- સુરતમાં પતિ દ્વારા પત્નીને HIV યુક્ત ઈન્જેક્શન આપવાનો મામલો
- ક્રાઇમના એપીસોડથી દુષ્રેરિત થઇ ઇન્જેકશન આપ્યાની પતિની કબૂલાત
- એપીસોડમાં પત્નીને મારવા જુદા-જુદા બિમાર પ્રાણીઓના લોહીના ઇન્જેકશન આપ્યા હતા
સુરતમાં પતિએ પત્નીને HIV યુક્ત ઈન્જેક્શન આપ્યું હોવાનો ચોંકાવનારો કિસ્સો સામે આવ્યો છે. ક્રાઈમ સિરીયલના એપિસોડથી પ્રેરાઈને પતિએ ઈન્જેક્શન આપ્યાનું કારણ સામે આવતા સનસનાટી મચી જવા પામી છે. આ મામલે પોલીસે આરોપીને દબોચી લઈ પૂછપરછ હાથ ધરતા આરોપી પતિએ કબૂલાત આપી હતી. જેમાં જણાવ્યું હતું કે પોતાને ક્રાઈમ સિરીયલના એપિસોડ જોવાની આદત હતી. આ દરમિયાન પત્નીના ચારિત્ર્ય પર શક જતા પતિએ HIV યુક્ત ઈન્જેક્શન આપી પત્નીની જિંદગી બરબાદ કરી નાખી હતી. આ ઘટનાને લઈ વિકૃત મગજના પતિ સામે ચારેકોરથી ફિટકાર વર્ષી રહ્યો છે અને આરોપીને કડકમાં કડક સજા આપવાની માંગ ઉઠી છે.
પત્નીના ચારિત્ર્ય પર આશંકા રાખી પતિએ આપ્યું હતું ઈન્જેક્શન
સુરતમાં પતિ દ્વારા પત્નીને HIV યુક્ત ઈન્જેક્શન આપવાના મામલે શહેરમાં પતિને ધિકરવામાં આવી રહ્યો છે. શંકાશીલ પતિએ પોલીસ સમક્ષ કબૂલાત કરતાં જણાવ્યું હતું કે, ક્રાઇમ સિરીયલના એપીસોડ જોવાની કુટેવ હતી. જેના પરિણામે પોતાના મગજમાં વિકૃતિ ઘર કરી ગઇ હતી અને પત્નીના ચારિત્ર્ય પર શંકા ઉભી થઇ હતી. જેથી બન્ને વચ્ચે અવારનવાર માથાકૂટ થતી હતી. આ દરમિયાન ક્રાઇમ સિરીયલથી દુષ્રેરિત થઈ HIV યુક્ત ઇન્જેકશન આપવામાં આવ્યું હતું. વધુમાં ક્રાઇમ સિરીયલના એપીસોડમાં પત્નીને મારવા જુદા-જુદા બિમાર પ્રાણીઓના લોહીના ઇન્જેકશન આપ્યા હતા.સુરતની ચોંકાવનારી ઘટનાને લઈને પોલીસે પણ તપાસનો ધમધમાટ શરૂ કર્યો હતો. અને નાનપુરાની લેબમાં પોલીસ દ્વારા વધુ તપાસ હાથ ધરવામાં આવી હતી.
