મુશ્કેલી / અમદાવાદીઓ આ વાંચી લેજો નહીં તો..., શહેરના પકવાન ચાર રસ્તાથી સરખેજ તરફનો આ રોડ રહેશે બંધ, જાણો ક્યાં સુધી

• 27 મે સુધી પકવાન ચાર રસ્તાથી સરખેજ તરફનાં સર્વિસ રોડ બંધ
• ઉત્તર-પશ્ચિમ ઝોનના ઈજનેર વિભાગ દ્વારા પાણી સંબંધિત કામને લઈ સર્વિસ રોડ બંધ
• મ્યુનિ. તંત્રની લિમિટમાં આવેલા સર્વિસ રોડનો ઉપયોગ કરવાની સૂચના આપી

અમદાવાદ મ્યુનિસિપલ કોર્પોરેશન દ્વારા શહેરમાં અનેક વાર જે તે પ્રોજેક્ટનાં કામ હાથ ધરાય છે. તે વખતે કેટલાંક અનિવાર્ય કારણસર રોડનું ડાઇવર્ઝન પણ આપવું પડે છે. ઉત્તર-પશ્ચિમ ઝોનના ઈજનેર વિભાગ દ્વારા પાણી સંબંધિત એક કામને લઈ આજથી તા. ૨૭ મે સુધી પકવાન ચાર રસ્તાથી સરખેજ તરફના સર્વિસ રોડને બંધ કરવાની જાહેરાત કરાઈ છે.

સર્વિસ રોડ પર ખોદકામ કરવાની આવશ્યકતા ઊભી થઈ

ઉત્તર-પશ્ચિમ ઝોનના બોડકદેવ વોર્ડમાં ટીપી નં. ૫૦માં વોટર ડિસ્ટ્રિબ્યૂશન સ્ટેશન બની રહ્યું છે. તેને સંલગ્ન પાણીની લાઇનના નેટવર્ક પૈકી રાજપથ ક્લબ પાસે નેશનલ હાઈવેને ક્રોસ કરવા માટે પુશિંગની કામગીરી જરૂર બની છે, જોકે તેમાં ૨૨૦૦ મિ.મી. વ્યાસની સ્ટ્રોમ વોટર ડ્રેનેજ લાઇનનું નડતર આવતું હોઈ નેશનલ હાઈવેના સર્વિસ રોડ પર ખોદકામ કરવાની આવશ્યકતા ઊભી થઈ છે.
નેશનલ હાઈવેના સર્વિસ રોડ પર ખોદકામ કરવાનું હોઈ સત્તાવાળાઓએ પકવાન ચાર રસ્તાથી સરખેજ તરફ જતા નેશનલ હાઈવેના સર્વિસ રોડને આજથી તા. ૨૭ મે, ૨૦૨૩ સુધી બંધ કરવાની જાહેરાત કરી છે. તંત્રે આ સર્વિસ રોડને બંધ કરીને લોકો માટે મ્યુનિ. તંત્રની લિમિટમાં આવેલા સર્વિસ રોડનો ઉપયોગ કરવાની સૂચના આપી છે.