- વર્લ્ડ કપમાં ઠંડું પડેલું પાકિસ્તાન જોશમાં આવ્યું
- બાંગ્લાદેશને 7 વિકેટથી પરાજય આપીને વર્લ્ડ કપમાં કરી વાપસી
- ઓપનર ફખર ઝમાને 74 બોલમાં સૌથી વધુ 81 રન કર્યાં
સાવ ઠંડી પડેલી પાકિસ્તાન ટીમ જોશમાં આવી છે. કોલકાતાના ઈડન ગાર્ડનમાં રમાયેલી મેચમાં પાકિસ્તાને બાંગ્લાદેશને 7 વિકેટથી પરાજય આપીને વર્લ્ડ કપમાં વાપસી કરી છે. બાબર આઝમની કેપ્ટનશિપમાં પાકિસ્તાનની ટીમે સતત 4 મેચ હાર્યા બાદ પ્રથમ જીત નોંધાવી છે. બાંગ્લાદેશ તરફથી પાકિસ્તાનને 205 રનનો ટાર્ગેટ મળ્યો હતો, જેના જવાબમાં બાબર બ્રિગેડે 32.3 ઓવરમાં મેચ જીતી લીધી હતી. આ જીતની સાથે જ પાકિસ્તાનની સેમિ ફાઈનલમાં પ્રવેશવાની આશા અકબંધ છે. જ્યારે બાંગ્લાદેશ સંપૂર્ણપણે બહાર થઈ ગયું છે.
કેપ્ટન બાબર આઝમ ફરી એકવાર ફ્લોપ
પાકિસ્તાન માટે ઓપનર ફખર ઝમાને 74 બોલમાં સૌથી વધુ 81 રન બનાવ્યા હતા. આ દરમિયાન તેણે 7 સિક્સર અને 3 ફોર ફટકારી હતી. જ્યારે અબ્દુલ્લા શફીકે 69 બોલમાં 68 રન કર્યા હતા. આ બંનેએ પ્રથમ વિકેટ માટે 128 રનની ભાગીદારી નોંધાવી હતી. બાબર આઝમ ફરી એકવાર આ મેચમાં ફ્લોપ સાબિત થયો હતો. તેણે 16 બોલ રમીને માત્ર 9 રન બનાવ્યા હતા. તેમની પાસે ફોર્મમાં પાછા ફરવાની સારી તક હતી અને તેઓ કેટલાક સારા શોટ રમી શક્યા હોત. બીજી તરફ બાંગ્લાદેશની ટીમના બોલરો પણ પાકિસ્તાન પર દબાણ બનાવવામાં નિષ્ફળ રહ્યા હતા. માત્ર મેહદી હસન જ 3 વિકેટ લઈ શક્યો હતો, પરંતુ તે પણ મેચ જીતી શક્યો નહતો.
પાકિસ્તાને આપ્યો 205 રનનો ટાર્ગેટ
આ મેચમાં બાંગ્લાદેશના કેપ્ટન શક બીલ અલ હસને ટોસ જીતીને પ્રથમ બેટિંગ કરવાનો નિર્ણય કર્યો હતો. આ પછી ટીમ 204 રનમાં જ ખખડી ગઈ હતી. મહમુદુલ્લાહે ટીમ માટે સૌથી વધુ 56 રન બનાવ્યા હતા. તેમના સિવાય લિટન દાસે 45 અને કેપ્ટન શાકિબે 43 રન બનાવ્યા હતા. પાકિસ્તાન માટે શાહીન આફ્રિદી અને મોહમ્મદ વસીમે 3-3 વિકેટ લીધી હતી. જ્યારે હારિસ રઉફને 2 સફળતા મળી હતી.
બાંગ્લાદેશ મેચ માટે પાક.ટીમમાં 3 ફેરફાર
આ મેચ માટે પાકિસ્તાની ટીમમાં ત્રણ ફેરફાર કરવામાં આવ્યા હતા. ઇમામ ઉલ હક, શદાબ ખાન અને મોહમ્મદ નવાઝને પડતા મૂકવામાં આવ્યા હતા. તેમના સ્થાને ફખર ઝમાન, સલમાન અલી આગા અને ઉસામા મીરને લેવામાં આવ્યા હતા.
બાંગ્લાદેશ વર્લ્ડ કપમાંથી આઉટ
પાકિસ્તાન સામે હારી જતાં જતાં બાંગ્લાદેશ વર્લ્ડ કપમાંથી આઉટ થયું છે. જોકે પાકિસ્તાન સેમી ફાઈનલની આશા જીવંત રાખી છે. જો પાકિસ્તાન આ મેચ હાર્યું હોત તો તે પણ વર્લ્ડ કપમાંથી નીકળી ગયું હોત.
વર્લ્ડ કપમાં અત્યાર સુધી પાકિસ્તાનની કેટલી જીત, કેટલી હાર
વર્લ્ડ કપમાં અત્યાર સુધી પાકિસ્તાન 7 મેચ રમ્યું છે જેમાંથી 4માં તેનો પરાજય થયો છે જ્યારે 3માં તેનો વિજય થયો છે. હવે પાકિસ્તાનની માત્ર બે જ મેચ રહી છે. ઓસ્ટ્રેલિયા અને ન્યૂઝીલેન્ડ સામે. પાકિસ્તાનને સેમી ફાઈનલમાં ટકી રહેવું હોય તો બાકીની બે મેચ જીતવી જ પડશે.
