નિર્ણય / 70 વર્ષ બાદ કપૂર ખાનદાનમાં નહીં મનાવાય ગણેશ ચતુર્થી, રણધીર કપૂરે જણાવ્યું આ કારણ

ગણેશ ચતુર્થીનો તહેવાર 2 સપ્ટેમ્બરથી શરૂ થઇ જશે. બોલીવુડમાં ઘણા સેલેબ પોતાના ઘરે ગણેશજીની સ્થાપના કરે છે પરંતુ દરેક લોકોની નજર કપૂર ખાનદાનના ગણેશોત્સવ પર હોય છે. છેલ્લા 70 વર્ષથી કપૂર ખાનદાનમાં ગણેશોત્સવ મનાવવાની પરંપરા ચાલતી આવી છે. આ વખતે ફેન્સ માટે ખરાબ સમાચાર છે. આ વખતે કપૂર ખાનદાનમાં 'ગણપતિ બાપા મોર્યા'નો અવાજ સાંભળવા મળશે નહીં. 

કપૂર પરિવાર આરકે સ્ટૂડિયોમાં મોટી ભવ્યતાથી આ ફંક્શન ઊજવતા હતા. હવે આરકે સ્ટૂડિયો વેચાઇ ચુક્યો છે. રણધીર કપૂરે ગણેશ  ઉત્સવને લઇને કહ્યું છે કે એમના પિતાજી રાજ કપૂરના આરકે સ્ટૂડિયોમાં ગણપતિ ઉત્સવ મનાવવાની શરૂઆત થઇ હતી અને હવે એમની પાસે એટલી મોટી પ્રોપર્ટી નથી જેની પર તેઓ ગણેશ ઉત્સવનું આયોજન એ પ્રકારે કરી શકે. 

રણધીર કપૂરે એક મીડિયાને જણાવ્યું છે કે, 'એ અમારા માટે છેલ્લું ગણેશ ચતુર્થી સેલિબ્રેશન હતું. આરકે સ્ટૂડિયો જ નથી રહ્યો...તો ક્યાં કરીશું? પપ્પાએ 70 વર્ષ પહેલા આ પરંપરા શરૂ કરી હતી અને તે ગણેશને ખૂબ પ્રેમ પણ કરતા હતા, હવે અમારી પાસે જગ્યા નથી તો અમે આરકે સ્ટૂડિયો જેવું સેલિબ્રેશન ક્યાં કરીશું. અમે બપ્પાને ખૂબ જ પ્રેમ કરીએ છીએ અને અમારી એમના પર શ્રદ્ધા પણ છે. પરંતુ મને લાગે છે કે અમે આ પરંપરાને ચાલુ રાખી શકીશું નહીં.

આરકે સ્ટૂડિયોમાં ગણેશ ચતુર્થી સેલિબ્રેશન અને હોળીનો જશ્ન ખૂબ જ ધામધૂમથી ઊજવવામાં આવે છે. આરકે સ્ટૂડિયોમાં ભયંકર આગથી ખૂબ નુકસાન થયું હતું. ત્યારબાદ એને વેચી દેવામાં આવ્યો. ગણેશ ચતુર્થી દરમિયાન આરકે સ્ટૂડિયોમાં પંડાલ લગાવવામાં આવતો હતો અને અહીંયા તમામ દિવસ લોકોની ભીડ રહેતી હતી. 

જણાવી દઇએ કે લગભગ 71 વર્ષ જૂની કપૂર ખાનદાનની આ પ્રોપર્ટી ગોદરેજ પ્રોપર્ટીઝે આ વર્ષે મે મહિનામાં ખરીદી લીધી હતી. રાજ કપૂરે લગભગ 70 વર્ષ પહેલા મુંબઇના ચેમ્બૂર વિસ્તારમાં આ વિરાસતની શરૂઆત કરી હતી. આરકે સ્ટૂડિયો 1948માં બનીને તૈયાર થયો હતો. 70 અને 80 દશકમાં આ સ્ટૂડિયોએ હિન્દી ફિલ્મ સિનેમાને લઇને બ્લોકબસ્ટર ફિલ્મો પણ આપી છે. એ દરમિયાન આ સ્ટૂડિયોને ફિલ્મ શૂટ માટે ટૉપ શૂટિંગ લોકેશનમાં ગણવામાં આવતો હતો.