- વિશ્વમાં 1,00,000 વર્ષોમાં સૌથી વધુ વૈશ્વિક તાપમાન નોંધાયું છે
- સદીના મધ્ય સુધીમાં ગરમી સંબંધિત મૃત્યુમાં 4.7 ગણો વધારો
- ઝડપી પગલાં લેવામાં ન આવે તો માનવતાનું સ્વાસ્થ્ય ગંભીર જોખમમાં
વર્ષ 2023 એ અત્યાર સુધીનું સૌથી ગરમ વર્ષ રહ્યું છે, જેમાં વિશ્વમાં 1,00,000 વર્ષોમાં સૌથી વધુ વૈશ્વિક તાપમાન નોંધાયું છે. 2022 થી તમામ ખંડોમાં ગરમીના રેકોર્ડ તૂટી ગયા છે. આરોગ્ય અને આબોહવા પરિવર્તન પર ધ લેન્સેટ કાઉન્ટડાઉનની તાજેતરની આવૃત્તિએ આબોહવા પરિવર્તનને કારણે ભવિષ્યમાં આરોગ્ય માટે ગંભીર અને વધતા જોખમને જાહેર કર્યું છે. આ મુજબ વિશ્વમાં "સદીના મધ્ય સુધીમાં ગરમી સંબંધિત મૃત્યુમાં 4.7 ગણો વધારો" હોવાનો અંદાજ છે.
માનવતાનું સ્વાસ્થ્ય ગંભીર જોખમમાં છે
આ અહેવાલ એ પણ દર્શાવે છે કે કેવી રીતે આબોહવા પરિવર્તન આજે જીવન અને આજીવિકાને નુકસાન પહોંચાડી રહ્યું છે. 2022 માં, વ્યક્તિઓ સરેરાશ 86 દિવસ માટે આરોગ્યને નુકસાન પહોંચાડનારા ઊંચા તાપમાનના સંપર્કમાં આવ્યા હતા. અહેવાલમાં ચેતવણી આપવામાં આવી છે કે જો આબોહવા પરિવર્તનના મૂળ કારણોને પહોંચી વળવા ઊંડા અને ઝડપી પગલાં લેવામાં ન આવે તો માનવતાનું સ્વાસ્થ્ય ગંભીર જોખમમાં છે.
તાપમાનમાં 2 ડિગ્રી સેલ્સિયસનો વધારો થશે
મેગેઝિન લેન્સેટ ગરમીના કારણે થતા મૃત્યુ અંગે ચોંકાવનારો ઘટસ્ફોટ કર્યો છે. મંગળવારે પ્રકાશિત થયેલા એક સંશોધન મુજબ, જો આ સદીના અંત સુધીમાં તાપમાનમાં 2 ડિગ્રી સેલ્સિયસનો વધારો થાય છે, તો ગરમીના કારણે મૃત્યુમાં 370 ટકાનો વધારો થઈ શકે છે. આ વર્તમાન સંખ્યાના આશરે 5 ગણા હશે. જણાવી દઈએ કે લેન્સેટ ક્લાઈમેટ ચેન્જ પર 8મો રિપોર્ટ જાહેર કર્યો છે.
તાપમાનમાં વધારાને 1.5 ડિગ્રી સેલ્સિયસ સુધી સીમિત રખાઈ
રિપોર્ટ અનુસાર, ક્લાઈમેટ ચેન્જના કારણે આજે દુનિયાભરના લોકો જીવન અને આજીવિકા માટે સંઘર્ષ કરી રહ્યા છે. લંડનની એક કોલેજમાં આપેલા પોતાના નિવેદનમાં લેન્સેટ કાઉન્ટડાઉનના એક્ઝિક્યુટિવ ડિરેક્ટરે કહ્યું કે તાપમાનમાં વધારાને 1.5 ડિગ્રી સેલ્સિયસ સુધી સીમિત રાખવો જરૂરી છે, નહીં તો તેના ગંભીર પરિણામો આવી શકે છે. તેમણે કહ્યું કે આપણે ઔદ્યોગિક ઉત્પાદનને મર્યાદિત કરવું પડશે. હજુ પણ દર સેકન્ડે 1337 ટન કાર્બન ડાયોક્સાઇડ ઉત્સર્જિત થાય છે. આપણે કાર્બન ઉત્સર્જન ઘટાડવું પડશે.
ગરમીના કારણે મૃત્યુમાં 85 ટકાથી વધુનો વધારો થયો છે
રોમનેલોએ નિવેદનમાં જણાવ્યું હતું કે, આશા માટે હજી અવકાશ છે. તેઓએ અહેવાલ આપ્યો કે માનવસર્જિત આબોહવા પરિવર્તનને કારણે 1991-2000ની સરખામણીમાં 2013-2022માં 65 વર્ષથી વધુ ઉંમરના લોકોમાં ગરમીથી સંબંધિત મૃત્યુમાં 85% વધારો થયો છે. જે, જો તાપમાન યથાવત રહે તો 38%ના વધારા કરતાં ઘણું વધારે છે. વિશ્લેષણમાં દાવો કરવામાં આવ્યો છે કે 122 દેશોમાં 127 મિલિયનથી વધુ લોકોએ 1981 થી 2010ની સરખામણીમાં 2021માં ગંભીર ખાદ્ય સંકટનો સામનો કર્યો હતો.
હવામાનના કારણે જીવલેણ ચેપી રોગો ઝડપથી ફેલાયા
રિપોર્ટ અનુસાર બદલાતા હવામાનના કારણે જીવલેણ ચેપી રોગો ઝડપથી ફેલાઈ રહ્યા છે. 1982 થી દર વર્ષે વિબ્રિઓ બેક્ટેરિયાના પ્રસાર માટે ખુલ્લા દરિયાકિનારાના વિસ્તારને 329 કિમી જેટલો વધ્યો છે જે બીમારી અને મૃત્યુનું કારણ બની શકે છે. આ ફેરફારને કારણે રેકોર્ડ 1.4 અબજ લોકોને ડાયેરિયા જેવી ગંભીર બીમારીઓનું જોખમ છે.
