- રમેશબાબુ પ્રજ્ઞાનાનંદ ચેસ વર્લ્ડ કપ 2023ના ફાઇનલમાં પંહોચ્યાં
- ભારતના યુવા ગ્રાન્ડમાસ્ટર પ્રજ્ઞાનાનંદે ફરી પોતાની પ્રતિભા દર્શાવી
- 18 વર્ષના રમેશબાબુ પ્રજ્ઞાનાનંદ 3 વર્ષની ઉંમરથી ચેસ રમતાં
FIDE Chess World Cup 2023 R Praggnanandhaa: ચેસ વર્લ્ડ કપ 2023માં સોમવારે ભારતના યુવા ગ્રાન્ડમાસ્ટર રમેશબાબુ પ્રજ્ઞાનાનંદે પોતાની પ્રતિભા દર્શાવી હતી. તેણે એ રોમાંચક મુકાબલામાં વિશ્વના ત્રીજા નંબરના ખેલાડી અમેરિકન ફેબિયાનો કારુઆનાને હરાવી ટાઇટલ મેચમાં પ્રવેશ કર્યો હતો. હવે તેનો સામનો વર્લ્ડ નંબર 1 ખેલાડી મેગ્નસ કાર્લસન સાથે થશે. 18 વર્ષના રમેશબાબુ પ્રજ્ઞાનાનંદને બાળપણથી જ આ રમતનો શોખ હતો. તેણે ત્રણ વર્ષની ઉંમરે ચેસ રમવાનું શરૂ કર્યું હતું.
બહેનને જોઈને ચેસ રમતા શીખી
રમેશબાબુપ્રજ્ઞાનાનંદનો જન્મ 10 ઓગસ્ટ 2005ના રોજ ચેન્નાઈમાં થયો હતો. બહેન વૈશાલીએ તેને ગ્રાન્ડમાસ્ટર બનાવવામાં ઘણો ફાળો આપ્યો છે. વૈશાલી પ્રખ્યાત ચેસ ખેલાડી છે. બાળપણમાં કાર્ટૂનથી દૂર રહેવા માટે માતા-પિતાએ વૈશાલીને ચેસ પર ધ્યાન આપવા કહ્યું. ધીરે-ધીરે તે તેમાં નિષ્ણાત બની ગઈ. પોતાની બહેનને જોઈને માત્ર 3 વર્ષનો રમેશ બાબુ પણ આ રમત સાથે જોડાઈ ગયો અને તેણે પોતાની બહેનને જોઈને આ રમત શીખી.
7 વર્ષની ઉંમરથી રેકોર્ડ બનાવવાનું શરૂ કર્યું
પ્રજ્ઞાનાનંદએ 2013માં વર્લ્ડ યુથ ચેસ ચેમ્પિયનશિપ અંડર-8નો ખિતાબ જીત્યો હતો. 7 વર્ષની ઉંમરે આ જીત એ તેમને FIDE માસ્ટરનું બિરુદ આપાવ્યું હતું. આ એક એક ઓપન ટાઇટલ છે જે ગ્રાન્ડમાસ્ટર અને ઇન્ટરનેશનલ માસ્ટરથી નીચે આવે છે.
આ જીતનો સિલસિલો હજુ પણ ચાલુ છે
તેની જીતનો સિલસિલો 2016માં ચાલુ રહ્યો જ્યારે તે 10 વર્ષ, 10 મહિના અને 19 દિવસની ઉંમરે ઇતિહાસમાં સૌથી નાની વયનો આંતરરાષ્ટ્રીય માસ્ટર બન્યો. બે વર્ષ પછી 12 વર્ષ, 10 મહિના અને 13 દિવસની ઉંમરે, પ્રજ્ઞાનાનંદએ રશિયન ચેસ સ્ટાર સર્ગેઈ કરજાકિન પછી સૌથી નાની ઉંમરના ગ્રાન્ડમાસ્ટર બન્યા. આ પછી તેણે ઘણી ટૂર્નામેન્ટ જીતી. ભારતના સૌથી સફળ ચેસ ખેલાડી વિશ્વનાથન આનંદે પણ ઘણી વખત તેની પ્રશંસા કરી છે.
ક્રિકેટના શોખીન છે અને સોશિયલ મીડિયાથી રહે છે દૂર
રમેશબાબુ પ્રજ્ઞાનાનંદના પિતા જણાવે છે કે ચેસ ઉપરાંત તેમના પુત્રને ક્રિકેટનો પણ ઘણો શોખ છે. રમેશ બાબુ સમયાંતરે ગ્રાઉન્ડ પર ક્રિકેટ રમવા પણ જાય છે. આજના સમયમાં જ્યાં બાળકો પણ ફોન વાપરવાના અને સોશિયલ મીડિયા પર એક્ટિવ રહેવાના શોખીન છે તો બીજી તરફ રમેશ આ બધાથી દૂર રહીને જીવનનો આનંદ માણવામાં માને છે.
