- વેરાવળ બાદ ધોરાજીમાં યોજાઈ PM મોદીની સભા
- મેધા પાટકરનું નામ લીધા વિના કર્યા આકરા પ્રહાર
- જે બહેને ગુજરાતને બદનામ કર્યું તેમના ખભે હાથ મૂક્યોઃ PM
ગુજરાત વિધાનસભાની ચૂંટણીના પ્રથમ તબક્કાના મતદાનને હવે ગણતરીના દિવસો બાકી રહ્યા છે. ત્યારે ભાજપ, કોંગ્રેસ અને આપ સહિતની પાર્ટીઓ પ્રચંડ પ્રચારમાં લાગી છે. પાર્ટીના દિગ્ગજ નેતાઓ ઉપરા ઉપરી ગુજરાતના પ્રવાસે આવી રહ્યા છે અને સભાઓ ગજવી રહ્યા છે. ગુજરાત સર કરવા વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહ મેદાનમાં ઉતર્યા છે. તો દિલ્હીના મુખ્યમંત્રી અરવિંદ કેજરીવાલ પણ આજથી ગુજરાતના ત્રણ દિવસના પ્રવાસે છે.
ધોરાજીમાં પીએમ મોદની યોજાઈ સભા
આજે વડાપ્રધાન નરેન્દ્ર મોદી હેલિકોપ્ટરથી સોમનાથ પહોંચ્યા હતા. અહીં વડાપ્રધાન નરેન્દ્ર મોદીએ સોમનાથ મહાદેવના દર્શન અને પૂજા અર્ચના કરીને સદભાવના ગ્રાઉન્ડ ખાતે જનસભાને સંબોધન કર્યું હતું. જ્યાંથી વડાપ્રધાન રાજકોટના ધોરાજી પહોંચ્યા હતા. ધોરાજીમાં સંબોધન કરતાં પીએમ મોદીએ કહ્યું, બે દાયકાના આપણાં સંયુક્ત પુરુષાર્થનું પરિણામ છે, ભાજપને જનતાના અસીમ આશીર્વાદ મળી રહ્યા છે. ગુજરાતીઓના જોમ-જુસ્સાની સાથે નિર્માણ, નિકાસ અને રોકાણના કારણે મારા ગુજરાતનો ડંકો વિશ્વભરમાં વાગી રહ્યો છે.
પંડિત નહેરુંએ શિલાન્યાસ કર્યો અને મેં ઉદ્ધાટન કર્યુંઃ PM
PM મોદીએ કહ્યું કે, માં નર્મદા માટે કેટલા બધા ડખ્ખા થયા ભાઈઓ. પંડિત જવાહલાલ નહેરુંએ સરદાર સરોવર ડેમનો શિલાન્યાસ કર્યો હતો અને આ નરેન્દ્ર મોદીએ આવીને આ ડેમનું ઉદ્ધાટન કર્યું. તમે વિચાર કરો કેટલા રૂપિયા અને કેટલા સમય બરબાદ થયો. કેવા કેવા લોકો આ નર્મદાને આડે આવ્યા હતા.
પીએમ મોદીએ કહ્યું કે, 'ગઈકાલે છાપામાં છપાયેલા કોંગ્રેસના એક નેતાનો ફોટો તમે જોયો હશે. જેમાં કોંગ્રેસના એક નેતા એક બહેનના ખભા પર હાથ મુકેલ જોવા મળી રહ્યા છે. આ નેતા, કોંગ્રેસ પાર્ટી ક્યાં મોઢે તમારી પાસે મત માંગવા આવે છે પૂછો એમને.'
પાણી ન પહોંચે એટલા માટે આંદોલનો કર્યા, ગુજરાતને બદનામ કરી નાખ્યુંઃ નરેન્દ્ર મોદી
તેમણે કહ્યું કે, 'આ નર્મદા અમારા કચ્છ-કાઠિયાવાડના લોકોને પીવાના પાણી માટે એક જ સાધન હતું, એ નર્મદાનું પાણી ત્રણ-ત્રણ દાયકા સુધી રોકી રાખ્યું. કોર્ટ-કચેરીમાં ઢસેડી ગયા, મુસીબતો ઉભી કરી અને પાણી ન પહોંચે એટલા માટે આંદોલનો કર્યા. ગુજરાતને એટલી હદે બદનામ કરી નાખ્યું કે દુનિયાભરમાંથી ગુજરાતને કોઈ પૈસા ન આપે. વર્લ્ડ બેંક ગુજરાતને પૈસા ન આપે એટલી હદે ગુજરાતને બદનામ કરી નાખ્યું.'
PMએ કહ્યું- કોંગ્રેસ મત માંગવા આવે ત્યારે પૂછજો કે ક્યાં મોઢે મત માંગવા આવ્યા છો?
પીએમ મોદીએ કહ્યું કે, 'એક બહેન કે જેઓ આ આંદોલન ચલાવી રહ્યા હતા, તેમના ખભે હાથ મુકીને કોંગ્રેસના એક નેતા પદયાત્રા કરી રહ્યા હતા. જ્યારે કોંગ્રેસ મત માંગવા આવે ત્યારે તેમને પૂછજો તમને ક્યાં મોઢે અમારી પાસે મત માંગવા આવ્યો છો? તમે લોકો નર્મદાને અટકાવાનારા લોકોના ખભે હાથ મુકીને પદયાત્રાઓ કાઢી રહ્યા છો, તમે આવનારા દિવસોમાં ગુજરાતને કેટલું બરબાદ કરવાના છો તેનું આ ઉદાહરણ છે. આવા લોકોને પૂછજો ક્યાં મોઢે મત માગો છો.'
