કડકાઇ / પ્રિકોશન ડોઝ નહીં લો તો પગાર નહીં મળે! અહીં 6 હજાર કર્મચારીઓ સામે કલેકટરે મૂકી શરત

• કોરોનાને રોકવા ઇંદોર જિલ્લા વહીવટી તંત્ર એક્શનમાં
• ફ્રન્ટલાઇન વોરિયર્સે પ્રિકોશન ડોઝ ન લીધો તો રોક્યો પગાર
• અગાઉ કલેક્ટરે આપી હતી ચેતવણી 

મધ્યપ્રદેશના ઈન્દોર જિલ્લાનું વહીવટીતંત્ર કોરોના વાયરસના ફેલાવાને રોકવા માટે રસીકરણને પ્રાથમિકતા આપી રહ્યું છે. તો સાથે જ જિલ્લા વહીવટી તંત્ર રસી ન લેનાર સરકારી અને ખાનગી કર્મચારીઓ સામે પણ કાર્યવાહી કરી રહ્યું છે. આ અંતર્ગત વહીવટી તંત્રએ પ્રિકોશન ડોઝ ન લેનાર  6 હજાર સરકારી અને ખાનગી કર્મચારીઓનો પગાર અટકાવી દીધો છે.મહત્વનું છે કે  એક અઠવાડિયા પહેલા કલેક્ટર મનીષ સિંહે ચેતવણી આપી હતી કે ત્રીજો ડોઝ લેવામાં બેદરકારી દાખવનારા આરોગ્ય કર્મચારીઓ અને ફ્રન્ટલાઈન સ્ટાફના પગાર રોકી દેવામાં આવશે. 

વેઇટિંગ પીરિયડ ધરાવતા કર્મચારીઓને સમયસર પગાર મળશે

કલેક્ટરે કહ્યું, "મારી વિનંતી પર, ઇન્દોરના પોલીસ કમિશનર હરિનારાયણચારી મિશ્રાએ તેમના વિભાગને ફક્ત તે જ લોકોને પગાર આપવાનો નિર્દેશ કર્યો છે કે જેઓએ પ્રિકોશન ડોઝ લીધો હોય." કલેકટરે વધુમાં જણાવ્યું હતું કે જે કર્મચારીઓ તેમના ત્રીજા ડોઝ માટે રાહ જોઈ રહ્યા છે અને જેમને ફ્રન્ટલાઈન કામદારો તરીકે વર્ગીકૃત કરવામાં આવ્યા નથી તેઓને તેમનો પગાર સમયસર મળશે.

વેક્સિન સર્ટી બતાવ્યા બાદ જ મળશે પગાર

આપને જણાવી દઈએ કે કલેકટરે આદેશ આપ્યો છે કે જે કર્મચારીઓનો જાન્યુઆરીનો પગાર રોકી દેવામાં આવ્યો છે તેમનો પગાર તેઓ પ્રિકોશન ડોઝ લેવાનું પ્રમાણપત્ર જમા કરાવે પછી જ આપવામાં આવશે.

આ વિભાગોના કર્મચારીઓને જાન્યુઆરી માસનો પગાર મળ્યો નથી

જાન્યુઆરી મહિનાના છેલ્લા દિવસે ઓછામાં ઓછા 1,678 પોલીસકર્મીઓને જાન્યુઆરીનો પગાર મળ્યો ન હતો. બીજી તરફ, ઈન્દોર મ્યુનિસિપલ કોર્પોરેશનના 1,486 કર્મચારીઓ, અન્ય દળોના 1,289 કર્મચારીઓ અને 742 આરોગ્ય કર્મચારીઓ એવા છે જેમને તેમનો પગાર મળ્યો નથી. અન્યમાં 354 મહેસૂલ કર્મચારીઓ, MP વીજળી બોર્ડના 212, પંચાયતના 178 અધિકારીઓ, 46 કોર્ટ કર્મચારીઓ અને 731 ખાનગી કર્મચારીઓનો પણ સમાવેશ થાય છે.