દરોડા / 'પુષ્પા' ફિલ્મનું મેકિંગ કરનાર પ્રોડક્શન હાઉસ પર IT ત્રાટકી, 3 માલિકોના 15 ઠેકાણા પર દરોડા, આ માહિતી ખંગોળી

• ફિલ્મ પુષ્પાને બનાવનારા પ્રોડક્શન હાઉસ પર ITના દરોડા
• પ્રોડક્શન હાઉસે ઘણી બ્લોકબસ્ટર ફિલ્મોનુ નિર્માણ કર્યુ છે
• ત્રણ માલિકોના 15 ઠેકાણા પર પાડ્યા દરોડા

પ્રોડક્શન હાઉસ મૈત્રી મૂવી મેકર્સ સામે ઈન્કમ ટેક્સ વિભાગના દરોડા 

અલ્લૂ અર્જુન અને રશ્મિકા મંદાનાની બ્લોકબસ્ટર ફિલ્મ પુષ્પાએ બૉક્સ ઑફિસ પર તાબડતોડ કમાણી કરી હતી. આ ફિલ્મના હિન્દી વર્ઝને પણ થિયેટરોમાં ધમાલ મચાવી હતી. દમદાર કમાણી બાદ હવે ફિલ્મને બનાવનારું પ્રોડક્શન હાઉસ મૈત્રી મૂવી મેકર્સ સામે ઈન્કમ ટેક્સ વિભાગે દરોડા પાડ્યા છે. આવક વેરા વિભાગને આશંકા છે કે આ પ્રોડક્શન હાઉસમાં એનઆરઆઈએ પણ પૈસા લગાવ્યાં છે. 

આવકવેરા વિભાગે આશરે 15 ઠેકાણા પર પાડ્યા દરોડા

આવકવેરા વિભાગે કંપનીના માલિકો નવીન અર્નેની, યલમંચિલી રવિશંકર અને યેરૂકુરી મોહનના આશરે 15 ઠેકાણા પર દરોડા પાડ્યા છે. આ ત્રણેય રહેઠાણો પર પણ દરોડા પાડ્યા છે. રિપોર્ટ્સમાં કહેવામાં આવ્યું છે કે આવકવેરા વિભાગના કર્મચારી અલગ-અલગ રાજ્યોમાંથી હૈદ્રાબાદ પહોંચ્યા અને સોમવારે કંપનીની ઓફિસ, માલિકોના રહેઠાણ અને અન્ય ઠેકાણા પર દરોડા પાડ્યા. 

ઘણી મોટી ફિલ્મો બનાવી ચૂક્યા છે મૈત્રી મૂવી મેકર્સ 

મહત્વનું છે કે, મૈત્રી મૂવી મેકર્સે અનેક બ્લોકબસ્ટર ફિલ્મોનુ નિર્માણ પોતાના પ્રોડક્શન હાઉસના બેનર હેઠળ કર્યુ છે. જેમાં સૌથી તાજુ માપ અલ્લૂ અર્જુનની પુષ્પાનુ છે. આ ફિલ્મના માત્ર હિન્દી વર્ઝને જ 106 કરોડ રૂપિયાથી પણ વધુનો બિઝનેસ કર્યો હતો. આ ઉપરાંત તેમની કુલ કમાણી 350 કરોડ રૂપિયાથી પણ વધુ રહી હતી. 

પુષ્પા સિવાય પણ અનેક ફિલ્મો બનાવી 

પુષ્પા સિવાય આ પ્રોડક્શન હાઉસે શ્રીમાનથુડૂ, જનતા ગૈરાજ, રંગસથલમ, ઉપ્પેના અને સરકારું વારી પાટા (એસવીપી) જેવી અનેક શાનદાર ફિલ્મો બનાવી છે. એસવીપીમાં મહેશ બાબુ જોવા મળ્યા હતા અને આ ફિલ્મે પણ બૉક્સ ઑફિસ પર સારો વેપાર કર્યો હતો.