BIG NEWS / અમદાવાદની ઝાયડ્સ સ્કૂલના 2 વિદ્યાર્થીઓ કોરોના પોઝિટિવ આવતા હડકંપ, લેવાયો આ મોટો નિર્ણય

• અમદાવાદમાં એક વાર ફરી કોરોનાના કેસોએ ઉથલો માર્યો
• વેજલપુરની ઝાયડ્સ સ્કૂલમાં 2 વિદ્યાર્થીઓ કોરોના પોઝિટિવ
• વિદ્યાર્થીઓ કોરોના પોઝિટિવ આવતા સ્કૂલ બંધ કરાઇ

અમદાવાદમાં એક વાર ફરી કોરોનાના કેસોએ ઉથલો માર્યો છે. કારણ કે હજુ તો તાજેતરમાં જ પાલડીની NID વિદ્યાસંકુલમાં કોરોનાનો બ્લાસ્ટ થયો છે. એવામાં હવે અમદાવાદની  વેજલપુરની ઝાયડ્સ સ્કૂલમાં 2 વિદ્યાર્થીઓ કોરોના પોઝિટિવ આવ્યા છે. વિદ્યાર્થીઓ કોરોના પોઝિટિવ આવતા સ્કૂલ બંધ કરી દેવાઇ છે. વિદ્યાર્થીઓને આજથી વેકેશન આપી દેવાયું છે.

ગઇ કાલે અમદાવાદમાં જ કોરોનાના માત્ર 19 કેસ સામે આવ્યા હતાં

અત્રે નોંધનીય છે કે, રાજ્યમાં છેલ્લાં ઘણાં સમયથી કોરોનામાં થોડીક રાહત મળી હતી. છૂટછાટ પણ મોટા ભાગે મળી ગઇ છે. પરંતુ એવામાં એકવાર ફરી રાજ્યમાં કોરોના માથું ઉંચકી રહ્યો છે. ગઈ કાલે પણ રાજ્યમાં કોરોનાના 30થી વધુ કેસ નોંધાયા હતા. જેમાંથી 19 નવા કેસ તો માત્ર અમદાવાદમાં જ નોંધાયા હતા.

રાજ્યમાં ગઇ કાલે છેલ્લાં 24 કલાકમાં કોરોનાના નવા 31 કેસ નોંધાયા

ઉલ્લેખનીય છે કે, ગઇ કાલે ગુજરાતમાં છેલ્લાં 24 કલાકમાં કોરોનાના નવા 31 કેસ નોંધાયા હતાં. દરમિયાન કોઈનું મૃત્યુ નથી થયું. પરંતુ રાજ્યમાં અત્યાર સુધીમાં કોરોનાને લીધે કુલ 10944 લોકોના મૃત્યુ થયા છે. રાજ્યમાં છેલ્લાં 24 કલાકમાં કોરોનાની સારવાર બાદ 21 લોકો સ્વસ્થ થયા છે. ગુજરાતમાં અત્યાર સુધી કોરોનાના કુલ 12 લાખ 24 હજાર 594 કેસ નોંધાયા છે. જ્યારે કોરોનાની સારવાર બાદ 12,13,467 લોકો સાજા થયા છે.

NIDમાં ઓનલાઈન શિક્ષણ શરૂ કરી દેવાયું છે

ગઇ કાલે NIDમાં વધુ 11 વિદ્યાર્થીઓ અને 2 સ્ટાફ મેમ્બર કોરોના પોઝિટિવ આવ્યા હતાં. જેથી NIDમાં ઓનલાઈન શિક્ષણ શરૂ કરી દેવાયું છે. NIDમાં કોરોનાના કુલ 37 કેસ નોંધાયા છે. NID કેમ્પસ દ્વારા જણાવેલા આંકડા અનુસાર 6 મેના રોજ 1 કેસ, 7 મેના રોજ 5 કેસ, 8 મેના રોજ 17 કેસ, 9 મેના રોજ 3 કેસ અને 10 મેના રોજ 11 કોરોનાના કેસ નોંધાયા છે. જો કે એકસાથે કોરોનાના આટલાં કેસ સામે આવતા અમદાવાદની NID ની હોસ્ટેલને કન્ટેનમેન્ટ ઝોન તરીકે જાહેર કરવામાં આવી છે. ત્યારે 8 તારીખ બાદથી AMC દ્વારા NID માં 700 કરતા વધુના કોરોના ટેસ્ટ કરવામાં આવ્યા હતા. NIDમાં એકાએક કોરોનાના કેસો વધતા હાલ NIDમાં તમામ ઓફલાઈન વર્ગોને સ્થગિત કરી ઓનલાઈન કરી દેવાયા છે.