- રાજસ્થાનના રાજકારણમાં નવો નળાંક આવ્યો
- સચિન પાયલટ કોંગ્રેસ છોડી પોતાની પાર્ટી બનાવશે
- પાયલટ 11 જૂને કરી શકે છે નવી પાર્ટીની જાહેરાત
રાજસ્થાન કોંગ્રેસમાં મુખ્યમંત્રી અશોક ગેહલોત અને પૂર્વ ઉપમુખ્યમંત્રી સચિન પાયલટ વચ્ચે ચાલી રહેલ ઝઘડો હવે નવા વળાંક પર આવી ગયો છે. સચિન પાયલટે માત્ર અલગ રસ્તો અપનાવવાનું નક્કી કર્યું નથી, પરંતુ નવી પાર્ટી બનાવીને આગામી વિધાનસભાની ચૂંટણીમાં અશોક ગેહલોતને ધૂળ ચટાડવાની રણનીતિ પણ બનાવી છે. આ માટે રાજસ્થાનમાં બે રાજકીય પાર્ટીની નોંધણી કરવામાં આવી છે. એવું માનવામાં આવે છે કે 11 જૂને આમાંથી એક નામ અપનાવીને સચિન પાયલટ નવી પાર્ટીની જાહેરાત કરી શકે છે. એટલું જ નહીં સચિન પાયલટ રાજસ્થાનમાં પોતાની જમીન મજબૂત કરવા માટે રેલી કાઢવાના છે. આ માટે નવા પક્ષના સંભવિત નામના આધારે રથ તૈયાર કરવાની કામગીરી પણ શરૂ કરી દેવામાં આવી છે. સચિન પાયલટના આ નિર્ણયને કારણે ચૂંટણીના વર્ષમાંથી પસાર થઈ રહેલા રાજસ્થાનની રાજકીય હવામાં અચાનક ગરમી વધી ગઈ છે. કહેવામાં આવી રહ્યું છે કે નવા નિર્ણય સાથે પાયલટે પોતાના પ્રાદેશિક સંગઠનને મજબૂત કરવા માટે દિવસ-રાત એક કરી દીધા છે.
રાજસ્થાનમાં રજિસ્ટર્ડ બે પાર્ટી
સુત્રો પાસેથી મળતી માહિતી મુજબ રાજસ્થાનમાં બે પાર્ટીના નામ રજિસ્ટર્ડ કરવામાં આવ્યા છે. આમાંથી એક પક્ષનું નામ પ્રોગ્રેસિવ કોંગ્રેસ અને બીજી પાર્ટીનું નામ રાજ જન સંઘર્ષ પાર્ટી છે. સચિન પાયલટ આ બેમાંથી કોઈ એક નામની જાહેરાત કરી શકે છે.
નવી પાર્ટીના નામનો રથ પણ તૈયાર
પાયલટ તેમની મોટી જાહેરાત પહેલા મંદિરોની મુલાકાત લઈ રહ્યા છે. આંદોલનને આગળ લઈ જવા માટે નવા પક્ષના નામનો રથ પણ તૈયાર કરવામાં આવ્યો છે. મળતી માહિતી મુજબ તેઓ આ રથ સાથે સમગ્ર રાજસ્થાનનો પ્રવાસ કરશે. આ રથયાત્રાનો રોડ મેપ પણ તૈયાર કરવામાં આવ્યો છે. સચિન પાયલટનો પ્રવાસ મારવાડથી શરૂ થઈ શકે છે.
પાયલટ પોતાની જ સરકાર સામે મોરચો ખોલ્યો
જણાવી દઈએ કે છેલ્લા કેટલાક દિવસોથી સચિન પાયલટે પોતાની જ સરકાર વિરુદ્ધ મોરચો ખોલ્યો છે. તેમણે રાજસ્થાનમાં ભ્રષ્ટાચાર અને સરકારી ભરતી પરીક્ષાઓના પેપર લીક સામે જન સંઘર્ષ પદ યાત્રા પણ કાઢી હતી. તેઓ સતત ભ્રષ્ટાચારના આરોપમાં મુખ્યમંત્રી અશોક ગેહલોતને ઘેરી રહ્યા છે. પરંતુ ચૂંટણીના વર્ષમાં કેન્દ્રીય નેતૃત્વ અશોક ગેહલોતને હટાવીને કોઈ જોખમ લેવા માગતું નથી. આ વર્ષના અંતમાં વિધાનસભાની ચૂંટણી યોજાવાની છે અને કોંગ્રેસ અહીં ફરી પોતાની સરકાર બનાવવાની આશા રાખી રહી છે.
