જંગ / VIDEO : રશિયાની આ હરકત વિશ્વ જોતું રહી ગયું : ભારત સિવાયના દેશોના રાષ્ટ્રધ્વજ પોતાના રોકેટ પરથી હટાવ્યાં

• રશિયાએ તેના રોકેટ પરથી તમામ દેશોનો ધ્વજ હટાવ્યો
• એકમાત્ર ભારતનો તિરંગો રહેવા દીધો
• રશિયન અંતરિક્ષ એજન્સીએ જારી કર્યો વીડિયો

યુક્રેન સાથે યુદ્ધ છેડયા બાદ ચારેબાજુએથી રશિયાનો બહિષ્કાર જોવા મળી રહ્યો છે. આ દરમિયાન રશિયાએ તેની વિરુદ્ધમાં રહેલા દેશો પર પણ પ્રતિબંધ લગાવી દીધો છે.હવે રશિયાથી  એક વીડિયો સામે આવ્યો છે જેમાં રશિયા તેના રોકેટમાંથી કેટલાક દેશોના ધ્વજની તસવીર હટાવી રહ્યાંનું અને ભારતના તિરંગાને પણ એમને એમ રહેવા દીધાનું જોઈ શકાય છે. 

રશિયન અંતરિક્ષ એજન્સીએ જારી કર્યો વીડિયો
આ વીડિયોને રશિયન અંતરિક્ષ એજન્સી રોસકોસ્મોસના વડા દિમિત્રી રોગોજિને ટ્વીટ કર્યો છે. જાણકારી મુજબ આ વીડિયો બૈકોનૂરનો છે. તે દક્ષિણ કઝાકિસ્તાનમાં એક અંતરિક્ષ કિનારો છે, જેને રશિયાએ ભાડાપટ્ટે આપ્યો છે.દિમિત્રી રોગોઝિન દ્વારા ટ્વીટ કરવામાં આવેલા આ વીડિયોમાં સ્પેસ સ્ટેશનના સ્ટાફને અમેરિકા સહિત કેટલાક દેશોના ઝંડા ઢાંકતા બતાવવામાં આવ્યા છે. આ વીડિયોને શેર કરતા દિમિત્રી રોગોઝિને લખ્યું છે કે, "બૈકોનુરના લોન્ચર્સે માન્યું છે કે અમારા રોકેટ કેટલાક દેશોના ધ્વજ વિના વધુ સુંદર દેખાશે."

Стартовики на Байконуре решили, что без флагов некоторых стран наша ракета будет краше выглядеть. pic.twitter.com/jG1ohimNuX

— РОГОЗИН (@Rogozin) March 2, 2022

યુદ્ધ દરમિયાન રોસકોસ્મોસની વેબસાઈટને  હેકર્સે નિશાન બનાવી

યુદ્ધ દરમિયાન રોસકોસ્મોસની વેબસાઈટને પણ હેકર્સે નિશાન બનાવી હતી. જોકે આ સાયબર એટેકથી સ્પેસ સ્ટેશનનું સર્વર સુરક્ષિત હતું. આ માહિતી રશિયન અંતરિક્ષ એજન્સીના વડા દમિત્રી રોગોજિને આપી હતી.ઉલ્લેખનીય છે બ્રિટન, જાપાન, જર્મની સહિત ઘણા દેશો રશિયાની વિરુદ્ધમાં છે. દરેક વ્યક્તિએ તેના પર વિવિધ પ્રતિબંધો મૂક્યા છે.

યુદ્ધ પર ભારતનું વલણ 

આ સાથે જ ભારતે રશિયા-યુક્રેન યુદ્ધ પર તટસ્થ વલણ અપનાવ્યું છે. ભારત તરફથી પહેલા જ સ્પષ્ટ કરી દેવામાં આવ્યું છે કે અમારી પ્રાથમિકતા યુક્રેનમાં ફસાયેલા ભારતીય લોકો અને વિદ્યાર્થીઓને બહાર કાઢવાની છે. યુએનમાં ભારતના કાયમી પ્રતિનિધિ ટીએસ તિરુમૂર્તિએ કહ્યું હતું કે ભારત યુદ્ધવિરામનું સમર્થન કરે છે. સાથે જ તેમણે યુક્રેનના પાડોશી દેશોને સરહદ પાર કરવાની મંજૂરી આપવા બદલ તેમનો આભાર પણ માન્યો હતો. યુએનમાં ભારતે કહ્યું હતું કે, મતભેદોનો ઉકેલ સંવાદ અને કૂટનીતિ દ્વારા જ લાવી શકાય છે.