- કેએલ રાહુલે સાઉથ આફ્રિકા સામે ટેસ્ટ મેચમાં સદી ફટકારી.
- કેએલ રાહુલે પ્રતિક્રિયા આપતા ચાહકોના બેવડા વલણની ટીકા કરી.
- આ જ લોકો હતા જે થોડા સમય પહેલા સુધી મને ખૂબ ટ્રોલ કરતા હતા.
ટીમ ઈન્ડિયાના વિકેટકીપર બેટ્સમેન કેએલ રાહુલે સાઉથ આફ્રિકા સામે સેન્ચુરિયન ટેસ્ટ મેચમાં સદી ફટકાર્યા બાદ પ્રતિક્રિયા આપતા ચાહકોના બેવડા વલણની ટીકા કરી છે.
કેએલ રાહુલે કહ્યું કે, 'જે લોકો આજે સોશિયલ મીડિયા પર તેમના વખાણ કરી રહ્યા છે તે જ લોકો હતા જે થોડા સમય પહેલા સુધી તેમને ખૂબ ટ્રોલ કરતા હતા.' કેએલ રાહુલના કહેવા પ્રમાણે, સોશિયલ મીડિયા પર ટ્રોલ થવાથી ખેલાડીઓમાં ઘણો ફરક પડે છે.
સેન્ચુરિયન ટેસ્ટ મેચમાં કેએલ રાહુલે શાનદાર સદી ફટકારીને ભારતને મુશ્કેલીમાંથી બહાર કાઢ્યું હતું. ટોસ હાર્યા બાદ પ્રથમ બેટિંગ કરવા આવેલી ટીમ ઈન્ડિયાની શરૂઆત સારી રહી ન હતી. ટીમે માત્ર 121 રનમાં 6 વિકેટ ગુમાવી દીધી હતી અને અહીંથી 150 રન બનાવવા મુશ્કેલ હતા. જોકે, મિડલ ઓર્ડરમાં બેટિંગ કરવા આવેલા કેએલ રાહુલ એક છેડે રહ્યો હતો અને નીચલા ક્રમના બેટ્સમેનોની સાથે મળીને ટીમને સારા સ્કોર સુધી લઈ ગયો હતો.
કેએલ રાહુલને પૂછવામાં આવ્યું કે શું સોશિયલ મીડિયા ટ્રોલિંગથી તેના પર કોઈ ફરક પડ્યો છે? તો આ પ્રશ્નના જવાબમાં તેમણે કહ્યું કે, જો તમે પબ્લિક પર્ફોર્મર છો તો તમે સારું પ્રદર્શન કરીને જ ટીકાથી બચી શકો છો. જે લોકો આજે મારા વખાણ કરી રહ્યા છે એ જ લોકો થોડા મહિના પહેલા મણે ટ્રોલ કરતા હતા. જે કોઈ કહે છે કે સોશિયલ મીડિયાથી તેમને કોઈ ફરક પડતો નથી તે ખોટું બોલે છે. જો કે, તમે તેનાથી જેટલું દૂર રહેશો, તે તમારી માનસિકતા માટે વધુ સારું રહેશે.'
તમને જણાવી દઈએ કે કેએલ રાહુલે 137 બોલમાં 101 રનની ઈનિંગ રમીને ટીમ ઈન્ડિયાને વહેલી ઓલઆઉટ થતા બચાવી હતી.
