માણસાઈ / આફતમાં પણ પ્રસરી ઉઠી માનવતાની મહેક, પુરગ્રસ્ત નવસારી માટે મદદનો હાથ લંબાયો, ઘરે-ઘરે જઈ લોકોએ કર્યું આ કામ

• નવસારીમાં ભારે વરસાદ રોકાયા બાદ રાહતકાર્ય શરૂ 
• પૂર અસરગ્રસ્ત વિસ્તારમાં રાહત, ઘણા લોકોને સલામત સ્થળે ખસેડાયા 
• અસરગ્રસ્ત વિસ્તારમાં સંસ્થાઓ મદદ કરવા આગળ આવી, ફૂડ પેકેટ વિતરણ 

નવસારી જિલ્લામાં ભારે વરસાદને કારણે 3 નદીઓ પૂર્ણા, કાવેરી અને અંબિકા છલકાઈ હતી. નવસારીની આજુબાજુના વિસ્તારોમાં પૂરના કારણે સેંકડો લોકો પ્રભાવિત થયા હતા. જ્યારે વહીવટીતંત્રે હજારો લોકોને સુરક્ષિત રાહત શિબિરોમાં ખસેડ્યા હતા. પૂરના કારણે લોકો પોતાના ઘર છોડીને જીવ બચાવીને સલામત સ્થળે પહોંચી ગયા હતા, જેથી ઘણા લોકોને બચાવીને બહાર કાઢવામાં આવ્યા હતા. આ તરફ અનેક સ્થાનિક સંસ્થાઓ પણ ગામડાઓમાં જઈને લોકોને ફૂડ પેકેટ પહોંચાડી રહી છે.

સ્થાનિક સંસ્થાઓ-રાજકીય પક્ષો દ્વારા ફૂડ પેકેટ વિતરણ 

નવસારીમાં પૂર્ણા, કાવેરી અને અંબિકા નદીમાં પૂર આવ્યું હતું. જેને કારણે નવસારી આસપાસના વિસ્તારમાં હજારો લોકો અસરગ્રસ્ત થયા હતા. જેથી લોકોને મોટી માત્રમાં નુકસાન ભોગવવાનો વારો આવ્યો છે. અનેક લોકોએ પોતાનું ઘર ગુમાવ્યું છે, તો અનેક લોકોનો સામાન પાણીમાં તણાઈ ગયો છે. જેથી નવસારી જિલ્લાના વિવિધ ગામોમાં લોકો મદદ કરવા આગળ આવ્યા છે. અને ફૂડ પેકેટનું વિતરણ કરી રહ્યા છે. અનેક સંસ્થાઓ જિલ્લાના અલગ અલગ નાના ગામમાં જઇને લોકોને ઘરે-ઘરે ફૂડ પેકેટનું વિતરણ કરી રહી છે. સાથે રાજકીય પક્ષોએ પણ રાહત કાર્ય શરૂ કર્યું છે.

નવસારીમાં અનેક લોકો બેઘર બન્યા

નવસારી જિલ્લામાં ભારે વરસાદને કારણે લોકોને ભારે નુકસાન વેઠવું પડ્યું હતું. અનેક લોકો બેઘર બન્યા હતા અને સેંકડો લોકોના ઘરવખરીનો સામાન પાણીમાં વહી ગયો હતો. જેમ જેમ પાણી જતું રહ્યું તેમ તેમ નુકસાનનો આંકડો વધ્યો હતો. નવસારીમાં આવેલા પૂરમાં અનાજ, પાણી, કપડાં, વાસણો જેવી અનેક વસ્તુઓ વહી ગઈ હતી.  

લોકો જાતે જ અસરગ્રસ્ત ગામડાઓની મદદે આવ્યા 

નવસારીમાં વરસાદે ભારે તારાજી સર્જી છે. આ તરફ હવે વરસાદ રોકાયા બાદ તારાજીના દ્રશ્યો સામે આવ્યા છે. અનેક લોકો બેઘર બન્યા બાદ હવે લોકો, સામાજિક સંસ્થાઓ જાતે જ અસરગ્રસ્ત વિસ્તારોની મદદે આવ્યા છે. પૂર બાદ નવસારી જિલ્લાના વિવિધ ગામોમાં લોકો જાતે મદદ માટે બહાર આવ્યા હતા.અને લોકોને ફૂડ પેકેટનું વિતરણ કરવામાં આવી રહ્યું છે. જિલ્લાના વિવિધ નાના ગામડાઓમાં સેંકડો સંસ્થાઓ ઘરે ઘરે જઈને લોકોને ફૂડ પેકેટનું વિતરણ કરી રહી છે. તો રાજકીય પક્ષોએ પણ રાહત કાર્ય શરૂ કરી દીધું છે. 

ફરી એકવાર વરસાદની આગાહી 

હવામાન વિભાગની આગાહી અનુસાર આજે બનાસકાંઠા, સાબરકાંઠા, પાટણ, મહેસાણા, અરવલ્લી, ગાંધીનગર, મહીસાગર, ખેડા અને અમદાવાદમાં વરસાદ થવાની સંભાવના છે. સાથે જ દાહોદ, પંચમહાલ, આણંદ, વડોદરા, છોટાઉદેપુરમાં પણ વરસાદની આગાગી કરવામાં આવી છે. ઉપરાંત દક્ષિણ ગુજરાતના નર્મદા, ભરૂચ, સુરત, તાપી, નવસારી, ડાંગ અને વલસાડ વરસાદ થવાની સંભાવના છે. તથા સૌરાષ્ટ્ર-કચ્છના કેટલાક ભાગમાં પણ વરસાદ વરસી શકે છે.