આનંદો / કર્મચારીઓના પગારમાં એકઝાટકે 12 ટકાનો વધારો, 5 વર્ષનું એરિયર પણ મળશે, સરકારે આપી દિવાળી ગિફ્ટ

• જાહેર ક્ષેત્રની ચાર વીમા કંપનીઓના કર્મચારીઓને મળી દિવાળી ગિફ્ટ
• સરકારે પગારમાં કર્યો એકઝાટકે 12 ટકાનો વધારો
• ઓગસ્ટ 2017થી પગાર વધારો અમલી ગણાશે

ચાર મોટી સરકારી વીમા કંપનીઓમાં કામ કરતા કર્મચારીઓને સરકાર તરફથી દિવાળી ગિફ્ટ મળી છે. સરકારે ચાર વીમા કંપનીઓના કર્મચારીઓ અને અધિકારીઓના પગારમાં 12 ટકા વધારો કર્યો છે જે તેમને ઓગસ્ટ 2017ની પાછલી અસરથી મળશે. 12 ટકા વધારાને કારણે સરકારી તિજોરી પર વર્ષે 8000 કરોડનો બોજ પડશે. નાણાં મંત્રાલય દ્વારા 14 ઓક્ટોબરે જાહેર કરવામાં આવેલા ગેઝેટેડ નોટિફિકેશનમાં આ અંગેની માહિતી આપવામાં આવી છે. આ યોજનાને જનરલ ઇન્શ્યોરન્સ (અધિકારીઓના પગારધોરણ અને સેવાઓની અન્ય શરતોનું તર્કસંગતકરણ) સુધારા યોજના 2022 નામ આપવામાં આવ્યું છે.

કર્મચારીઓ અને અધિકારીઓને 5 વર્ષનું એરિયર પણ મળશે 
નાણાં મંત્રાલયના નોટિફિકેશન અનુસાર, વીમા કંપનીઓના કર્મચારીઓ અને અધિકારીઓને પાંચ વર્ષનું એરિયર પણ મળશે આ તમામ લાભ 1 ઓગસ્ટ 2017ની પાછલી અસરથી મળશે. 

આ ચાર કંપનીઓના કર્મચારીઓને મળશે પગાર વધારો 
કેન્દ્ર સરકારે ચાર કંપનીઓમાં કર્મચારીઓ અને અધિકારીઓના પગારમાં વધારો કર્યો છે. તેમાં ન્યૂ ઇન્ડિયા ઇન્સ્યોરન્સ લિમિટેડ, યુનાઇટેડ ઇન્ડિયા ઇન્સ્યોરન્સ લિમિટેડ, ઓરિએન્ટલ ઇન્સ્યોરન્સ કંપની લિમિટેડ અને નેશનલ ઇન્સ્યોરન્સ કંપની લિમિટેડનો સમાવેશ થાય છે. તેનાથી કેન્દ્ર સરકારની તિજોરી પર 8000 કરોડ રૂપિયાનો બોજો પડશે.

નિવૃત્ત કર્મચારીઓને પણ મળશે લાભ 
વેતન સુધારણા દર પાંચ વર્ષે કરવામાં આવે છે. આ વખતે આ ચાર જનરલ ઈન્સ્યોરન્સ કંપનીઓના કર્મચારીઓના વેતનમાં સુધારો કરવામાં આવ્યો છે, જે પાંચ વર્ષ મોડું થયું છે. તેમનું આગામી વેતન સુધારણા પણ ઓગસ્ટ 2022 માં બાકી છે. જો કે આ વેતન સુધારણાનો લાભ તે સમયે આ કંપનીઓની સેવામાં રહેલા નિવૃત્ત કર્મચારીઓને પણ મળશે.

પગાર વધારો કંપની અને કર્મચારીના પ્રદર્શન પર આધારિત 
પગારમાં વધારો કંપની અને કર્મચારીના પ્રદર્શન પર આધારિત રહેશે. તે વેરિયેબલ પેમાં આપવામાં આવશે. પગારવધારાને કંપનીના પ્રદર્શન સાથે જોડવાના નિર્ણય પર કર્મચારી યુનિયનો ગુસ્સે છે. તેઓએ દલીલ કરી હતી કે વેતનને કંપનીના પ્રદર્શન સાથે જોડવું અતાર્કિક છે.