શેરમાર્કેટ / શેર બજારમાં રોકાણકારોનો 11 લાખ કરોડનો ધુમાડો, આ શેરોએ દીધો દગો, સેન્સેક્સ-નિફ્ટી કડડભૂસ

Share Market : ભારતીય શેરબજારમાં આજે રોકાણકારોનો 11 લાખ કરોડનો ધુમાડો થયાનું સામે આવ્યું છે. વાત જાણે એમ છે કે, આજે એટલે કે બુધવારના ટ્રેડિંગ સેશનમાં મિડકેપ અને સ્મોલકેપ શેરોમાં મોટો ઘટાડો થયો છે. નિફ્ટી મિડકેપ ઈન્ડેક્સ 1730 પોઈન્ટ અથવા 3.61 ટકા ઘટીને ટ્રેડ થઈ રહ્યો છે. તો નિફ્ટી સ્મોલકેપ ઈન્ડેક્સ 676 પોઈન્ટ અથવા 4.50 ટકા ઘટીને ટ્રેડ થઈ રહ્યો છે. BSEનો સ્મોલકેપ ઈન્ડેક્સ 1824 પોઈન્ટ અને મિડકેપ ઈન્ડેક્સ 1382 પોઈન્ટના ઘટાડા સાથે ટ્રેડ થઈ રહ્યો છે. મિડકેપ અને સ્મોલકેપ શેરોમાં બબલ વિશે સેબી ચીફના નિવેદન બાદથી આ સેક્ટરના શેરોમાં ઘટાડો જોવા મળી રહ્યો છે. 

10.50 લાખ કરોડથી વધુનું નુકસાન 
માર્કેટમાં ઘટાડાની સુનામીના કારણે રોકાણકારોને બજાર ખુલ્યાના ત્રણ કલાકમાં જ રૂ.7 લાખ કરોડથી વધુનું નુકસાન થયું છે. BSE પર લિસ્ટેડ શેરોનું માર્કેટ કેપ ઘટીને રૂ. 374.79 લાખ કરોડ થયું છે, જે ગયા ટ્રેડિંગ સેશનમાં રૂ. 385.57 લાખ કરોડ હતું. એટલે કે આજના વેપારમાં રોકાણકારોને લગભગ રૂ. 10.78 લાખ કરોડનું નુકસાન થયું છે.   

સેન્સેક્સ - નિફ્ટીમાં પણ મોટો ઘટાડો  
આજે એટલે કે બુધવાર સવારથી સ્મોલકેપ અને મિડકેપમાં ઘટાડો જોવા મળ્યો હતો પરંતુ જેમ જેમ દિવસ આગળ વધતો ગયો તેમ તેમ બિગ કે લાર્જ કેપ શેરો પણ ઘટાડાનાં પ્રભાવ હેઠળ આવ્યા. BSE સેન્સેક્સ 510 પોઈન્ટ અને નિફ્ટી 213 પોઈન્ટના ઘટાડા સાથે કારોબાર કરી રહ્યો છે. નિફ્ટી નેક્સ્ટ 50 ઈન્ડેક્સ 1854 પોઈન્ટ ઘટીને ટ્રેડ થઈ રહ્યો છે. સેક્ટરમાં એનર્જી શેરોનો ઈન્ડેક્સ 1657 પોઈન્ટ ઘટીને ટ્રેડ થઈ રહ્યો છે. 

સરકારી કંપનીઓનો ઇન્ડેક્સ નિફ્ટી પીએસઇ 5.72 ટકા અથવા 531 પોઇન્ટના ઘટાડા સાથે ટ્રેડ કરી રહ્યો છે. નિફ્ટી પીએસયુ બેન્ક ઈન્ડેક્સ પણ 3.61 ટકા નીચે ટ્રેડ થઈ રહ્યો છે. સાર્વજનિક ક્ષેત્રની બેંકોના શેરોને ખરાબ રીતે ફટકો પડ્યો છે.

વધુ વાંચો: શેર બજારની ટપોરા જેવી શરૂઆત: સેન્સેક્સ 73,877 પર, IT સ્ટોકમાં આટલો જમ્પ

PSU શેરોમાં કડાકો 
જો આપણે વધતા અને ઘટતા શેરો પર નજર કરીએ તો, નાલ્કો 7.98 ટકા, વોડાફોન આઇડિયા 7.66 ટકા, પાવર ફાઇનાન્સ 6.77 ટકા, હિન્દુસ્તાન એરોનોટિક્સ 6.93 ટકા ટ્રેડ કરી રહ્યું છે. જ્યારે ITC, કોટક મહિન્દ્રા બેંક, ICICI બેંક ઝડપી ગતિએ વેપાર કરી રહી છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો