ક્રિકેટ / ગુજરાતની ટીમમાં બૂમરાહને વધારે ઓવર ન નંખાવતા, ગુજરાતે જુઓ શું આપ્યો જવાબ?

• ગુજરાતની ટીમમાં સામેલ જસપ્રીત બૂમરાહ મેદાનમાં ના ઊતર્યો 
• પ્લેઇંગ ઈલેવનમાં બૂમરાહને સામેલ ન કરાયો
• શ્રીલંકા સામે શરૂ થઈ રહેલી ટી-20માં વાપસી કરશે બૂમરાહ

પીઠની ઈજાને કારણે લગભગ ત્રણ મહિનાથી મેદાનથી દૂર રહ્યા બાદ બૂમરાહ સુરતના લાલભાઈ કોન્ટ્રાક્ટર સ્ટેડિયમ ખાતે આજે શરૂ થયેલી ગુજરાત-કેરળ વચ્ચેની રણજી મેચથી મેદાનમાં ઊતરશે એવી આશા રાખવામાં આવી રહી હતી, પરંતુ બૂમરાહ આજની મેચ માટે મેદાનમાં ઊતર્યો નથી. શ્રીલંકા અને ઓસ્ટ્રેલિયા સામેની નિર્ધારિત ઓવરની શ્રેણી માટે ટીમ ઇન્ડિયામાં સામેલ કરાયેલો બૂમરાહ સ્પર્ધાત્મક ક્રિકેટ રમવા માટે તૈયાર હતો, પરંતુ છેલ્લી ઘડીએ બૂમરાહને લાગ્યું કે તે ફર્સ્ટ ક્લાસ ક્રિકેટમાં જાન્યુઆરી-૨૦૨૦ પહેલાં વાપસી કરવા ઇચ્છતો નથી. આ જ કારણે તેણે બીસીસીઆઈના અધ્યક્ષ સૌરવ ગાંગુલી અને સચિવ જય સાથે વાત કરી. ગાંગુલી અને જય શાહે હાલ ફક્ત નિર્ધારિત ઓવરના ક્રિકેટ પર ધ્યાન આપવા માટે કહ્યું.

શ્રીલંકા સામે શરૂ થઈ રહેલી ત્રણ મેચની ટી-20માં વાપસી કરશે બૂમરાહ

સૂત્રોના જણાવ્યા અનુસાર બીસીસીઆઇના પસંદગીકારોએ ગુજરાતના ટીમ મેનેજમેન્ટને સૂચના આપી હતી કે તેઓ બૂમરાહ પાસે દિવસની માત્ર આઠથી દસ ઓવર બોલિંગ જ કરાવે, જોકે ગુજરાતના ટીમ મેનેજમેન્ટે આ સલાહને વિનમ્રતાથી નકારી કાઢીને જણાવ્યું હતું કે એક બોલર પાસેથી દિવસમાં મહત્તમ આઠ ઓવર બોલિંગ કરાવવી ટીમ માટે ફાયદાકારક સાબિત નહીં થાય. ત્યાર બાદ સૌરવ ગાંગુલીએ પ્રોટોકોલને બાજુએ હડસેલીએ બૂમરાહને આરામ કરવાની મંજૂરી આપી હતી. હવે સ્પષ્ટ છે કે બૂમરાહ તા. 5 જાન્યુઆરીથી શ્રીલંકા સામે શરૂ થઈ રહેલી ત્રણ મેચની ટી-20 શ્રેણીથી જ મેદાનમાં વાપસી કરશે.