મહારાષ્ટ્ર / પૈસા લઈને શારીરિક સંબંધ બનાવવા એ ગુનો નથી, પણ પબ્લિક પ્લેસ પર...: મુંબઈની અદાલતનો ચુકાદો

• મુંબઈમાં સેક્સ વર્કરને સેશન્સ કોર્ટે મુક્ત કરવાનો આદેશ આપ્યો
• ફેબ્રુઆરી 2023માં દરોડામાં પકડાઇ હતી મહિલા સેક્સ વર્કર 
• કોર્ટે કહ્યું, પૈસા માટે સેક્સ કરવું એ ગુનો નથી, જો તે જાહેર સ્થળે ન કરવામાં આવે તો

મુંબઈ પોલીસ દ્વારા ફેબ્રુઆરી 2023માં દરોડામાં પકડાયેલી મહિલા સેક્સ વર્કરને સેશન્સ કોર્ટે મુક્ત કરવાનો આદેશ આપ્યો હતો. મહિલાને મુક્ત કરતાં કોર્ટે કહ્યું હતું કે, પૈસા માટે સેક્સ કરવું એ ગુનો નથી, જો તે જાહેર સ્થળે ન કરવામાં આવે તો. 

ફેબ્રુઆરી 2023માં મુંબઈ પોલીસેએક વેશ્યાલય પર દરોડો પાડ્યો હતો, જ્યાં તેઓએ સેક્સ વર્ક કરવાના આરોપમાં 34 વર્ષીય મહિલાને શોધી કાઢી હતી અને પછી તેણીને આશ્રય ગૃહમાં અટકાયતમાં લીધી હતી. હવે મહિલાની અરજી પર સેશન્સ કોર્ટે શેલ્ટર હોમને તેને મુક્ત કરવાનો આદેશ આપ્યો છે.

શું કહ્યું મુંબઈની કોર્ટે ?
મહત્વનું છે કે, મુક્તિનો આદેશ આપતી વખતે કોર્ટે કહ્યું કે, અરજદાર પુખ્ત છે અને પોલીસ રિપોર્ટ પરથી એવું લાગતું નથી કે મહિલા કોઈ જાહેર સ્થળે સેક્સ વર્ક કરતી જોવા મળી હતી. એટલા માટે પીડિત ગમે ત્યાં રહેવા અને જવા માટે સ્વતંત્ર છે.

આ તરફ રાજ્યએ આ અંગેની આશંકા વ્યક્ત કરી કે, મહિલાને શેલ્ટર હોમમાંથી બહાર જવા દેવામાં આવે તો તે ફરીથી સેક્સ વર્કમાં સામેલ થઈ શકે છે. આ દલીલ પર કોર્ટે કહ્યું કે રાજ્યને સ્ત્રી/પુરુષની સ્વતંત્રતાને માત્ર એ આધાર પર અસર કરવાનો અધિકાર નથી કે, તે ફરીથી સેક્સ વેપારની આવી કોઈપણ પ્રવૃત્તિમાં સામેલ થશે. કોર્ટે કહ્યું કે, સેક્સ વર્કરને સંભાવનાના આધારે કસ્ટડીમાં રાખવું યોગ્ય નથી.

મહિલાના અધિકારોનું ઉલ્લંઘન ન કરી શકાય: કોર્ટ
આ સાથે કોર્ટે વધુમાં કહ્યું કે, જે મહિલાને અટકાયતમાં લેવામાં આવી છે તેના બે બાળકો છે, જે સગીર છે. આવી સ્થિતિમાં બાળકોને તેમની માતાની જરૂર છે. પોલીસે પણ મહિલાને તેની મરજી વિરુદ્ધ કોર્ટમાં રાખી છે, જે તેના અધિકારોનું ઉલ્લંઘન છે. તેથી સેક્સ વર્કર અંગે સુપ્રીમ કોર્ટના નિર્દેશોના આધારે મહિલાને મુક્ત કરવાની મંજૂરી આપવામાં આવી છે.