- જમ્મુ-કાશ્મીરના રાજૌરી જિલ્લામાં શનિવારે દર્દનાક અકસ્માત
- સેનાનું વાહન ઊંડી ખીણમાં પડ્યા બાદ સેનાના બે જવાન શહીદ
- આ દર્દનાક અકસ્માત અન્ય કેટલાક જવાનો ઘાયલ થયા
જમ્મુ-કાશ્મીરના રાજૌરી જિલ્લામાં શનિવારે એક દર્દનાક અકસ્માતનાં સમાચાર સામે આવી રહ્યા છે. પ્રાથમિક વિગતો મુજબ સેનાનું એક વાહન ઊંડી ખીણમાં પડી ગયા બાદ ભારતીય સેનાના બે જવાન શહીદ થયા છે. આ સાથે અન્ય કેટલાક જવાનો ઘાયલ પણ થયા હોવાનું પણ સામે આવ્યું છે.
રાજૌરી જિલ્લામાં આજે એટલે કે શનિવારે બનેલી ઘટનામાં ભારતીય સેનાનાં બે જવાન શહીદ થયા છે. આ તરફ દુર્ઘટનાની માહિતી મળતાં જ સેના, પોલીસ અને બચાવ ટીમ ઘટનાસ્થળે પહોંચી ગઈ છે. ઘાયલોને હોસ્પિટલમાં લઈ જવામાં આવી રહ્યા છે. માહિતી મુજબ રેસ્ક્યુ ઓપરેશન હજુ ચાલુ છે. આ ઘટના વાસ્તવિક નિયંત્રણ રેખા (LOC) નજીક કેરી સેક્ટરમાં બની હતી.
નોંધનિય છે કે, જમ્મુ-કાશ્મીરના પુંછ જિલ્લામાં 20 એપ્રિલે બપોરે લગભગ 3 વાગ્યે આતંકવાદીઓએ સેનાના એક વાહન પર ગોળીબાર કર્યો હતો. જે બાદ ટ્રકમાં આગ લાગતા તેમાં 5 જવાનો દાઝી ગયા હતા. શહીદ થયેલા જવાનોની ઓળખ લાન્સ નાઈક દેબાશીશ બસવાલ, લાન્સ નાઈક કુલવંત સિંહ, સિપાહી હરકિશન સિંહ, સિપાહી સેવક સિંહ અને હવાલદાર મનદીપ સિંહ તરીકે થઈ છે. જેમાંથી લાન્સ નાઈક દેબાશીશ બસવાલ ઓરિસ્સાના રહેવાસી છે, બાકીના ચાર શહીદ પંજાબના રહેવાસી છે.
