દિલ્હી / 6 વર્ષથી માત્ર વાતો, સમાધાન તો આવતું નથી... અમને પરિણામ જોઈએ...: પ્રદૂષણ મુદ્દે સુપ્રીમ કોર્ટે ફરી લગાવી ફટકાર

• દિલ્હીમાં હવા પ્રદૂષણને લઈ સુપ્રિમ કોર્ટમાં સુનાવણી
• સુપ્રીમ કોર્ટે દિલ્હી સરકારની ઝાટકણી કાઢી 
• 'સત્ય એ છે કે લોકો ભગવાનના ભરોષે છે'

Supreme Court On Air Pollution: દિલ્હીમાં વધી રહેલા હવા પ્રદૂષણના કેસની સુપ્રીમ કોર્ટમાં સુનાવણી હાથ ધરાઈ હતી. જે દરમિયાન સુપ્રીમ કોર્ટે દિલ્હી સરકારની ઝાટકણી કાઢી હતી. કોર્ટે કહ્યું હતું કે, તમે છેલ્લા 6 વર્ષથી સતત ચર્ચા કરી રહ્યા છો જ્યારે અમને સમસ્યાનું સમાધાન જોઈએ છે. કોર્ટે કહ્યું કે, દર વર્ષે સરકાર કોર્ટના હસ્તક્ષેપ પછી જ કંઈક કરતી જોવા મળે છે. અમે 6 વર્ષથી આ સમસ્યાની ચર્ચા કરીએ છીએ પરંતુ સમસ્યાનો ઉકેલ આવતો  નથી.

ડાંગરને બદલે બીજા કોઈ પાકને પ્રોત્સાહન આપો
કોર્ટે વધુમાં કહ્યું કે, 10 નવેમ્બર દિલ્હીમાં વરસાદ પડ્યો છે. કદાચ ભગવાને લોકોની પ્રાર્થના સાંભળી છે, આ માટે સરકારનો આભાર માની શકાય તેમ નથી. પંજાબમાં પરાળ સળગાવવાની દલીલ સાંભળીને કોર્ટે કહ્યું કે, ડાંગરની ખેતીને કારણે પંજાબમાં ભૂગર્ભ જળનું સ્તર સતત ઘટી રહ્યું છે. આપણે બીજું રણ જોવા નથી માંગતા. ત્યાં ડાંગરને બદલે બીજા કોઈ પાકને પ્રોત્સાહિત કરવું ખૂબ જ જરૂરી બન્યું છે.

'તમારો બોજ કોર્ટ પર નાખવા માંગો છો'
ઓડ-ઇવન કેસની સુનાવણી દરમિયાન કોર્ટે કહ્યું, અમે પૂછ્યું હતું કે શું કેટલાક સમય માટે અન્ય રાજ્યોમાંથી આવતી ટેક્સીઓ પર પ્રતિબંધ હોઈ શકે છે? તમે કહી રહ્યા છો કે તમે ટેક્સીઓ માટે પણ ઓડ-ઇવન લાગુ કરવા માંગો છો. આ માટે અમારા ઓર્ડરની શું જરૂર છે? તમે તમારો બોજ કોર્ટ પર નાખવા માંગો છો.

'સરકાર કંઈ કરતી નથી'
સુપ્રીમ કોર્ટે કહ્યું કે, વાહનોથી પ્રદૂષણ 17 ટકા છે. તમારા આયોજનની નોર્મલ અસર પડે છે. જો તેમ કંઈ કરવા માંગો છો કરો. જેથી આવતીકાલે સુપ્રિમ કોર્ટના આદેશથી પ્રદુષણ ઘટતું નથી તેવું ન કહો. સત્ય એ છે કે લોકો ભગવાનના ભરોષે છે. ક્યારેક પવન તેમને મદદ કરે છે તો ક્યારેક વરસાદ મદદ કરે છે પરંતુ સરકાર કંઈ કરતી નથી. સુપ્રીમ કોર્ટે દિલ્હી સરકારને પૂછ્યું કે, અમને જણાવો કે આપણે પરાળ સળગાવવા માટે કોને જવાબદાર ઠેરવવું જોઈએ? પરાળ સળગાવવાનું બંધ કરવું ખૂબ જ જરૂરી છે. આ દિશામાં કામ કરવું જોઈએ. પાકની પદ્ધતિમાં ફેરફાર કરવામાં આવવું જોઈએ