ખળભળાટ / છોટાઉદેપુરની ક્લેક્ટર કચેરીમાં પૈસા વિના કોઈ કામ નથી થતાં: ભાજપના જ સાસંદે ગંભીર આરોપ લગાવતા હડકંપ

• ભાજપના મહિલા સાંસદનો પત્ર બન્યો ચર્ચાનો વિષય 
• ગીતાબેન રાઠવાએ પત્ર લખીને કલેક્ટર સામે ઠાલવી વ્યથા 
• 'મહેસૂલ શાખા અને જમીન માપણીમાં થાય છે ભારે ગેરરીતિ'

'છોટાઉદેપુરની કલેક્ટર કચેરીમાં પૈસા વગર કોઈ કામ થતાં જ નથી', આવો આક્ષેપ ભાજપના મહિલા સાંસદ દ્વારા કરવામાં આવતા ખળભળાટની સાથે હડકંપ મચી ગયો છે. સત્તારૂઢ પાર્ટી ભાજપના સાંસદ ગીતાબેન રાઠવાએ પત્ર લખીને ગંભીર આક્ષેપો લગાવતા છોટાઉદેપુરમાં રાજકારણ ગરમાયું છે. તેમણે પત્રમાં મહેસૂલ શાખા અને જમીન માપણીમાં ભારે ગેરરીતિ થતી હોવાની વાત કહીને કલેક્ટર બેદરકાર હોવાનું કહ્યું છે.

જમીન માપણી માટે ભારે ગેરરીતિની આવી છે ફરિયાદઃ સાંસદ 
સાંસદ ગીતાબેન રાઠવાએ છોટાઉદેપુર કલેક્ટરને પત્ર લખ્યો છે. પત્રમાં તેમણે લખ્યું છે કે છોટાઉદેપુર જિલ્લા મહેસુલ શાખા અને જમીન માપણી માટે ભારે ગેરરીતિની ફરિયાદ આવી છે. આપ બેપરવાહ હોય તેમ જણાય છે. જિલ્લાની પ્રજા આખરે ક્યાં જાય, આપ જિલ્લાના વડા છો. આપના હસ્તકની કચેરીમાં રૂપિયાની લેતી-દેતી વિના કોઈ કામ થતું નથી તેવું જણાય આવે છે. 

 
'જમીન માપણીવાળા આપે છે ઉડાવ જવાબ'
પત્રમાં લખ્યું છે કે, આપના હસ્તકની મહેસુલ શાખા દ્વારા ખેડૂત ખાતેદારોને ખેડૂત ખરાઈના દાખલા મેળવવા માટે લાખો રૂપિયાની લેતી દેતીનો આક્ષેપ એક પ્રતિષ્ઠિત નિવૃત્ત કર્મચારી જમીલખાન પઠાણ, નિવૃત્ત ફોરેસ્ટ ઓફિસર અને એક સામાન્ય ખેડૂત ખાતેદાર દ્વારા કરવામાં આવેલ છે. જેની કોપી આ સાથે સામેલ છે. આ સિવાય જમીન માપણી માટે પણ ખાતેદારોની અમોને ઘણી મૌખિક રજૂઆત મળે છે કે ઓનલાઈન અરજી કર્યા પછી પણ જમીન માપણીવાળા ઉડાવ જવાબ આપીને આવતા નથી. આપનો વહીવટી તંત્ર સાથે કોઈ તાલમેલ નથી તેમ જણાય છે. માટે સામેલ પત્રનો દિન પાંચમા નિકાલ કરીને તાત્કાલિક વહીવટી સુધારવા વિનંતી છે. 

ટોક ઓફ ધ ટાઉન બન્યો મુદ્દો
આપને જણાવી દઈએ કે સાંસદ ગીતાબેનના પત્ર બાદ આ મુદ્દો ટોક ઓફ ધ ટાઉન બન્યો છે. ત્યારે હવે જોવાનું એ રહ્યું કે સાંસદના પત્ર બાદ છોટાઉદેપુર જિલ્લાના કલેક્ટર શું કાર્યવાહી કરી છે.