કાર્યવાહી / બોટાદ લઠ્ઠાકાંડ: આજે વધુ 7 આરોપીને કોર્ટમાં રજૂ કરાશે, ગઈકાલે 2 મુખ્ય આરોપીના 6 દિવસના રિમાન્ડ થયા હતા મંજૂર

• બોટાદ લઠ્ઠાકાંડનો મામલો
• આજે વધુ 7 આરોપીને કોર્ટમાં રજૂ કરાશે
• 10 દિવસના રિમાન્ડ માગવામાં આવશે

બોટાદ કથિત લઠ્ઠાકાંડ કહો કે કેમિકલકાંડ  43 લોકોને ભરખી ગયો. આ 43લોકોના પરિવારની શું સ્થિતિ છે શું વેદના છે તે જાણી સૌ કોઈના રૂવાડા ઊભા થઈ જશે.  સૌથી વધુ 32 મોત બોટાદ જિલ્લામાં થયા છે , અમદાવાદના 11 વ્યક્તિઓના મૃત્યુ થયા છે. સમગ્ર કેસમાં 15 જેટલા આરોપીઓને ઝડપી પાડવામાં આવ્યા છે. જેમાં ગઈકાલે ગજુબેન અને પીન્ટુ ગોરહવાને કોર્ટમાં રજૂ કરવામાં આવ્યા હતા. કોર્ટે બંને આરોપીઓના 10 દિવસની રિમાન્ડની માંગણી વચ્ચે 6 દિવસના રિમાન્ડ મંજૂર કર્યા હતા.ત્યારે આજે વધુ 7 આરોપીઓને બરવાળાની કોર્ટમાં કરવામાં રજૂ કરવામાં આવશે. આરોપીને કોર્ટમાં રજૂ કરી 10 દિવસના રિમાન્ડ માગવામાં આવશે.

આરોપીઓએ 43 લોકોના લીધા જીવ અનેકને બેઘર કર્યા
જયેશના ફુઆના છોકરા સંજયને 600 લિટર કેમિકલ અપાયું. 600 લિટરમાંથી સંજય ઉર્ફે પિન્ટુ નામ શખ્સને આ કેમિકલ અપાયું. જયેશ કેમિકલ કંપનીના ગોડાઉનનો ઇન્ચાર્જ હતો. 600 લિટરમાંથી 200 લિટર કેમિકલ પિન્ટુને આપવામાં આવ્યું હતું.  જેમાં પાણી મિલાવીને તેનું વેચાણ કરાતું. આ રીતે ગામમાં ટુકડે-ટુકડે મિથેનોલનું વેચાણ થયું હતું

ઝડપાયેલા આરોપીઓના નામ

• ગજુબેન વડદરિયા, રહેવાસી - રોજીંદ, બરવાળા 
• પીન્ટુ દેવીપૂજક, રહે. ચોકડી , બરવાળા
• વિનોદ કુમારખાણીયા, રહે. નભોઈ
• સંજય કુમારખાણીયા, રહે. નભોઈ
• હરેશ આંબલિયા, રહે. ધંધુકા
• જટુભા લાલુભા, રહે. રાણપરી
• વિજય પઢિયાર, રહે. રામપરા
• ભવાન નારાયણ, રહે. વેયા
• સન્ની રતિલાલ, રહે. પોલારપુર
• નસીબ છના, રહે. ચોકડી
• રાજુ, રહે. અમદાવાદ 
• અજીત કુમારખાણીયા, રહે. ચોકડી 
• ભવાન રામુ, રહે. નભોઈ
• યમન રસીક, રહે. ચોકડી

રિપોર્ટમાં મીથાઈલ આલ્કોહોલનું પ્રમાણ 98.71 હતું
મહત્વનું છે કે પોલીસે જપ્ત કરેલા દારૂનો FSL રિપોર્ટ આવતા મોટો ખુલાસો થયો હતો કે આરોપીઓએ દારૂના નામે લોકોને કેમિકલ પીવડાવી દીધું હતું. કારણ કે K અને Lના નમૂનામાં મીથાઈલ આલ્કોહોલનું પ્રમાણ 98.71 તથા 98.99 આવ્યું હતું. જ્યારે ઇથાઇલ આલ્કોહોલમાં 0 પ્રમાણ આવ્યુ હતું જે બાદ કેમિકલ કાંડમાં કાવતરું થયું હોવાનું પોલીસને જાણવા મળ્યું હતું.

ભાવનગર સિવિલના 15 દર્દીઓ ડિસ્ચાર્જ થશે
બોટાદ લઠ્ઠાકાંડમાં ભાવનગર સિવિલમાં વધુ 2 દર્દીઓને લવાયા છે. રાત્રે વધુ 2 દર્દીઓને સારવાર અર્થે ભાવનગરની સિવિલમાં લવાયા હતા. ત્યારે ભાવનગરની સિવિલમાં લવાયેલા દર્દીઓની સંખ્યા 104 થઈ ગઇ છે. પણ રાહતની વાત એ છે કે આજે ભાવનગર સિવિલના 15 દર્દીઓ ડિસ્ચાર્જ કરી ઘરે મોકલવામાં આવશે. મહત્વનું છે કે 9 દર્દીઓને અત્યાર સુધી ડિસ્ચાર્જ  કરવામાં આવ્યા હતા જે બાદ વધુ 15 દર્દીઓ સ્વસ્થ થઈ જતા તેઓને પણ ડિસ્ચાર્જ કરવામાં આવ્યા છે.

2 DySP, 1 CPI, 1 PI, 2 PSI સસ્પેન્ડ
બોટાદ લઠ્ઠાકાંડ મામલે ગૃહ વિભાગે મોટી કાર્યવાહી કરી છે. ગૃહ વિભાગે લઠ્ઠાકાંડને લઇ 6 પોલીસ કર્મચારીઓને સસ્પેન્ડ કર્યા છે. જેમાં અમદાવાદ ગ્રામ્યના DySP એન.વી.પટેલ, બોટાદના DySP એસ.કે.ત્રિવેદી, બરવાળાના PSI ભગીરથસિંહ વાળા, રાણપુરના PSI શૈલેન્દ્રસિંહ રાણા, ધંધુકા CPI સુરેશ બી. ચૌધરી અને ધંધુકા PI કે. પી. જાડેજા સસ્પેન્ડ સામેલ છે. આ પાંચ પોલીસ કર્મચારીને સસ્પેન્ડ કરવા સાથે બોટાદના SP કરણરાજ વાઘેલા અને અમદાવાદ ગ્રામ્યના SP વિરેન્દ્રસિંહ યાદવની બદલી કરવામાં આવી છે. ઉલ્લેખનીય છે કે, લઠ્ઠાકાંડમાં અત્યાર સુધી 43 લોકોના મૃત્યુ થયાં છે. સાથે અનેક દર્દીઓ હજુ પણ હોસ્પિટલમાં દાખલ છે.