પ્રવાસ / વીકેન્ડમાં ફરવા જવા માટે પહોંચી જાઓ ગુજરાતના ડાંગની આ જગ્યાએ, નહીં આવે અન્ય કોઈ સ્થળની યાદ

અમદાવાદથી આશરે 370 કિમીના અંતરે આવેલો ડાંગનો આ ગાર્ડન લગભગ 24 હેક્ટરમાં ફેલાયેલો છે. તેમાં કુલ 11 ગાર્ડન છે. અહીં દુર્લભ ઔષધિઓનો ભંડાર છે. ગાર્ડનમાં ગ્રીન પ્લાન્ટ છે જે આકર્ષણનું કેન્દ્ર છે. અહીં જે વૃક્ષો છે તે હંમેશા ગ્રીન જ રહે છે. તમે અહીં આવ્યા બાદ ઠંડક અનુભવવાની સાથે ફ્રેશનેસ પણ અનુભવશો. વૃક્ષો જોઈને તમને જાણે અલગ જ કૂતુહલ અનુભવાશે. વૃક્ષોની સાથે સાથે તમે અહીં આરોગ્ય વન, બામ્બુ પ્લોટ, ટેક્ષોનોમી પ્લોટ, ડ્રાય ડેસીક્યુઅસ પ્લોટ, સ્કલ થોર્ન ફોરેસ્ટ, ડાંગ પ્લોટ, મોઇસ્ટ ડેસીક્યુઅસ પ્લોટ, ઇન્ટર પ્રિટેશન સેન્ટર અને ગ્રીન હાઉસને પણ માણી શકો છો.

ગાર્ડનમાં મળશે આ જાણકારી

૪૨ પ્રકારની જાતોનો સમાવેશ કરતા સૂકું પાનખર જંગલ પણ અહીં આવેલું છે. જેમાં ટર્મીનેલીયા, એનોગાયસીસ, ડાયોસપાયરસ સેમી કાર્પસનો સમાવેશ થયો છે. સ્ક્રબ અને કાંટાળા જંગલમાં ૧૦૧ જાતો જોવા મળે છે. રણ પ્રદેશના જંગલ વિભાગમાં કેપરીસ, ટમચીક્ષ, ટેકોમેલા, યુફોરબીયા, પેરેનીયલ ઘાચી જેવી વનસ્પતિઓ આવેલી છે. વિશ્વમાં વાંસની લગભગ ૧૦૦ જાતો છે, જેમાંથી ૨૧ જાતો ભારતમાં જોવા મળે છે. આ ૨૧ જાતોમાંથી પાંચ જાતો વઘઈના બોટનિક્લ ગાર્ડનમાં છે.

વનસ્પતિક દવાઓના વિભાગમાં અનેક એવી વનસ્પતિ છે. જે દવાઓ બનાવવાના ઉપયોગમાં લેવામાં આવે છે. પામ વિભાગમાં પામની સાત જાતો જોવા મળે છે. ઓર્કિડ મ્યુઝિયમમાં ઓર્કિડની જુદી-જુદી અનેક જાતો જોવા મળે છે. મુલાકાતીઓને ગાર્ડનની સંપૂર્ણ માહિતિ મળી રહે તે માટે વિશાળ પુસ્તકાલય બનાવાયું છે. ગુજરાતમાં મોટાભાગે દુર્લભ ગણાતા વૃક્ષો અહીં જોવા મળે છે. લગભગ 3 લાખથી પણ વધારે વૃક્ષો આ ગાર્ડનમાં જોવા મળી શકે છે. 

પ્રવાસીઓને મળે છે આ સુવિધાઓ

બોટનિકલ ગાર્ડનમાં આવનારા પ્રવાસીઓની સુવિધા માટે કેન્ટીન, ટોઇલેટ, લાઇબ્રેરી, તથા રહેવાની સગવડ પણ કરવામાં આવી છે. સંશોધનકર્તા અને પ્રવાસીઓ માટે ખાસ ગાઇડની વ્યવસ્થા પણ કરવામાં આવી છે. સ્થાનિક ડાંગીઓને રોજગારી મળી રહે તેવા આશયથી ડાંગી વસ્તુનું વેચાણ કેન્દ્ર શરૂ કરવામાં આવ્યું છે. ગાર્ડનને ડિજિટાઇઝ કરાયું છે.’ તો માણી લો આ બોટનિકલ ગાર્ડનની મજા. 

કેવી રીતે પહોંચશો.

સૌથી નજીકનું સ્ટેશન વઘઈ છે. 
નજીકનું એરપોર્ટ સુરત છે. અહીંથી તમે પ્રાઈવેટ વાહનની મદદથી પહોંચી શકો છો.
આ સિવાય તમે પોતે વાહન હાયર કરીને કે જાતે ડ્રાઈવ કરીને પણ જઈ શકો છો. 

નોંધ- તમામ તસવીરો વઘઈ બોટેનિલ ગાર્ડનની સાઈટ પરથી લેવામાં આવી છે.