સેલિબ્રિટી છો એટલાં માટે જ અને માત્ર મીડિયા માટે જ તમે એક સ્ટોરી છો. અરે ગણીને બે પાંચ માણસો સિવાય આખી દુનિયા માટે હું કે તમે માત્ર એક સ્ટોરી જ છો બસ.
આ સામાન્ય માણસોની જિંદગીમાં પણ એટલું જ લાગુ પડે છે. આપણે ધંધો નામની વસ્તુ સમજી જઈએ એ દિવસે ખબર પડી જાય કે ડોક્ટરની બૈરીને સોનાનો હાર જોઈતો હોય તો ડેન્ગ્યુની સિઝન બરાબર ચાલવી જોઈએ. કડવી પણ આ જ હકીકત છે આપણી દુનિયાની.
કોરોના કે ડેન્ગ્યુનાં એક પેશન્ટને ડોકટર જ્યારે રોજ રિપોર્ટ્સ લખી આપે ત્યારે એનાં માટે એ એક પ્રોટોકૉલ કે પાર્ટ ઓફ ટ્રીટમેન્ટ/ પ્રોફેશન છે પણ પેશન્ટના ખિસ્સા પર એ સોય એટલી ચુભતી હોય છે ને કે એ માત્ર એનું મન જાણતું હોય છે. એનાં શરીરમાંથી માત્ર બ્લડ નથી જતું. એના પરસેવાની કિંમતે ઉભી કરેલી સંપત્તિ પણ જતી હોય છે. અને રોજ શરીરમાં પંચર થાય ત્યારે નિડલ્સ ખાઈ ખાઈને ધીમે ધીમે અંદરથી માણસ હારતો જાય એ અલગ. પણ એ બધું ડોક્ટર, નર્સ કે બ્લડ લેનાર ફ્લેબો માટે તો રોજનું થયું. હોસ્પિટલમાં કોઈનું ડેથ થઈ જાય તો એ દિવસે એણે ઘરે જઈને દીકરીનો બર્થડે સેલિબ્રેટ નહીં કરવાનો?
મેં ઘણાં એવા કિસ્સા પણ જોયા છે કે જેમાં પર્સનલ લોન્સ લઈને પ્રાઇવેટ હોસ્પિટલ ખોલી દીધા પછી ન ચાલે તો યંગ ડોકટરોએ આપઘાત કરવા પડ્યા હોય. પ્રાઇવેટ પ્રેક્ટિસ કરતાં હોય એવા ફિઝીશ્યનને દિવાળી બોનસ કોઈ નથી આપવાનું. પણ એને વાયરલની સિઝન ચાલી કે નહીં એના પરથી નક્કી થવાનું છે કે આ વખતે ફેમિલી સાથે વેકેશન મનાવવા લોનાવાલા જવાશે કે કેમ! આ જ રિયાલિટી છે. માનવી હોય તો માનો નહીં તો રડયા કરો ઇમોશનનાં રોદણાં.
અને જ્યાં સુધી કોન્ટેન્ટ કે મીડિયા જેવા ફિલ્ડની વાત છે તો એ વાત સાચી જ છે કે એમને રોજ નવું લાવવાનું છે. ક્યાંથી લાવે નવું? એ જો નવું ન લાવી શકે તો એમની નોકરીઓ જતી રહે. એમના ઘરે રસોડા બંધ થઈ જાય. તમને જે રીતે પ્રડ્યુસર્સ દ્વારા કે અન્ય લોકોને સરકાર અને કંપની દ્વારા જે રીતે ટાર્ગેટ પુરા કરવા માટે આપવામાં આવે છે એમ એમને પણ ટાર્ગેટ પુરા કરવા પડે છે. સાંજ પડ્યે એમને પણ ક્લિકસ, વ્યુઝ કે હિટ્સ આપવી પડે છે અને એના માટે રોજ નવો મસાલો લાવવા માટે એમને પણ મહેનત કરવી પડે છે.
અને માનો કે ન માનો પણ તમને એ જ પીરસવામાં આવી રહ્યું છે જે મીડિયોકર પબ્લિકને કન્ઝયૂમ કરવું છે. લોકોને જેમાં રસ છે અને જે જોવું છે એ જ દુનિયાને પીરસાઈ રહ્યું છે. અને આ કંઈ તમે સેલિબ્રિટી છો એટલે જ નહીં, ગામમાંથી સ્મશાનયાત્રા નીકળે ત્યારે ત્યાં પણ રસ્તા ઉપર જે ટોળાં થઈ જાય છે એમાં બે ચારને બાદ કરતાં બીજા એકેયને ગયેલાંનું દુઃખ નથી. એ બધાને મૃતક કોણ હતો ને શું કરતો હતો ને કોના સાથે લફરું હતું એ બધી વાતો માં જ રસ હોય છે. બધાંને એ કહાનીઓમાં જ રસ પડે છે. અને આ એ જ પબ્લિક છે જેણે તમને સેલિબ્રિટી બનાવેલા. હવે એને જ ડમ્બ કહેવા હોય તો કહો.
પણ જિંદગીની આ સચ્ચાઈ નાનાંમોટાં બધા માણસોએ સ્વીકારી લેવી જોઈએ. કે ગયા પછી કોઈ નવરુ નથી તમારી પાછળ જિંદગીભર રડયા કરવા માટે. એ બરાબર પણ ન કહેવાય. અને શબવાહિનીના ડ્રાઈવરથી સ્મશાનમાં કામ કરતા માણસ સુધીનાં બધા માટે તમે એક બોડીથી વધારે કંઈ જ નથી. એ લોકોના બાળકોનાં પેટ એના કારણે જ ભરાય છે. એટલે બની શકે તો બહુ મોહ રાખ્યાં વગર ઓર્ગન ડોનેશન કે મેડિકલ કોલેજના સ્ટુડન્ટસ માટે બોડી ડોનેટ કરતાં જાઓ તો છેલ્લે છેલ્લે પણ કોઈને કામ આવી શકશો. બાકી તમે પ્રેસિડેન્ટ હોવ તોય છેલ્લે જિંદગી પલ દો પલકી કહાની હૈ બસ.
(Disclaimer : આ આર્ટિકલમાં લખાયેલા અને રજૂ કરાયેલા વિચારો અને મંતવ્યો લેખકના પોતાના અંગત છે. VTVGujarati.com આ વિચારો સાથે સહમત કે પ્રોત્સાહન આપતું નથી. માત્ર લેખક અને વાચકોના વિચારો રજૂ કરવાનું પ્લેટફોર્મ પૂરું પાડે છે.)
