ધર્મ / કમૂરતામાં પણ થઈ શકે છે આટલા સારા કામ, નહીં આવે કોઈ અડચણ

• કમૂરતામાં કેટલાક સારા કાર્યો કરવાનો બાધ નથી.
• NRI લોકો કમૂરતામાં લગ્ન કરી લે છે.
• શું કમૂરતામાં સારા કાર્યો કરવાથી પરિણામ વિપરિત મળે?

કમૂરતા ચાલી રહ્યા છે, અને આપણા સૌના મનમાં એક સામાન્ય માન્યતા એવી છે કે કમૂરતામાં કોઈ પણ સારા કામ ન થઈ શકે. પરંતુ જો આપની આસપાસ કોઈ NRI રહેતું હશે, તો તમે તેમને કમૂરતામાં લગ્ન કરતા જોયા જ હશે. હવે, આવામાં સવાલ એ છે કે જો શાસ્ત્રોમાં કમૂરતામાં સારા કાર્યો કરવાની ના પાડવામાં આવી છે, તો આ લોકો લગ્ન કરે છે કેવી રીતે?

તો આ સર્વસામાન્ય પ્રશ્નનો જવાબ મેળવવા માટે અમારી ટીમે જાણીતા શાસ્ત્રી જી ધર્મશભાઈ દવે સાથે વાતચીત કરી. શાસ્ત્રી શ્રી ધર્મેશભાઈ દવે 20 કરતા વધુ વર્ષથી કર્મકાંડ ક્ષેત્રે સક્રિય છે. તેમના કહેવા પ્રમાણે શાસ્ત્રોમાં તો કમૂરતા દરમિયાન કેટલાક શુભ કાર્યો કરવાની ના જ પાડવામાં આવી છે. પરંતુ, કમૂરતામાં કેટલાક સારા કર્યો કરવાની શાસ્ત્રોમાં પણ છૂટ અપાઈ છે. 

જેમ કે તમને જો કોઈ ગ્રહ નડતા હોય, નક્ષત્ર દોષ હોય, તો તેની શાંતિ માટેના હોમ હવન, પૂજા પાઠ કમૂરતા દરમિયાન કરી શકાય છે. જો કોઈ યુવક-યુવતીની કુંડળીમાં બે વિવાહ યોગ હોય, તો યુવતીના કુંભ વિવાહ અને યુવકના અર્ક વિવાહ પણ કમૂરતામાં કરી શકાય છે. આ ઉપરાંત માતાજી માટે થતા હવન પણ કમૂરતા દરમિયાન કરી શકાય છે.     

તો પછી NRI લોકો લગ્ન કેમ કમૂરતામાં કરે છે? તમારા મનમાં ચાલતો આ સવાલ અમે પણ શાસ્ત્રીજીને પૂછ્યો. તો તેમનું કહેવું છે કે NRI લોકોને વિદેશમાં ક્રિસમસનું વેકેશન હોય છે, તેથી તેમને થોડા સમયમાં મહત્વના કાર્યો પૂર્ણ કરવાના હોય છે. એટલે તેમના માટે વિકલ્પ નથી હોતો. આવી સ્થિતિમાં સારો દિવસ, સારું નક્ષત્ર અને સારું ચોઘડિયું જોઈને લગ્ન ગોઠવી શકાતા હોય છે. તેનાથી લગ્ન જીવનમાં કે જાતકના જીવનમાં કોઈ અડચણો આવતી નથી.

શાસ્ત્રીજી ધર્મેશભાઈનું કહેવું છે કે જો સારા મનથી, સારી ઈચ્છાશક્તિથી કોઈ પણ કાર્ય કરીએ, તો તેના પરિણામ હંમેશા શુભ જ આવે છે. એટલે હંમેશા માનસ પવિત્ર અને શુભ રાખવું.