ઍલર્ટ / આગામી 4 સપ્તાહ અતિ ભારે! XBB1.16 વેરિઅન્ટ જે ઇમ્યુન સિસ્ટમને પણ આપી રહ્યો છે માત, નિષ્ણાંતોની ચેતવણી

• કોરોનાના કેસમાં ઉછાળો. 
• રોગ પ્રતિકારક શક્તિ મજબૂત હોવા છતાં ચપેટમાં આવવાની શક્યતા. 
• આવનાર ચાર સપ્તાહ ખૂબ જ મહત્ત્વપૂર્ણ

ભારતમાં કોરોના વાયરસના કેસમાં ફરી એકવાર ઉછાળો આવ્યો છે. આ પરિસ્થિતિમાં નિષ્ણાંતોએ ચેતવણી આપી છે કે, રોગ પ્રતિકારક શક્તિ મજબૂત હોવા છતાં નવો XBB1.16 વેરિએન્ટની ચપેટમાં આવી શકવાની સંભાવના છે. આવનાર ચાર સપ્તાહ ખૂબ જ મહત્ત્વપૂર્ણ છે. XBB1.16 કોરોનાના ઓમિક્રોન વેરિએન્ટનો સંક્રામક વેરિએન્ટ છે. 

સર ગંગા રામ હોસ્પિટલના વરિષ્ઠ બાળ રોગ નિષ્ણાંત ડૉ.ધીરેન ગુપ્તાએ ANIને જાણકારી આપી છે કે, XBB1.16ના કારણે બાળકો અને વયસ્કોને કોરોના થઈ રહ્યો છે. આ વેરિએન્ટ ઈમ્યૂન સિસ્ટમને પણ મ્હાત આપી શકે છે. જે લોકોને અગાઉ કોરોના થયેલ છે, તે લોકોને આ વેરિએન્ટથી સંક્રમિત થઈ રહ્યા છે. કિશોર અને વયસ્ક પણ XBB1.16 વેરિએન્ટની ચપેટમાં આવી રહ્યા છે. આ વેરિએન્ટ ઝડપથી ફેલાવાની સંભાવના છે. કોરોના કરતા એડેનોવાયરસ અને ઈન્ફ્લુએન્ઝા જેવા ઈન્ફેક્શન વધુ જોખમી છે. અગાઉના સ્ટ્રેન કરતા XBB1.16 વેરિએન્ટ વધુ સંક્રામક અને ઘાતક છે. 

ભારતમાં છેલ્લા ઘણા સપ્તાહથી કોરોનાના કેસમાં વધારો થઈ રહ્યા છે. જે માટે XBB1.16 વેરિએન્ટ જવાબદાર છે. 12 વર્ષ કરતા ઓછી ઉંમરના બાળકો આ વેરિએન્ટની ચપેટમાં આવી રહ્યા છે. ભારતીય SARS COV-2 જીનોમિક્સ કંસોર્ટિયમના આંકડા અનુસાર રાજ્યો અને કેન્દ્રશાસિત પ્રદેશમાંથી XBB1.16 વેરિએન્ટના 1,774 કેસ સામે આવ્યા છે. 

મધુકર રેનબો ચિલ્ડ્રન હોસ્પિટલના બાળરોગ નિષ્ણાંત ડૉ. એસ. કે. નાકરા જણાવે છે કે, કોરોનાના કેટલાક કેસ એવા પણ છે, જેમાં લોકોને આંખોની પરેશાની છે. આ પ્રકારના કેસમાં દર્દીને ‘તાવ, ખાંસી, ગળામાં ખરાશ, નાકમાંથી પાણી નીકળવું, શરીર કળવું જેવા કોરોનાના લક્ષણો જ જોવા મળી રહ્યા છે.’ કેટલાક ડૉકટરોએ જાણકારી આપી છે કે, દર્દીઓને આંખ ચીપચીપી થવાની પણ સમસ્યા થઈ રહી છે. કોરોનાના અગાઉના સ્ટ્રેનમાં લગભગ 1થી 3 ટકા દર્દીઓમાં આ લક્ષણો જોવા મળ્યા હતા. આંખોના આ પ્રકારના લક્ષણો XBB1.16 વેરિએન્ટ સાથે જોડાયેલ છે, તેવું કહેવું તે યોગ્ય નથી.