- સોશિયલ મીડિયા પર કેટલાક વીડિયો વાયરલ
- કોરોનાથી જીવ ગુમાવનારા લોકોના મૃતદેહો દેખાઈ રહ્યા છે
- વીડિયોમાં હોસ્પિટલોમાં મૃતદેહોના ઢગલા સ્પષ્ટપણે જોઈ શકાય છે
ચીનમાં કોરોનાના કારણે હાહાકાર મચી ગયો છે. એક તરફ કોરોનાના કેસો દિન પ્રતિદિન વધી રહ્યા છે, તો બીજી તરફ યોગ્ય સમયે સારવાર ન મળવાને કારણે સ્થિતિ વણસી રહી છે. હજારો લોકો પોતાનો જીવ ગુમાવી રહ્યા છે અને ચીન આ આંકડાઓને હંમેશની જેમ છુપાવી રહ્યું હોય તેવું લાગી રહ્યું છે. આ વખતે સોશિયલ મીડિયા પર વાયરલ થઈ રહેલા એક વીડિયોએ ચીનનો પર્દાફાશ કર્યો છે.
WHO અને અમેરિકાએ ચીનને સાચી માહિતી બધાની સામે લાવવા કહ્યું
ચીનમાં સ્થિતિ એટલી ખરાબ થઈ ગઈ છે કે ચીનની કમ્યુનિસ્ટ પાર્ટીના વરિષ્ઠ અધિકારીઓ પણ કોરોનાનો શિકાર થતા જોવા મળી રહ્યા છે. આ તમામ માહિતી સોશિયલ મીડિયા દ્વારા લોકો સામે આવી રહી છે. આવી સ્થિતિમાં WHO અને અમેરિકાએ ચીનને સાચી માહિતી બધાની સામે લાવવા કહ્યું છે.
સોશિયલ મીડિયા પર કેટલાક વીડિયો વાયરલ
આ દરમિયાન સોશિયલ મીડિયા પર કેટલાક વીડિયો વાયરલ થઈ રહ્યા છે. જેમાં કોરોનાથી જીવ ગુમાવનાર લોકોના મૃતદેહો દેખાઈ રહ્યા છે. આ વીડિયોમાં હોસ્પિટલમાં મૃતદેહોના ઢગલા સ્પષ્ટપણે જોઈ શકાય છે. અન્ય એક વીડિયોમાં લોકો બેઈજીંગમાં અંતિમ સંસ્કારની રાહ જોતા જોવા મળે છે. તે જ સમયે એક અન્ય વીડિયો સામે આવ્યો છે. જેમાં એક મહિલા હોસ્પિટલના ઉંબરે બેઠી છે અને જીવન અને મૃત્યુની લડાઈ લડી રહી છે. આ દરમિયાન ઘણા લોકો ર્ડાક્ટરોને બોલાવતા જોવા મળે છે. પરંતું કોઈ ર્ડાક્ટર મદદ કરવા આગળ આવતું નથી. જેમાં મહિલાનુ ઘટના સ્થળે મોત નિપજ્યું હતું.
દરમિયાન, ચીન, જાપાન, દક્ષિણ કોરિયા, ફ્રાન્સ અને અમેરિકામાં કોવિડના વધતા જતા કેસોને જોતા મોદી સરકાર સક્રિય થઈ ગઈ છે. આ સંબંધમાં કેન્દ્ર સરકારે બુધવારે સમીક્ષા બેઠક યોજી હતી.
ચીનમાં કોરોનાની ગાઈડલાઈન જારી કરવામાં આવી નથીઃઅરિંદમ બાગચી
ચીનમાં સંક્રમણના કેસો વધવા સંબંધિત પ્રશ્ન પર વિદેશ મંત્રાલયના પ્રવક્તા અરિંદમ બાગચીએ પ્રેસ કોન્ફરન્સ દરમિયાન કહ્યું કે, અમે (ચીનમાં) સ્થિતિ પર નજર રાખી રહ્યા છીએ. અમે આશા રાખીએ છીએ કે સમગ્ર માનવ જાતિ રોગચાળાનો સફળતાપૂર્વક સામનો કરી શકશે. તેમણે કહ્યું કે હાલમાં ભારત અને ચીન વચ્ચે કોઈ સીધી ફ્લાઈટ નથી. બાગચીએ કહ્યું કે કોઈ એડવાઈઝરી કે ગાઈડલાઈન જારી કરવામાં આવી નથી. તેમણે કહ્યું, બેઇજિંગમાં અમારું દૂતાવાસ ઘટનાક્રમ પર નજર રાખી રહ્યું છે.
