ઉત્સાહ / ભારત-પાકિસ્તાનના મહામુકાબલાને લઇને રાજકોટના ગગનમાં ગૂંજ્યા ભારતની જીતના નારા, બરાબરનો જામ્યો ક્રિકેટ ફીવર

• આજે ભારત-પાકિસ્તાન વચ્ચે મેચ
• રાજકોટમાં ક્રિકેટ ફિવર જામ્યો
• રાજકોટના લોકો મેચ જોવા ઉત્સુક

એશિયા કપ અંતર્ગત આજે ભારત તેમજ પાકિસ્તાન વચ્ચે ટી-20 મુકાબલો યોજાઇ રહ્યો છે. જેને લઈ ભારત - પાકિસ્તાન સહિત સમગ્ર વિશ્વમાં ઉત્તેજના જોવા મળી રહી છે. ત્યારે રાજકોટમાં પણ બરાબરનો ક્રિકેટ ફીવર જામ્યો છે. શહેરનાં રેસકોર્સ ખાતેની ક્રિકેટ એકેડમીમાં ભાવિ ક્રિકેટરોએ તો 'જીતેગા ભાઈ જીતેગા ભારત જીતેગા'નાં નારા લગાવ્યા હતા. સાથે એકેડમીનાં કોચ કૌશિક અઢીયાએ ભારત માત્ર જીત જ નહીં મેળવે પરંતુ સારા માર્જિનથી ભવ્ય વિજય પ્રાપ્ત કરશે તેવો વિશ્વાસ વ્યક્ત કર્યો હતો. સાથે જ એકેડમીમાં તાલીમ લઈ રહેલા બાળકોએ પણ ભારતીય ખેલાડીઓ પાકિસ્તાનને ધૂળ ચાટતું કરશે તેવો વિશ્વાસ વ્યક્ત કર્યો છે. 

એકેડમીનાં બાળકોમાં ભારે ઉત્સાહ 
આ મામલે એકેડમીના કોચ કૌશિક અઢીયાએ જણાવ્યું હતું કે, ભારત-પાકિસ્તાનનાં આ મેચને લઈને છેલ્લા ઘણા દિવસોથી એકેડમીનાં બાળકોમાં ભારે ઉત્સાહ જોવા મળી રહ્યો છે. આ મેચમાં ભારતનો વિજય નિશ્ચિત છે. વિરાટ કોહલી પહેલેથી જ પાકિસ્તાન સામે હંમેશા તેનો દેખાવ ઉત્કૃષ્ટ રહ્યો છે. અને આજે પણ વિરાટ પોતાનો જાદુ ચલાવી પાકિસ્તાનનાં દાંત ખાટા કરી નાખશે. એજ રીતે બોલિંગમાં ભુવનેશ્વર કુમાર, યજુવેન્દ્ર ચહલ, રવિન્દ્ર જાડેજા સાહિતના પોતાનું ફોર્મ બતાવી પાકિસ્તાનને હરાવશે. તેમાં પણ ભારતની સારા માર્જિનથી રેકોર્ડબ્રેક જીતનો વિશ્વાસ તેમણે વ્યક્ત કર્યો છે. 

 મહિલા ક્રિકેટરએ પણ ભારતની જીતનો વિશ્વાસ વ્યક્ત કર્યો
બીજી તરફ એકેડમીનાં વિદ્યાર્થીઓએ પણ ભારતની જીતનો વિશ્વાસ વ્યક્ત કર્યો હતો. અને જણાવ્યું હતું કે, આપણા ઓપનિંગ બેટ્સમેનો જ 200 કરતા વધુ રન કરશે. સાથે જ ચહલ, જાડેજા અને ભુવનેશ્વર કુમાર જબરદસ્ત બોલિંગ કરી જીત ભારતના નામે કરશે. આ તકે મહિલા ક્રિકેટર બનવા ઇચ્છતી એંજલે કહ્યું હતું કે, આ મેચ નિહાળવા અમે ઉત્સુક છીએ. રાહુલ અને રોહિત સારું ઓપનિંગ કરશે.